అసెంబ్లీ గేటు నుంచి ఎర్రవల్లి వరకు.. అసెంబ్లీ ఎజెండా ఎలా మారిపోయింది? ప్రజా సమస్యలు కాదు.. నేతల భావోద్వేగాలకే ప్రాధాన్యం!

భావోద్వేగాల చుట్టూ అసెంబ్లీ రాజకీయం.. ప్రజా ఎజెండా వెనక్కి!

గేటు వద్ద రభస నుంచి స్పీకర్ వివాదం వరకు..

ఎర్రవల్లి టెన్షన్‌తో మారిపోయిన రెండు రోజుల రాజకీయ ఎజెండా

 

తెలంగాణ అసెంబ్లీ సమావేశాల తొలి రెండు రోజుల్లో రాజకీయ ఎజెండా వేగంగా మారిపోయింది. ప్రభుత్వ పాలన, హామీల అమలు, ప్రజా సమస్యలపై అధికార–ప్రతిపక్షాలు తలపడాల్సిన సమయంలో అరెస్టులు, వ్యక్తిగత వ్యాఖ్యలు, అవమానాల ఆరోపణలు, ఆవేదనలు, నేతల ఇళ్ల వద్ద నిరసనలు ప్రధాన చర్చగా మారాయి. కాంగ్రెస్, బీఆర్ఎస్ రెండూ తమకు ఎదురైన పరిణామాలను రాజకీయ అస్త్రాలుగా మలుచుకోవడంతో ప్రజా సమస్యలు ప్రధాన చర్చలో వెనక్కి వెళ్లాయి.

ప్రజా సమస్యలతో వచ్చిన బీఆర్ఎస్.. గేటు దగ్గరే మారిన ఎజెండా

కాంగ్రెస్ ప్రభుత్వ 1,000 రోజుల పాలనను లక్ష్యంగా చేసుకుని బీఆర్ఎస్ తొలి రోజు నల్ల టీషర్టులతో అసెంబ్లీకి వచ్చింది. 22-A భూములు, రైతుల సమస్యలు, సాగునీరు, ప్రభుత్వ హామీల అమలు సహా పలు అంశాలను సభలో లేవనెత్తాలని ఆ పార్టీ ముందుగానే నిర్ణయించింది. అయితే టీషర్టులపై ఉన్న నినాదాలపై పోలీసులు అభ్యంతరం వ్యక్తం చేసి నేతలను గేటు వద్ద అడ్డుకోవడంతో వాగ్వాదం, తోపులాట చోటుచేసుకున్నాయి. కేటీఆర్, హరీశ్‌రావు సహా పలువురు నేతలను పోలీసులు అదుపులోకి తీసుకున్నారు. ఈ సందర్భంగా పోలీసులు తన జుట్టు పట్టుకుని లాగారని సబితా ఇంద్రారెడ్డి, తన చీర పట్టుకుని లాగారని సునీతా లక్ష్మారెడ్డి ఆరోపించారు. దీంతో మహిళా ఎమ్మెల్యేల పట్ల పోలీసుల వ్యవహారం కూడా మరో రాజకీయ వివాదంగా మారింది. ఇక్కడే బీఆర్ఎస్ తీసుకొచ్చిన అసలు ఎజెండాకు మొదటి బ్రేక్ పడింది. ప్రభుత్వాన్ని ప్రజా సమస్యలపై ప్రశ్నించాల్సిన చోట ప్రతిపక్షాన్ని ఎందుకు అడ్డుకున్నారు? పోలీసుల వ్యవహారం ఎలా ఉంది? అన్న అంశాలు ముందుకొచ్చాయి. రాజకీయంగా బీఆర్ఎస్‌కు మరో అస్త్రం దొరికినా, ప్రజా సమస్యలపై ప్రభుత్వాన్ని సభలో నిలదీయాలన్న అసలు వ్యూహం మాత్రం వెనక్కి వెళ్లింది.

