Municipal Elections | హాలియాలో బీఆర్ఎస్ విజయం ఆసక్తికరం.. అస‌లేం జ‌రిగిందంటే?

Municipal Elections | త్రినేత్ర‌.న్యూస్‌: అప్ప‌టివ‌ర‌కు వారిద్ద‌రు ఒకే పార్టీలో ఉన్నారు. క‌లిసి తిరిగారు. మున్సిప‌ల్ ఎన్నిక‌ల్లో (Municipal Elections) ఒక‌రు నామినేష‌న్ వేశారు. ఎందుకైన మంచిద‌ని త‌న‌తోపాటు తిరిగిన వ్య‌క్తితోనూ నామినేష‌న్ వేయించాడు. టికెట్ వ‌చ్చిన‌వారే పోటీచేయాల‌నే ష‌ర‌తుపై. అయితే పార్టీ టికెట్ వ‌చ్చిన వ్య‌క్తి ఓడిపోగా, బ‌రిలోనే కొన‌సాగిన మ‌రో వ్య‌క్తి గెలుపొందాడు. అందుకేనేమో.. తానొక‌టి త‌లిస్తే.. విధి మ‌రొక‌టి త‌లిచిందంటారు..!

హాలియా మున్సిపాలిటీలోని (Haliya Municipality) 4వ వార్డు మిన‌హా మిగిలిన 11 వార్డుల్లో కాంగ్రెస్ విజ‌యం సాధించింది. ఆ ఒక్క‌స్థానంలో బీఆర్ఎస్ అభ్య‌ర్థి గెలుపొందారు. అయితే ఈ విజ‌యం ఇప్పుడు ఆస‌క్తిక‌రంగా మారింది. బీఆర్ఎస్ నుంచి విజయం సాధించిన కడమంచి ప్రమీల భర్త శ్రీనివాస్ మున్సిప‌ల్ ఎన్నిక‌ల వ‌ర‌కూ కాంగ్రెస్‌లోనే ఉన్నారు.

కాంగ్రెస్‌ నాయకుడు మందా నర్సిరెడ్డి తన భార్య విజయలక్ష్మి పేరున నామినేషన్‌ వేశారు. ఎందుకైనా మంచిదని తనతో పాటు ఉండే శ్రీనివాస్‌ (భార్య ప్రమీల)తో కూడా నామినేషన్‌ వేయించారు. కాంగ్రెస్‌ బీ ఫామ్‌ ఎవరికి ఇస్తే వారు పోటీలో ఉండాలని, మిగిలిన‌వారు వారు నామినేష‌న్ ఉప‌సంహ‌రించుకోవాల‌ని అనుకున్నారు. అయితే పార్టీ టిక్కెట్‌ విజయలక్ష్మికి దక్కింది.

కాగా, అప్పటికే తాను కాంగ్రెస్‌ నుంచి పోటీ చేస్తున్నానని విస్తృతంగా ప్రచారం చేసుకున్న శ్రీనివాస్‌.. వెనక్కి తగ్గ‌లేద‌. తన అనుచరులతో కలిసి బీఆర్ఎస్ పార్టీలో చేరారు. దీంతో శ్రీనివాస్ భార్య ప్రమీలకే బీఆర్ఎస్‌ బీ ఫామ్‌ ఇచ్చింది. కాంగ్రెస్‌ను వీడినప్ప‌టికీ శ్రీనివాస్ త‌న పంతం నెగ్గించుకోవ‌డంపై మున్సిపాలిటీలో స‌ర్వ‌త్రా చ‌ర్చ‌నీయాంశ‌మైంది.