Medaram Jatara 2026 Hundi Collection | మేడారం హుండీల్లో కానుకల వర్షం: 6 రోజుల్లోనే రూ. 12.64 కోట్లు.. ఇంకా లెక్కతేలని బంగారం..!

Medaram Jatara 2026 Hundi Collection | త్రినేత్ర.న్యూస్ : తెలంగాణ కుంభమేళాగా ప్రసిద్ధి చెందిన మేడారం సమ్మక్క-సారక్క జాతర-2026 (Medaram Jatara 2026) హుండీ లెక్కింపు ప్రక్రియ జోరుగా సాగుతోంది. భక్తులు మొక్కుల రూపంలో సమర్పించిన కానుకలను హనుమకొండలోని టీటీడీ కల్యాణ మండపంలో దేవాదాయ శాఖ అధికారులు లెక్కిస్తున్నారు. గడిచిన ఆరు రోజుల్లోనే రికార్డు స్థాయిలో ఆదాయం సమకూరింది.

మొత్తం 828 హుండీలు - రూ.12.64 కోట్లు

జాతర సందర్భంగా మొత్తం 828 హుండీలను ఏర్పాటు చేశారు. ఇందులో 780 ఇనుప హూండీలు, 45 వస్త్ర హూండీలు, 3 బియ్యం హూండీలు ఉన్నాయి. ఇప్పటివరకు ఈ హుండీలన్నింటినీ తెరిచి లెక్కించగా, మొత్తం రూ.12,64,67,051 (పన్నెండు కోట్ల అరవై నాలుగు లక్షల పైచిలుకు) ఆదాయం వచ్చినట్లు అధికారులు అధికారికంగా ప్రకటించారు.

రోజువారీగా వచ్చిన ఆదాయం వివరాలు ఇలా ఉన్నాయి:

• ఫిబ్రవరి 5: రూ. 2,49,65,000 (125 హూండీలు)
• ఫిబ్రవరి 6: రూ. 3,54,25,200 (160 హూండీలు)
• ఫిబ్రవరి 7: రూ. 2,01,21,440 (140 హూండీలు)
• ఫిబ్రవరి 8: రూ. 2,64,75,757 (200 హూండీలు)
• ఫిబ్రవరి 9: రూ. 1,12,63,000 (163 హూండీలు)
• ఫిబ్రవరి 10: రూ. 80,81,935 (40 హూండీలు)

ఇంకా లెక్కతేలని బంగారం, వెండి

ప్రస్తుతం కేవలం నోట్ల లెక్కింపు మాత్రమే పూర్తయ్యింది. భక్తులు సమర్పించిన బంగారం, వెండి కానుకలను వేరు చేసి ప్రత్యేక ఇనుప హుండీలలో భద్రపరిచారు. వాటి విలువ నిర్ధారణ (Appraisement) ప్రక్రియ ఇంకా కొనసాగుతోంది. అలాగే, చిల్లర నాణేలు (Coins), ఈ-హుండీ (E-Hundi) ద్వారా వచ్చిన ఆదాయాన్ని ఇంకా లెక్కించలేదని అధికారులు స్పష్టం చేశారు. ఇవన్నీ కలిపితే జాతర మొత్తం ఆదాయం భారీగా పెరిగే అవకాశం ఉంది.

పారదర్శకంగా లెక్కింపు

సీసీ కెమెరాల నిఘాలో, సేవా సమితి సభ్యులు, దేవాదాయ శాఖ ఉన్నతాధికారుల పర్యవేక్షణలో లెక్కింపు ప్రక్రియ అత్యంత పారదర్శకంగా జరుగుతోంది. ఫిబ్రవరి 10న లెక్కించిన రూ.80 లక్షల నగదును వెంటనే బ్యాంకు అధికారులకు అప్పగించినట్లు అధికారులు తెలిపారు.