స్పీకర్ వివాదంతో మారిపోయిన ఫోకస్

గేటు వద్ద నిరసన సమయంలో బీఆర్ఎస్ ఎమ్మెల్సీ తాతా మధుసూదన్ చేసినట్లు ఆరోపణలు వచ్చిన వ్యాఖ్యలు రాజకీయాన్ని మరో మలుపు తిప్పాయి. తనను, తన తల్లిని ఉద్దేశించి అభ్యంతరకర వ్యాఖ్యలు చేశారని స్పీకర్ గడ్డం ప్రసాద్ కుమార్ ఆవేదన వ్యక్తం చేశారు. కాంగ్రెస్ దీనిపై తీవ్రంగా స్పందించింది. మధుసూదన్ మాత్రం తాను స్పీకర్‌ను ఉద్దేశించి ఆ వ్యాఖ్యలు చేయలేదని వివరణ ఇచ్చారు. దీంతో పోలీసుల చర్యలపై సాగుతున్న చర్చ ఒక్కసారిగా స్పీకర్ గౌరవం, వ్యక్తిగత వ్యాఖ్యలు, వాటిపై చర్య వైపు మళ్లింది. కాంగ్రెస్‌కు బీఆర్ఎస్ వ్యవహారశైలిని ప్రశ్నించే అవకాశం దొరికితే, బీఆర్ఎస్ మాత్రం తమపై ప్రభుత్వం రాజకీయ కక్షతో వ్యవహరిస్తోందనే వాదనను ముందుకు తీసుకొచ్చింది. అంటే మొదటి రోజు మొదలవ్వాల్సిన ప్రజా సమస్యల ఎజెండా.. కాస్తా పోలీసుల చర్యల మీదుగా వ్యక్తిగత వ్యాఖ్యల వివాదం వైపు మళ్లిపోయింది.

ఎమ్మెల్సీల అరెస్టులతో మరింత వేడి

ఈ వివాదం రెండో రోజు పోలీసు కేసులు, అరెస్టుల వరకు వెళ్లింది. స్పీకర్‌పై అభ్యంతరకర వ్యాఖ్యలు చేశారన్న ఫిర్యాదు నేపథ్యంలో బీఆర్ఎస్ ఎమ్మెల్సీలు తాతా మధుసూదన్, నవీన్ కుమార్ రెడ్డిని సైఫాబాద్ పోలీసులు అరెస్టు చేశారు. ఎస్సీ, ఎస్టీ అట్రాసిటీస్ చట్టంతో పాటు బీఎన్ఎస్‌లోని సంబంధిత సెక్షన్ల కింద కేసు నమోదైంది.
కాంగ్రెస్ ఈ వ్యవహారాన్ని స్పీకర్ పదవి గౌరవంతో ముడిపెడితే, బీఆర్ఎస్ అరెస్టులను రాజకీయ కక్ష సాధింపుగా అభివర్ణించింది. దీంతో రెండో రోజు కూడా ప్రభుత్వ విధానాలు, ప్రజా సమస్యల కంటే ఈ వివాదమే రాజకీయంగా పైచేయి సాధించింది.

