Jurala | గూగుల్ మ్యాప్‌ను న‌మ్ముకున్న డ్రైవ‌ర్.. పుష్క‌ర ఘాట్‌లోకి లారీ

Jurala | ఒక ప్రాంతం నుంచి మ‌రో ప్రాంతానికి వెళ్తున్న‌ప్పుడు.. ఆ ప్ర‌దేశం గురించి స‌రిగా తెలియ‌క‌పోతే వెంబ‌డే గూగుల్ మ్యాప్‌ను ఫాలో అవుతాం. అయితే కొన్ని సార్లు ఈ గూగుల్ మ్యాప్ వ‌ర్క‌వుట్ అవుతుంది. కానీ కొన్ని సంద‌ర్భాల్లో గూగుల్ మ్యాప్ వ‌ల్ల ప్రాణాల మీద‌కు తెచ్చుకున్న వారు ఉన్నారు.

తాజాగా క‌ర్నూల్ జిల్లాలోని ఆత్మ‌కూరు నుంచి గ‌ద్వాల వైపున‌కు ఓ లారీ బ‌య‌ల్దేరింది. అయితే ఆ డ్రైవ‌ర్‌కు గ‌ద్వాల వైపున‌కు వ‌చ్చే రోడ్డు మార్గం తెలియ‌క‌పోవ‌డంతో.. గూగుల్ మ్యాప్‌ను అనుస‌రించాడు. గూగుల్ మ్యాప్ ద్వారా వెళ్తూ ఓ ట‌ర్నింగ్ మిస్ అయ్యాడు. ఇంకేముంది.. లారీని కృష్ణా న‌ది వైపున‌కు తీసుకెళ్లాడు. ఆ లారీ ఏకంగా పుష్క‌ర ఘాట్‌లోకి వెళ్లింది.

లారీని గ‌మ‌నించిన జూరాల గ్రామ‌స్తులు అక్క‌డికి భారీ సంఖ్య‌లో చేరుకున్నారు. జేసీబీ స‌హాయంతో స్థానికులు లారీని పుష్క‌ర ఘాట్ నుంచి బ‌య‌టకు తీసుకొచ్చారు. దీంతో లారీ డ్రైవ‌ర్ బాషా ఊపిరి పీల్చుకున్నాడు.