Symptoms Before Death | మరణానికి 24 గంటల ముందు మనిషిలో కనిపించే 3 ప్రధాన సంకేతాలు ఇవే..!

• ఆత్మీయుల భయాన్ని పోగొడుతూ 'నర్స్ జూలీ' వెల్లడించిన ఆసక్తికర నిజాలు

Symptoms Before Death | త్రినేత్ర న్యూస్ : పుట్టిన ప్రతి మనిషికి మరణం తప్పదు. కానీ, ఆ మాట వినగానే చాలామందిలో తెలియని ఆందోళన, భయం మొదలవుతాయి. ప్రపంచవ్యాప్తంగా దాదాపు 10 శాతం మంది 'డెత్ యాంగ్జైటీ' (మరణ భయం)తో బాధపడుతున్నారని పరిశోధనలు చెబుతున్నాయి. అందుకే వృద్ధాప్యాన్ని ఆపడానికి, ఆయుష్షు పెంచుకోవడానికి నేడు పెద్ద ఎత్తున ప్రయత్నాలు జరుగుతున్నాయి. అయితే, మరణం గురించి భయపడాల్సిన అవసరం లేదని, చివరి క్షణాల్లో శరీరంలో జరిగే మార్పులను అర్థం చేసుకుంటే ఆత్మీయులకు ప్రశాంతంగా వీడ్కోలు పలకవచ్చని అమెరికాకు చెందిన ప్రముఖ హాస్పిస్ నర్స్ జూలీ మెక్‌ఫాడెన్ (Nurse Julie) చెబుతున్నారు.

పాలియేటివ్ కేర్ (చివరి దశలో ఉన్న రోగులకు అందించే సేవలు) విభాగంలో 16 ఏళ్ల సుదీర్ఘ అనుభవం ఉన్న జూలీ.. తన అనుభవాలతో 'నథింగ్ టు ఫియర్: డీమిస్టిఫైయింగ్ డెత్ టు లివ్ మోర్ ఫుల్లీ' అనే పుస్తకాన్ని కూడా రాశారు. సోషల్ మీడియాలో లక్షలాది మంది ఫాలోవర్లు ఉన్న ఆమె, ఒక వ్యక్తి చనిపోవడానికి సరిగ్గా 24 గంటల ముందు కనిపించే మూడు సాధారణ లక్షణాలను వివరించారు.

మరణానికి 24 గంటల ముందు కనిపించే 3 ముఖ్య లక్షణాలు

1. గొంతులో వింత శబ్దం (The Death Rattle)

మరణానికి కొన్ని గంటల ముందు రోగి గొంతులో నుంచి ఒక రకమైన గురగుర శబ్దం (Gurgling sound) వస్తుంది. వైద్య పరిభాషలో దీనిని 'డెత్ ర్యాటిల్' అంటారు. చివరి దశలో ఉన్న వ్యక్తికి లాలాజలం (ఉమ్మి) మింగే శక్తి, దగ్గే శక్తి తగ్గిపోతాయి. దీనివల్ల గొంతు, శ్వాసనాళాల్లో ద్రవాలు పేరుకుపోతాయి. ఆ ద్రవాల గుండా గాలి వెళ్లినప్పుడు ఈ శబ్దం వస్తుంది. పక్కన ఉన్న కుటుంబ సభ్యులకు ఇది వినడానికి కొంచెం ఇబ్బందిగా అనిపించినా, ఇది మరణ ప్రక్రియలో ఒక సహజమైన భాగమని, దీనివల్ల రోగికి ఎలాంటి నొప్పి ఉండదని నర్స్ జూలీ స్పష్టం చేశారు.