అసెంబ్లీ నుంచి ఎర్రవల్లికి చేరిన రాజకీయం

ఇంతలో అసెంబ్లీ రాజకీయ వేడి కేసీఆర్ ఎర్రవల్లి నివాసం వరకు చేరింది. స్పీకర్‌పై చేసినట్లు ఆరోపణలు ఎదుర్కొంటున్న వ్యాఖ్యలను నిరసిస్తూ కాంగ్రెస్ ఎస్సీ సెల్ కేసీఆర్ నివాసం ముట్టడికి పిలుపునిచ్చింది. శాంతిభద్రతల దృష్ట్యా పోలీసులు ఎర్రవల్లి పరిసరాల్లో ఆంక్షలు విధించి భారీ బందోబస్తు ఏర్పాటు చేశారు. ఇదే సమయంలో కాంగ్రెస్ ఎమ్మెల్యే వీర్లపల్లి శంకర్ కేసీఆర్ నివాసం వద్ద 'చావు డప్పు' కొడతామంటూ చేసిన పరుషపదజాలంతో కూడిన వ్యాఖ్యలు మరో వివాదానికి కారణమయ్యాయి. బీఆర్ఎస్ దీనిపై తీవ్రంగా స్పందించింది. మరోవైపు ఎర్రవల్లి వెళ్లేందుకు ప్రయత్నించిన కేటీఆర్, హరీశ్‌రావు తదితర బీఆర్ఎస్ నేతలను పోలీసులు అడ్డుకోవడంతో ఉద్రిక్తత మరింత పెరిగింది. ఇక్కడ రాజకీయ కేంద్రం మరోసారి మారింది. ప్రభుత్వ పనితీరు వర్సెస్ ప్రతిపక్షంగా మొదలైన పోరు కాస్తా కాంగ్రెస్ వర్సెస్ కేసీఆర్ గా మారింది. కాంగ్రెస్‌కు స్పీకర్‌పై వ్యాఖ్యలు నిరసనకు కేంద్రంగా మారితే, బీఆర్ఎస్‌కు తమ అధినేతను లక్ష్యంగా చేసుకుంటున్నారనే అంశం రాజకీయ అస్త్రంగా మారింది.

ఇద్దరికీ అస్త్రాలు.. ప్రజా ఎజెండా మాత్రం వెనక్కి

రెండు రోజుల పరిణామాలను రాజకీయంగా చూస్తే కాంగ్రెస్, బీఆర్ఎస్ రెండింటికీ ఎదురుదాడి చేసుకునేందుకు అంశాలు దొరికాయి. స్పీకర్‌పై వ్యాఖ్యలతో బీఆర్ఎస్‌ను ప్రశ్నించే అవకాశం కాంగ్రెస్‌కు వచ్చింది. పోలీసుల చర్యలు, మహిళా ఎమ్మెల్యేల ఆరోపణలు, ఎమ్మెల్సీల అరెస్టులు, కేసీఆర్ నివాసం వద్ద నిరసనలను చూపిస్తూ ప్రభుత్వంపై దాడి చేసే అవకాశం బీఆర్ఎస్‌కు లభించింది. కానీ అసెంబ్లీ ప్రారంభానికి ముందు చర్చకు రావాల్సిన అంశాల జాబితా మాత్రం వేరుగా ఉంది. 22-A భూములు, ఫీజు రీయింబర్స్‌మెంట్, రైతు సమస్యలు, సాగునీరు, ప్రభుత్వ 1,000 రోజుల పనితీరు వంటి అంశాలపై అధికార–ప్రతిపక్షాలు తలపడతాయని అంచనా ఏర్పడింది. రెండు రోజుల తర్వాత చూస్తే రాజకీయ కేంద్రం మాత్రం ప్రజా సమస్యల బదులు, పోలీసుల చర్యలు, మహిళా ఎమ్మెల్యేల ఆరోపణలు, స్పీకర్ వివాదం, ఎమ్మెల్సీల అరెస్టులు , కేసీఆర్ నివాసం వద్ద నిరసనలు గా మారిపోయింది. ఇందులో కాంగ్రెస్‌కు తన వాదన ఉంది. బీఆర్ఎస్‌కు తన వాదన ఉంది. రెండు పార్టీలు తమకు అనుకూలమైన పరిణామాలను రాజకీయంగా ముందుకు తీసుకెళ్లాయి. అయితే ఈ పరస్పర పోరులో ప్రజా సమస్యలపై జరగాల్సిన విధానపరమైన చర్చకు దక్కాల్సిన స్థలం తగ్గిపోయింది. నాయకుల వ్యాఖ్యలు, అవమానాల ఆరోపణలు, ఆవేదనలు, అరెస్టులు రెండు రోజుల రాజకీయ హెడ్‌లైన్లను ఆక్రమించగా.. ప్రజల సమస్యలు మాత్రం అసెంబ్లీ అజెండాలో ఉన్నంతగా రాజకీయ చర్చలో కనిపించలేదు. తొలి రెండు రోజుల తెలంగాణ అసెంబ్లీ పరిణామాల్లో కనిపించిన ప్రధాన వైరుధ్యం ఇదే.

 

[