Telangana Family Register Certificate | ఫ్యామిలీ రిజిస్టర్ సర్టిఫికెట్ తీసుకున్నారా? ఇంట్లో నుంచే అప్లై చేసుకోవచ్చు.. రూ.62 చెల్లిస్తే చాలు

• తెలంగాణ ప్రజల కోసం ఫ్యామిలీ రిజిస్టర్ సర్టిఫికెట్ అందుబాటులోకి
• దరఖాస్తు చేసిన రెండు రోజుల్లో సర్టిఫికెట్ జారీ
• కేవలం రూ.62 కే 'ఫ్యామిలీ రిజిస్టర్ సర్టిఫికెట్'
• ఇంట్లో నుంచే ఇలా అప్లై చేసుకోవచ్చు
• చివరి తేదీ ఎప్పుడు?

Telangana Family Register Certificate | తెలంగాణ (Telangana) రాష్ట్ర ప్రభుత్వం ప్రజల సౌకర్యార్థం మరో కీలక డాక్యుమెంట్‌ను అందుబాటులోకి తెచ్చింది. ఒక కుటుంబంలోని సభ్యులందరి వివరాలు అధికారికంగా ఒకే డిజిటల్ రికార్డులో ఉండేలా 'ఫ్యామిలీ రిజిస్టర్ సర్టిఫికెట్' (Family Register Certificate - FRC) జారీకి శ్రీకారం చుట్టింది.

రెవెన్యూ శాఖ జారీ చేసిన G.O. Ms. No. 172 ప్రకారం, జూలై 25, 2026 నుంచి ఈ సర్టిఫికెట్ల జారీ అధికారికంగా ప్రారంభమైంది. దీనికి నిర్దిష్టమైన గడువు (Deadline) ఏదీ లేదు. అత్యంత తక్కువ ఫీజుతో (రూ.40 నుంచి రూ.62), కేవలం రెండు రోజుల్లోనే ఈ సర్టిఫికెట్‌ను మీసేవ (MeeSeva) ద్వారా పొందవచ్చు.

ఈ సర్టిఫికెట్ ఎవరికి ఇస్తారు? ఏముంటాయి?

అందరికీ ఈ సర్టిఫికెట్ లభించదు. ప్రస్తుతం యాక్టివ్ తెలంగాణ రేషన్ కార్డు (Food Security Card) ఉన్న కుటుంబాలు మాత్రమే దరఖాస్తు చేసుకోవడానికి అర్హులు. కార్డులో పేరున్న మేజర్ (వయోజనులు) మాత్రమే అప్లై చేయాలి.

సర్టిఫికెట్‌లో ఉండే వివరాలు

కుటుంబ సభ్యులందరి పేర్లు, వారితో ఉన్న బంధం (Relationships), జెండర్, పుట్టిన తేదీలు (Dates of birth), ఆధార్ నంబర్లు (Aadhaar numbers), నివాస చిరునామా ఉంటాయి.

ఎలక్షన్ కమిషన్ ఇటీవల చేపట్టిన స్పెషల్ ఇంటెన్సివ్ రివిజన్ (SIR) ఓటర్ల నమోదు ప్రక్రియలో దీనిని ఒక వాలిడ్ డాక్యుమెంట్‌గా అంగీకరించారు. అయితే, ఇది ఆస్తి హక్కులను లేదా వారసత్వాన్ని నిర్ధారించే పత్రం కాదు. అలాగే ప్రభుత్వ సంక్షేమ పథకాలు పొందడానికి ఇది ఆటోమేటిక్ గ్యారెంటీ కూడా కాదు.

ఆన్‌లైన్‌లో అప్లై చేసుకునే విధానం (Step-by-Step Process)

మీ దగ్గర్లోని మీసేవ (MeeSeva Centre) కేంద్రానికి వెళ్లి నేరుగా దరఖాస్తు చేసుకోవచ్చు. లేదా మీ మొబైల్/కంప్యూటర్ నుంచి మీసేవ ఆన్‌లైన్ పోర్టల్ ద్వారా ఇలా ఈజీగా అప్లై చేసుకోవచ్చు.

