Mallu Ravi Press Meet | యూపీఐ ట్యాక్స్ కాదు.. అది పూర్తిగా మోదీ ట్యాక్స్

• ఎంపీ మల్లు రవి ధ్వజం

Mallu Ravi Press Meet | త్రినేత్ర.న్యూస్ : దేశంలో డిజిటల్ పేమెంట్లను అలవాటు చేసి, ఇప్పుడు వాటిపై పన్నులు విధించడం మోదీ ప్రభుత్వ మోసపూరిత వైఖరికి నిదర్శనమని నాగర్‌కర్నూల్ ఎంపీ మల్లు రవి మండిపడ్డారు. హైదరాబాద్‌లోని గాంధీభవన్‌లో నిర్వహించిన మీడియా సమావేశంలో ఆయన కేంద్ర, మాజీ రాష్ట్ర ప్రభుత్వాలపై తీవ్రస్థాయిలో విమర్శలు గుప్పించారు. తెలంగాణ సాయుధ పోరాట చరిత్ర నుంచి నేటి రాజకీయ పరిణామాల వరకు పలు కీలక అంశాలపై ఆయన మాట్లాడారు.

సాయుధ పోరాటంతో బీజేపీకి సంబంధం ఏంటి?

తెలంగాణ సాయుధ పోరాటంతో బీజేపీకి ఎలాంటి సంబంధం లేదని మల్లు రవి స్పష్టం చేశారు. రజాకార్లకు వ్యతిరేకంగా సీపీఐ, సీపీఎం, కాంగ్రెస్ పార్టీలు సంయుక్తంగా సాయుధ పోరాటం నిర్వహించాయని గుర్తుచేశారు. పార్టీలకు అతీతంగా ప్రజలు సాగించిన ఈ పోరాటంలో ఎంతోమంది ప్రాణాలు కోల్పోయారని, విద్యార్థులు తమ చదువులను నష్టపోయారని తెలిపారు. ఆ పోరాటంలో తాను కూడా ఒక విద్యా సంవత్సరాన్ని కోల్పోయానని ఆయన భావోద్వేగంతో పంచుకున్నారు. అప్పట్లో ఈ పోరాటాన్ని గుర్తించిన నెహ్రూ.. సర్దార్ వల్లభాయ్ పటేల్‌ను హోంమంత్రిగా నియమించారని గుర్తుచేశారు.

డిజిటల్ ట్రాన్సాక్షన్లపై ట్యాక్స్ దారుణం

ప్రజలకు డిజిటల్ పేమెంట్స్‌ను అలవాటు చేసిన కేంద్ర ప్రభుత్వమే.. ఇప్పుడు వాటిపై కొత్తగా యూపీఐ ట్యాక్స్ విధించడంపై ఎంపీ తీవ్ర అభ్యంతరం వ్యక్తం చేశారు. "ఇది యూపీఐ ట్యాక్స్ కాదు.. పూర్తిగా మోదీ ట్యాక్స్. మోదీ పాలన చూసి ప్రజలు భయపడుతున్నారు" అని ఆయన విమర్శించారు. ఈ పన్ను విధానాన్ని వెంటనే రద్దు చేయాలని డిమాండ్ చేశారు.

కేసీఆర్ పాలనపై విమర్శల వర్షం

తెలంగాణను సోనియా గాంధీ ఇస్తే.. కేసీఆర్ మాత్రం పదేళ్ల పాటు ఫ్యూడల్, రాజరిక పాలన సాగించారని మల్లు రవి ఆరోపించారు. తెలంగాణ తెచ్చిపెట్టింది ప్రజల సంక్షేమం కోసమే కానీ, రాచరిక పోకడల కోసం కాదన్నారు. రాజరిక పరిపాలనకు ప్రతీకగానే ప్రగతి భవన్, సెక్రటేరియట్ కట్టించారని విమర్శించారు. కేసీఆర్ ఫామ్‌హౌస్‌పై రేవంత్ రెడ్డి ప్రభుత్వం విచారణకు ఆదేశించడంలో తప్పులేదని, తప్పు చేయనివారైతే విచారణకు ఎందుకు భయపడతారని ప్రశ్నించారు. బీఆర్ఎస్ పార్టీ ఎస్సీల వ్యతిరేక పార్టీ అని ఆయన మండిపడ్డారు.