Maremma | రవితేజ మేనల్లుడి ‘మరెమ్మ’కు ‘ఏ’ సర్టిఫికెట్‌.. విడుదల ఎప్పుడంటే?

Maremma | మాస్‌ మహారాజా రవితేజ మేనల్లుడు మాధవ్‌ భూపతిరాజు హీరోగా నటించిన తాజా చిత్రం ‘మరెమ్మ’. గ్రామీణ నేపథ్యంలో తెరకెక్కిన ఈ రూరల్‌ డ్రామా థియేటర్లలో సందడి చేసేందుకు సిద్ధమైంది. మంచాల నాగరాజ్‌ దర్శకత్వం వహించిన ఈ సినిమా సెప్టెంబర్‌ 10న ప్రేక్షకుల ముందుకు రానుంది. ఇప్పటికే విడుదలైన ట్రైలర్‌ సినిమాపై ఆసక్తిని పెంచింది. రా, ఇంటెన్స్‌ టేకింగ్‌తో రూపొందిన ట్రైలర్‌లోని సన్నివేశాలు సినిమాపై మంచి బజ్‌ను తీసుకొచ్చాయి.

‘ఏ’ సర్టిఫికెట్‌..

‘మరెమ్మ’ సినిమాకు సెన్సార్‌ బోర్డు ‘ఏ’ సర్టిఫికెట్‌ జారీ చేసింది. సినిమాలోని కథాంశం, గ్రిటీ కంటెంట్‌, ఇంటెన్స్‌ ట్రీట్‌మెంట్‌ కారణంగా ఈ సర్టిఫికేషన్‌ వచ్చినట్లు తెలుస్తోంది. ఇప్పటికే వచ్చిన పోస్టర్లు, టీజర్‌, ట్రైలర్‌ సైతం సినిమా సాధారణ కమర్షియల్‌ ఎంటర్‌టైనర్‌ కాదని స్పష్టం చేశాయి. కథను మరింత రా అండ్‌ హార్డ్‌ హిట్టింగ్‌గా చూపించడంతో ‘ఏ’ సర్టిఫికెట్‌ రావడం ఆశ్చర్యకరం కాదనే అభిప్రాయం వ్యక్తమవుతోంది. పల్లెటూరి వాతావరణం, అక్కడి పరిస్థితులను ఆధారంగా చేసుకుని ‘మరెమ్మ’ను రూపొందించినట్లు ప్రమోషనల్‌ కంటెంట్‌ ద్వారా తెలుస్తోంది. మాధవ్‌ భూపతిరాజు ఈ చిత్రంలో విభిన్నమైన పాత్రలో కనిపించనున్నాడు. దీపా బాలు కథానాయికగా నటించగా.. వికాస్‌ వశిష్ట, వినోద్‌ కుమార్‌, వీఎస్‌ రూపలక్ష్మి, దయానంద్‌ రెడ్డి తదితరులు కీలక పాత్రలు పోషించారు.

ఆస‌క్తిని పెంచిన ట్రైల‌ర్‌..

మయూర్‌ రెడ్డి బండారు నిర్మించిన ఈ చిత్రానికి భీమ్స్‌ సిసిరోలియో సంగీతం అందించాడు. ఇప్పటికే ట్రైలర్‌ ద్వారా సినిమాపై ఆసక్తి పెరగడంతో.. థియేట్రికల్‌ రిలీజ్‌పై అంచనాలు నెలకొన్నాయి. ముఖ్యంగా రూరల్‌ బ్యాక్‌డ్రాప్‌లో సాగే కథను దర్శకుడు ఎంత బలంగా తెరపై ఆవిష్కరించాడనేది ఆసక్తికరంగా మారింది. ‘ఏ’ సర్టిఫికెట్‌తో ప్రేక్షకుల ముందుకు వస్తున్న ‘మరెమ్మ’.. సెప్టెంబర్‌ 10న థియేటర్లలో విడుదల కానుంది. ట్రైలర్‌లో కనిపించిన రా, ఇంటెన్స్‌ ట్రీట్‌మెంట్‌ను పూర్తి సినిమాలోనూ కొనసాగిస్తే ప్రేక్షకుల నుంచి ఎలాంటి స్పందన వస్తుందనేది చూడాలి.