Ayodhya Ram Temple Donation Theft | పాపం మహమ్మద్ గజనీ భారతదేశంపై దండెత్తి దోచుకుంది కేవలం 17 సార్లే

అయోధ్య రామాలయంలో ఏకంగా 105 సార్లు విరాళాల చోరీ! నిందితులను గుర్తించినట్లు సుప్రీంకోర్టుకు తెలిపిన సిట్.. బీఆర్ఎస్ నేత సెటైరికల్ ట్వీట్ వైరల్.

Jagadeesh

Telangana | Published On Sep 21, 2026, 7.00 pm IST

Ayodhya Ram Temple Donation Theft | పాపం మహమ్మద్ గజనీ భారతదేశంపై దండెత్తి దోచుకుంది కేవలం 17 సార్లే

సంక్షిప్త సారాంశం

అయోధ్యలోని ప్రతిష్టాత్మక రామాలయంలో భక్తులు సమర్పించిన విరాళాలు ఏకంగా 105 సార్లు చోరీకి గురైనట్లు ప్రత్యేక దర్యాప్తు బృందం (SIT) సుప్రీంకోర్టుకు వెల్లడించింది. ఆలయంలోని సీసీటీవీ (CCTV) ఫుటేజ్ ఆధారంగా దొంగతనాలకు పాల్పడిన నిందితులను గుర్తించినట్లు సిట్ అధికారులు కోర్టుకు తెలిపారు. ఈ కేసు విచారణ తుది దశకు చేరిందని, సెప్టెంబర్ 25 నాటికి చార్జ్‌షీట్ దాఖలు చేస్తామని సొలిసిటర్ ద్వారా కోర్టుకు స్పష్టం చేశారు. ఈ వ్యవహారంపై బీఆర్ఎస్ నేత కార్తీక్ ఇంద్రారెడ్డి స్పందిస్తూ.. గజనీ మహమ్మద్ కూడా భారత్‌పై 17 సార్లే దండెత్తాడంటూ తీవ్రంగా సెటైర్ వేశారు.

అయోధ్య రాముడి హుండీకే ఎసరు
105 సార్లు విరాళాల చోరీ
సుప్రీంకోర్టుకు సిట్ షాకింగ్ రిపోర్ట్
సెప్టెంబర్ 25న ఛార్జ్‌షీట్
రాజకీయ వర్గాల నుంచి తీవ్ర విమర్శలు

Ayodhya Ram Temple Donation Theft | త్రినేత్ర.న్యూస్ : దేశవ్యాప్తంగా కోట్ల మంది భక్తుల కొంగుబంగారమైన అయోధ్య రామాలయంలో విరాళాల దొంగతనం వ్యవహారం తీవ్ర సంచలనం రేపుతోంది. ఆలయానికి భక్తులు సమర్పించిన కానుకలు, విరాళాలు ఏకంగా 105 సార్లు చోరీకి గురైనట్లు వెలుగుచూసింది. ఈ కేసును విచారిస్తున్న ప్రత్యేక దర్యాప్తు బృందం (SIT) స్వయంగా సుప్రీంకోర్టుకు సమర్పించిన నివేదికలో ఈ దిగ్భ్రాంతికర వివరాలను వెల్లడించింది.

సీసీటీవీల్లో రికార్డ్.. నిందితుల గుర్తింపు

ఆలయ ప్రాంగణంలో భద్రతా లోపాలు, సిబ్బంది ప్రమేయంపై అనుమానాలు వ్యక్తమవుతున్న నేపథ్యంలో సిట్ అధికారులు లోతైన విచారణ జరిపారు. ఈ క్రమంలో దాదాపు 105 సందర్భాల్లో హుండీ నగదు, విరాళాలను కొల్లగొట్టిన దృశ్యాలు అక్కడి సీసీటీవీ (CCTV) కెమెరాల్లో స్పష్టంగా రికార్డయ్యాయి. ఈ ఫుటేజ్ ఆధారంగా విరాళాల చోరీకి పాల్పడిన అసలు నిందితులను ఇప్పటికే గుర్తించినట్లు సిట్ అధికారులు సుప్రీంకోర్టుకు తెలిపారు.

సెప్టెంబర్ 25న చార్జ్‌షీట్ దాఖలు..

ఈ కేసు దర్యాప్తు దాదాపు చివరి దశకు చేరుకుందని సొలిసిటర్ ద్వారా సిట్ దేశ సర్వోన్నత న్యాయస్థానానికి వివరించింది. పూర్తి స్థాయి సాక్ష్యాధారాలతో కూడిన చార్జ్‌షీట్‌ను సెప్టెంబర్ 25 నాటికి కోర్టులో దాఖలు చేస్తామని స్పష్టం చేసింది. ఆలయ విరాళాల వ్యవహారంలో ఇంత పెద్ద మొత్తంలో అక్రమాలు జరగడంపై సర్వత్రా విస్మయం వ్యక్తమవుతోంది.

మహమ్మద్ గజనీని మించిపోయారంటూ నెట్టింట సెటైర్లు

రామాలయంలో 105 సార్లు విరాళాల చోరీ జరగడంపై రాజకీయ వర్గాల నుంచి తీవ్ర విమర్శలు వ్యక్తమవుతున్నాయి. దీనిపై బీఆర్ఎస్ నేత కార్తీక్ ఇంద్రారెడ్డి పట్లోళ్ల 'ఎక్స్' వేదికగా వ్యంగ్యాస్త్రాలు సంధించారు. "కేవలం 105 సార్లు మాత్రమే చోరీ జరిగిందట.. పాపం మహమ్మద్ గజనీ భారతదేశంపై దండెత్తి దోచుకుంది కేవలం 17 సార్లే" అంటూ రామాలయ భద్రత, నిర్వాహకుల తీరును ఎండగట్టారు. ప్రస్తుతం ఆయన చేసిన ఈ పోస్ట్ సోషల్ మీడియాలో విపరీతంగా వైరల్ అవుతోంది.

Just 105 times theft
Md Ghazni robbed India a poor 17 times https://t.co/DvLXZ102qu

— Karthik Indra Reddy Patlolla (@KarthikIndrAnna) September 21, 2026