2. శ్వాస తీసుకునే విధానంలో మార్పు (Agonal Breathing)

చివరి 24 గంటల్లో రోగి శ్వాస తీసుకోవడం చాలా నెమ్మదిగా, దీర్ఘంగా మారుతుంది. ఒక శ్వాసకు, మరో శ్వాసకు మధ్య కొన్ని సెకన్ల పాటు విరామం వస్తుంది. ఇది చూసి కుటుంబ సభ్యులు అప్పటికే ప్రాణం పోయిందేమోనని భావిస్తుంటారు. అలాగే మరణానికి అత్యంత చేరువలో ఉన్నప్పుడు 'అగోనల్ బ్రీతింగ్' (Agonal breathing) కనిపిస్తుంది. అంటే, శరీరానికి అవసరమైన ఆక్సిజన్ అందనప్పుడు మెదడు ఆక్సిజన్ కోసం ప్రయత్నించే క్రమంలో రోగి గాలి కోసం ఆయాసపడుతున్నట్లుగా (Desperate gasps) శ్వాస తీసుకుంటారు. ఇది చూడటానికి కష్టంగా ఉన్నా, ఈ సమయంలో రోగి ఎలాంటి బాధను అనుభవించడని పరిశోధకులు చెబుతున్నారు.

3. ఒకేచోట తదేకంగా చూస్తుండటం (The Death Stare)

చివరి క్షణాల్లో కొందరు రోగులు కళ్లు లేదా నోరు తెరిచి ఉంచుతారు. వారి కళ్లు ఒకేచోట స్థిరంగా, దేనినీ చూడనట్లుగా (Glazed and unfocused) ఉంటాయి. వైద్యపరంగా వారు ఇంకా శ్వాస తీసుకుంటూ బతికే ఉన్నప్పటికీ, అపస్మారక స్థితిలో (Unconscious) ఉంటారు. ఆ స్థితిలో వారిని నిద్రలేపడం సాధ్యం కాదు. అయితే, వారు స్పృహలో లేకపోయినా చుట్టుపక్కల ఉన్న ఆత్మీయుల మాటలను వినగలరని.. వారి స్పర్శను, ఉనికిని గ్రహించగలరని నర్స్ జూలీ తెలిపారు. కుటుంబ సభ్యులు తమ ప్రియమైన వారికి వీడ్కోలు చెప్పడానికి ఇది ఎంతో ప్రశాంతమైన సమయమని ఆమె పేర్కొన్నారు.

చివరి రోజుల్లో రోగులు ఏం మాట్లాడతారు? సమయాన్ని వారే ఎంచుకుంటారా?

16 ఏళ్ల తన అనుభవంలో రోగులు చనిపోయే ముందు తమ కుటుంబ సభ్యులు, స్నేహితుల పట్ల ప్రేమను, కృతజ్ఞతను వ్యక్తం చేయడం, పాత గొడవలను మర్చిపోయి క్షమాపణలు కోరడం తాను ఎన్నోసార్లు చూశానని జూలీ చెప్పారు.

అంతేకాదు, ఓ పాడ్‌కాస్ట్‌లో మాట్లాడుతూ ఆమె ఒక ఆసక్తికర విషయాన్ని పంచుకున్నారు. శాస్త్రీయంగా వివరించలేకపోయినప్పటికీ, కొందరు రోగులు తాము ఎప్పుడు చనిపోవాలో ముందే నిర్ణయించుకున్నట్లు ప్రవర్తిస్తారని తెలిపారు. ఇంట్లో ఏదైనా పెళ్లి లేదా ముఖ్యమైన వేడుక ముగిసే వరకు వేచి ఉండి.. ఆ తర్వాత ప్రాణాలు విడిచిన వారు ఎందరో ఉన్నారన్నారు. ఒక రోగి అయితే ఎలాంటి తీవ్ర లక్షణాలు లేకపోయినా, "నేను ఈరోజు సాయంత్రం చనిపోబోతున్నాను" అని తనతో చెప్పి, సరిగ్గా అదే సాయంత్రం తుదిశ్వాస విడిచారని గుర్తుచేసుకున్నారు.

అందరికీ ఒకేలా ఉండదు..

అయితే, మరణం అందరికీ ఒకేలా ఉండదని నర్స్ జూలీ స్పష్టం చేశారు. కొందరు చాలా వేగంగా లేదా హఠాత్తుగా ప్రాణాలు విడుస్తారని, మరికొందరిలో ఈ మార్పులు నెమ్మదిగా కనిపిస్తాయని వివరించారు. చివరి క్షణాల్లో జరిగే ఈ సహజ ప్రక్రియలపై అవగాహన ఉంటే, ఆత్మీయులు భయపడకుండా వారి చివరి ప్రయాణాన్ని ప్రశాంతంగా మార్చగలరని ఆమె సూచించారు.