స్టెప్ 1: అకౌంట్ క్రియేషన్ (Account Creation)

ముందుగా అధికారిక తెలంగాణ మీసేవ పోర్టల్ ఓపెన్ చేయండి. (https://ts.meeseva.telangana.gov.in/)

లాగిన్ పేజీలో "New User" ఆప్షన్ పై క్లిక్ చేయండి.

మీకు నచ్చిన Login ID, పాస్‌వర్డ్ క్రియేట్ చేసుకోండి. ఆ తర్వాత మీ మొబైల్ నంబర్, ఈమెయిల్ ఐడీ, పేరు, ఇంటి అడ్రస్ ఎంటర్ చేయండి.

మీ ఫోన్‌కు వచ్చే ఓటీపీ (OTP) ద్వారా వెరిఫై చేసుకుని లాగిన్ అవ్వండి.

స్టెప్ 2: సర్వీస్ ఎంపిక (Locating the Service)

లాగిన్ అయ్యాక, "Revenue Department Services" కేటగిరీలోకి వెళ్లండి.

అక్కడ లిస్ట్‌లో కనిపించే "Telangana Family Register Certificate" సర్వీస్‌పై క్లిక్ చేయండి.

స్టెప్ 3: అప్లికేషన్ నింపడం (Filling Details)

మీ యాక్టివ్ రేషన్ కార్డు నంబర్ ఎంటర్ చేయండి. సివిల్ సప్లైస్ డేటాబేస్ నుంచి ఆటోమేటిక్‌గా మీ కుటుంబ వివరాలు స్క్రీన్ పై కనిపిస్తాయి.

దరఖాస్తుదారుడి పేరును (Applicant Name) సెలెక్ట్ చేసుకోండి. ఆటోమేటిక్‌గా వచ్చిన పేర్లు, వయసు, ఆధార్ వివరాలు కరెక్ట్‌గా ఉన్నాయో లేదో ఒకసారి చెక్ చేసుకోండి.

స్టెప్ 4: డాక్యుమెంట్ల అప్‌లోడ్, పేమెంట్ (Upload & Payment)

మీ రేషన్ కార్డు, కుటుంబ సభ్యులందరి ఆధార్ కార్డులను స్పష్టంగా స్కాన్ చేసి అప్‌లోడ్ (Upload) చేయండి.

నెట్ బ్యాంకింగ్, డెబిట్/క్రెడిట్ కార్డ్ లేదా UPI ద్వారా నిర్ణీత ఫీజు (రూ.40-రూ.62) చెల్లించండి.

పేమెంట్ పూర్తయ్యాక వచ్చే 'అప్లికేషన్ నంబర్'ను స్టేటస్ ట్రాకింగ్ కోసం జాగ్రత్తగా రాసిపెట్టుకోండి.

స్టెప్ 5: సర్టిఫికెట్ జారీ (Processing & Collection)

మీ అప్లికేషన్ ఆన్‌లైన్ ద్వారా నేరుగా మీ ఏరియా తహశీల్దార్‌కు (MRO) వెళ్తుంది. వారు డాక్యుమెంట్లను డిజిటల్‌గా వెరిఫై చేస్తారు. 2 పనిదినాల్లో సర్టిఫికెట్ జనరేట్ అవుతుంది. ఆమోదం లభించిన తర్వాత.. డిజిటల్ సంతకంతో కూడిన PDF కాపీని మీ మీసేవ డాష్‌బోర్డ్ నుంచి నేరుగా డౌన్‌లోడ్ (Download) చేసుకోవచ్చు. లేదంటే ఏదైనా మీసేవా కేంద్రానికి వెళ్లి అప్లికేషన్ నంబర్ చెబితే ప్రింట్ చేసి ఇస్తారు.