Sangareddy Elderly Couple Suicide | తీవ్ర విషాదం: ముగ్గురు కొడుకులున్నా ఆదరణ కరవు.. బావిలో దూకి వృద్ధ దంపతుల ఆత్మహత్య
ఆస్తి మొత్తం రాసిచ్చినా కనికరించని కొడుకులు.. ఇంట్లోంచి గెంటేయడంతో అద్దె గదిలో ఉంటూ బావిలో దూకి ప్రాణాలు తీసుకున్న వృద్ధ దంపతులు.
సంక్షిప్త సారాంశం
సంగారెడ్డి జిల్లా నారాయణఖేడ్ మండలం చాప్టా(కె) గ్రామంలో నర్సారెడ్డి, అంజమ్మ దంపతులు బావిలో దూకి బలవన్మరణం చెందారు. ముగ్గురు కొడుకులు ఉన్నప్పటికీ, గ్రామంలో ఉండే ఇద్దరు కుమారులు వృద్ధ తల్లిదండ్రులను ఇంట్లోంచి వెళ్లగొట్టడంతో వారు అద్దె ఇంట్లో జీవనం సాగిస్తున్నారు. తమకున్న వ్యవసాయ భూమిని మొదటి, మూడో కొడుకుల పిల్లల పేరిట రాసిచ్చినప్పటికీ ఆదరణ కరువై తీవ్ర మనస్తాపానికి గురయ్యారు. బుధవారం ఉదయం బావిలో తేలిన మృతదేహాలను పోలీసులు వెలికితీసి, కేసు నమోదు చేసి దర్యాప్తు ప్రారంభించారు.
Sangareddy Elderly Couple Suicide | త్రినేత్ర న్యూస్ : కనిపెంచి, ప్రయోజకులను చేసి, ఉన్న భూమినంతా రాసిచ్చినా.. కన్న కొడుకులే మొహం చాటేయడంతో ఆ వృద్ధ దంపతులు తీవ్ర మనోవేదనకు గురయ్యారు. చివరకు జీవితంపై విరక్తి చెంది తమ సొంత పొలంలోని బావిలోనే దూకి తనువు చాలించారు. సంగారెడ్డి జిల్లా నారాయణఖేడ్ మండలం చాప్టా(కె) గ్రామంలో ఈ హృదయ విదారక ఘటన చోటుచేసుకుంది.
గ్రామానికి చెందిన నర్సారెడ్డి, ఆయన భార్య అంజమ్మలకు ముగ్గురు కుమారులు (సిద్ధారెడ్డి, కిష్టారెడ్డి, సంగారెడ్డి). రెండో కుమారుడు కిష్టారెడ్డి హైదరాబాద్లో ఉద్యోగం చేస్తూ నివాసముంటుండగా, మిగిలిన ఇద్దరు కొడుకులు గ్రామంలోనే స్థిరపడ్డారు.
ఇంట్లోంచి గెంటేసి.. అద్దె కొంపలోకి నెట్టి..
వృద్ధ దంపతులు తమ పేరిట ఉన్న వ్యవసాయ భూమిని మొదటి, మూడో కొడుకుల పిల్లలకే రాసిచ్చారు. అయినా కూడా ఆ ఇద్దరు కుమారులు కనికరం లేకుండా తల్లిదండ్రులను సొంత ఇంటి నుంచే గెంటేశారు. దీంతో దిక్కుతోచని స్థితిలో ఆ వృద్ధులు అదే గ్రామంలో ఒక చిన్న అద్దె ఇంట్లో తలదాచుకుంటున్నారు. హైదరాబాద్లో ఉండే రెండో కొడుకు కిష్టారెడ్డి వీరికి కొంతమేర పోషణ ఖర్చులు చూస్తున్నప్పటికీ, తోడుగా ఉండాల్సిన సొంతూరి కొడుకులు కనీసం పలకరించకపోవడం వారిని కుంగదీసింది.
గతంలో తమను పట్టించుకోవడం లేదని కుమారులపై వీరు స్థానిక పోలీస్ స్టేషన్లో కూడా ఫిర్యాదు చేశారు. అయినా కుటుంబంలో ఎలాంటి మార్పు రాలేదు. తమ రక్తమే తమను పరాయివారిగా చూడటాన్ని జీర్ణించుకోలేకపోయారు.
వ్యవసాయ బావిలోనే విషాదాంతం
తీవ్ర మనస్తాపానికి గురైన దంపతులు రాత్రి వేళ తమ వ్యవసాయ పొలం వద్దకు చేరుకుని బావిలోకి దూకారు. బుధవారం ఉదయం బావిలో మృతదేహాలు తేలడాన్ని గమనించిన గ్రామస్థులు తీవ్ర దిగ్భ్రాంతికి గురై వెంటనే పోలీసులకు సమాచారం అందించారు.
సర్కిల్ ఇన్స్పెక్టర్ శ్రీనివాస్ రెడ్డి ఘటనా స్థలానికి చేరుకుని వివరాలు సేకరించారు. స్థానికుల సహకారంతో మృతదేహాలను వెలికితీసి, పోస్టుమార్టం కోసం నారాయణఖేడ్ ఏరియా ఆసుపత్రికి తరలించారు. ఈ ఘటనపై పోలీసులు కేసు నమోదు చేసి దర్యాప్తు ముమ్మరం చేశారు. ముగ్గురు కొడుకులుండి కూడా అనాథల్లా చనిపోయిన వృద్ధ దంపతుల ఉదంతం స్థానికంగా అందరినీ కంటతడి పెట్టించింది.
ట్యాగ్స్:
తాజావార్తలు
- ●BRS Party | 22న ఓరుగల్లులో బీఆర్ఎస్ బహిరంగ సభ..!
- ●Tenth Exam Fee | టెన్త్ విద్యార్థులకు అలర్ట్.. పది పరీక్షల ఫీజు గడువు పొడిగింపు
- ●Yadagirigutta | యాదగిరిగుట్టలో 20 నుంచి కార్తికోత్సవాలు
- ●Heavy Rain | 20న తెలంగాణలో అతి భారీ వర్షం..! జర జాగ్రత్త..!!
- ●Horoscope | నవంబర్ 17 రాశిఫలాలు.. ఈ రాశి వారు ఏ పని చేపట్టినా విజయం తథ్యం..!
- ●Telangana Employees JAC | తెలంగాణ ఉద్యోగుల జేఏసీ భేటీ: ఓపీఎస్ పునరుద్ధరణ, 2వ పీఆర్సీ అమలు సహా 41 ప్రధాన డిమాండ్లు ఇవే!

BRS Party | 22న ఓరుగల్లులో బీఆర్ఎస్ బహిరంగ సభ..!

Tenth Exam Fee | టెన్త్ విద్యార్థులకు అలర్ట్.. పది పరీక్షల ఫీజు గడువు పొడిగింపు

Yadagirigutta | యాదగిరిగుట్టలో 20 నుంచి కార్తికోత్సవాలు

Heavy Rain | 20న తెలంగాణలో అతి భారీ వర్షం..! జర జాగ్రత్త..!!





