Bengaluru Traffic Hack | గంటకు 70 కిమీ వేగంతో దూసుకెళ్లొచ్చు.. బెంగళూరు ట్రాఫిక్‌కు చెక్ పెడుతున్న వింత వాహనం

Bengaluru Traffic Hack | త్రినేత్ర న్యూస్ : భారతదేశ ఐటీ రాజధాని బెంగళూరులో ట్రాఫిక్ సమస్య గురించి ప్రత్యేకంగా చెప్పనవసరం లేదు. ఆఫీస్ వేళల్లో గంటల తరబడి రోడ్లపైనే గడపడం అక్కడి నివాసితులకు రోజువారీ నరకంగా మారింది. ఈ ట్రాఫిక్ కష్టాల నుంచి బయటపడేందుకు నగరవాసులు ఎప్పటికప్పుడు వినూత్న మార్గాలను అన్వేషిస్తున్నారు. తాజాగా, బెంగళూరు రోడ్లపై ఒకే చక్రం ఉండే ఎలక్ట్రిక్ యూనిసైకిల్స్ (EUCs) ప్రత్యక్షమై అందరి దృష్టిని ఆకర్షిస్తున్నాయి.

ప్రముఖ ట్రావెల్ వ్లాగర్ షెనాజ్ ట్రెజరీవాలా (Shenaz Treasury) ఇటీవల బెంగళూరులో ఈ వినూత్న ప్రయాణ శైలిని గుర్తించి, తన ఇన్‌స్టాగ్రామ్ ఖాతాలో ఓ వీడియోను షేర్ చేశారు.

గంటకు 70 కి.మీ స్పీడ్.. మెట్రోలోనూ తీసుకెళ్లవచ్చు

వీడియోలో షెనాజ్ ఓ యూనిసైకిల్ రైడర్‌ను ఆపి దాని గురించి వివరాలు అడిగారు. "ఇది ఎంత వేగంగా వెళ్తుంది?" అని ఆమె ప్రశ్నించగా.. "ఇది గంటకు 70 కిలోమీటర్ల వేగంతో ప్రయాణిస్తుంది. ఆఫీసులకు వెళ్లేవారు, మెట్రో స్టేషన్లకు చేరుకునేవారు దీన్ని వాడుతున్నారు. దీన్ని సులభంగా మెట్రోలోకి కూడా తీసుకెళ్లవచ్చు. కొందరైతే దీనిపై భారతదేశం అంతటా ప్రయాణించారు" అని ఆ రైడర్ బదులిచ్చారు.

మరొక రైడర్ మాట్లాడుతూ తాను కేవలం రోడ్లపైనే కాకుండా పర్వతాలు, బీచ్‌లు, మెట్లు ఎక్కడానికి కూడా దీన్ని ఉపయోగిస్తున్నానని, ఇందులో ఎంతో థ్రిల్ ఉంటుందని తెలిపారు.

ధర ఎంత? ఎవరు నడపవచ్చు?

ఈ ఎలక్ట్రిక్ యూనిసైకిల్స్ ధర సుమారు రూ. 50,000 నుంచి రూ. 3.5 లక్షల వరకు ఉంటుందని రైడర్స్ వెల్లడించారు. అంతేకాకుండా, ప్రతి ఆదివారం ఆసక్తి ఉన్నవారికి దీన్ని నడపడం నేర్పించడానికి ప్రత్యేకంగా ఒక కమ్యూనిటీని కూడా నడుపుతున్నట్లు చెప్పారు.

ఈ వాహనాన్ని ఎవరు నడుపుతారని షెనాజ్ అడగగా.. "మా గ్రూప్‌లో ఐదేళ్ల చిన్నారి నుంచి 70 ఏళ్ల వృద్ధుల వరకు దీన్ని నడిపేవాళ్లు ఉన్నారు" అని ఆశ్చర్యకరమైన విషయం చెప్పారు.

"పెట్రోల్ ఖర్చు లేదు, పార్కింగ్ టెన్షన్ లేదు, ట్రాఫిక్‌లో ఇరుక్కుపోయే బాధ అసలే లేదు. బెంగళూరులో ఇది ఒక కొత్త ట్రెండ్" అని షెనాజ్ తన పోస్ట్ క్యాప్షన్‌లో రాసుకొచ్చారు. ఈ వీడియోపై నెటిజన్లు రకరకాలుగా స్పందిస్తున్నారు. ఒక పెద్ద గుంత పడితే ప్రమాదమని కొందరు హెచ్చరిస్తుంటే, మరికొందరు ఇది చూడటానికి ఎంతో సరదాగా ఉందని కామెంట్లు పెడుతున్నారు.

మీ డ్రైవింగ్ స్కిల్స్ మీద మీకు పూర్తి నమ్మకం ఉంటే, బెంగళూరు ట్రాఫిక్‌ను దాటేందుకు ఈ సింగిల్ వీల్ ఎలక్ట్రిక్ యూనిసైకిల్ ఒక అద్భుతమైన ప్రత్యామ్నాయం కావచ్చు!

 

View this post on Instagram

 

A post shared by Travel, Romance, Smiles (@shenaztreasury)