Arjuna Awards | ఖేల్‌రత్నకు బ్రేక్‌.. 17 మంది అర్జున అవార్డులు

Arjuna Award | జాతీయ క్రీడా పురస్కారాల ప్రదానోత్సవం రాష్ట్రపతి భవన్‌లో శుక్రవారం ఘనంగా జరిగింది. రాష్ట్రపతి ద్రౌపదీ ముర్ము విజేతలకు అవార్డులు అందజేశారు. ఈ ఏడాది దేశ అత్యున్నత క్రీడా పురస్కారమైన మేజర్‌ ధ్యాన్‌చంద్‌ ఖేల్‌రత్న అవార్డుకు ఒక్క క్రీడాకారుడినీ ఎంపిక చేయకపోవడం చర్చనీయాంశంగా మారింది.

Pradeep Manthri

Sports | Published On Nov 13, 2026, 4.41 pm IST

Arjuna Awards | ఖేల్‌రత్నకు బ్రేక్‌.. 17 మంది అర్జున అవార్డులు

అట్ట‌హాసంగా జ‌రిగిన అవార్డుల ప్ర‌దానం
అంద‌జేసిన రాష్ట్ర‌ప‌తి ద్రౌప‌ది ముర్ము
2014 త‌ర్వాత తొలిసారిగా ఖేల్‌ర‌త్న ఇవ్వ‌ని కేంద్రం

Arjuna Award | జాతీయ క్రీడా పురస్కారాల ప్రదానోత్సవం రాష్ట్రపతి భవన్‌లో శుక్రవారం ఘనంగా జరిగింది. రాష్ట్రపతి ద్రౌపదీ ముర్ము విజేతలకు అవార్డులు అందజేశారు. ఈ ఏడాది దేశ అత్యున్నత క్రీడా పురస్కారమైన మేజర్‌ ధ్యాన్‌చంద్‌ ఖేల్‌రత్న అవార్డుకు ఒక్క క్రీడాకారుడినీ ఎంపిక చేయకపోవడం చర్చనీయాంశంగా మారింది. 2014 తర్వాత ఖేల్‌రత్న అవార్డు ప్రదానం చేయకపోవడం ఇదే తొలిసారి. కేంద్ర క్రీడల శాఖ మంత్రి మన్‌సుఖ్‌ మాండవీయ, క్రీడల శాఖ కార్యదర్శి హరి రంజన్‌రావు తదితర ప్రముఖులు ఈ కార్యక్రమానికి హాజరయ్యారు. సుమారు 36 నిమిషాల పాటు అవార్డుల ప్రదానోత్సవం కొనసాగింది.

అర్జున అవార్డులకు 17 మంది..

ఈ ఏడాది అర్జున అవార్డులకు మొత్తం 17 మంది క్రీడాకారులు ఎంపికయ్యారు. ఎంపిక కమిటీ సిఫార్సులను పునఃపరిశీలించిన అనంతరం తుది జాబితాను ఖరారు చేశారు. ఇటీవల ప్రపంచకప్‌ గెలిచిన చెస్‌ క్రీడాకారిణి దివ్య దేశ్‌ముఖ్‌, 2024 చెస్‌ ఒలింపియాడ్‌లో స్వర్ణం సాధించిన భారత జట్టులో సభ్యుడైన విదిత్‌ గుజరాతీ, డెకాథ్లాన్‌ అథ్లెట్‌ తేజస్విన్‌ శంకర్‌ ఈ జాబితాలో ఉన్నారు. బ్యాడ్మింటన్‌ మహిళల డబుల్స్‌ జోడీ త్రీసా జాలీ, గాయత్రి గోపీచంద్‌ కూడా అర్జున అవార్డుకు ఎంపికయ్యారు. కామన్వెల్త్‌ క్రీడల రజత పతక విజేత, బాక్సర్‌ నరేంద్ర బెర్వాల్‌, యువ డెఫ్‌ షూటర్‌ ధనుష్‌ శ్రీకాంత్‌ సహా పలువురు క్రీడాకారులు స్వయంగా హాజరై రాష్ట్రపతి చేతుల మీదుగా పురస్కారాలు అందుకున్నారు. పారా క్రీడల విభాగంలో ఏక్తా భ్యాన్‌ (పారా క్లబ్‌ త్రో), రుద్రాంశ్‌ ఖండేల్వాల్‌ (పారా షూటింగ్‌) అవార్డులు అందుకున్నారు. 1962 ఆసియా క్రీడల్లో స్వర్ణం సాధించిన భారత ఫుట్‌బాల్‌ జట్టులో సభ్యుడైన ఐ అరుమైనాయగంకు జీవితకాల సాఫల్య విభాగంలో అర్జున అవార్డు ప్రదానం చేశారు.

ముగ్గురు కోచ్‌లకు ద్రోణాచార్య..

క్రీడాకారులను తీర్చిదిద్ది దేశానికి పతకాలు అందించడంలో కీలక పాత్ర పోషించిన ముగ్గురు కోచ్‌లకు ద్రోణాచార్య అవార్డులు దక్కాయి. బాక్సింగ్‌ కోచ్‌ పర్వీర్‌ సింగ్‌, మహిళల జాతీయ బాక్సింగ్‌ శిబిరంతో అనుబంధం ఉన్న చోటేలాల్‌ యాదవ్‌, కోచ్‌ నేహా చవాన్‌ ఈ పురస్కారాలకు ఎంపికయ్యారు. జీవితకాల సాఫల్య విభాగంలో బాక్సింగ్‌ కోచ్‌ ధర్మేంద్ర యాదవ్‌, రెజ్లింగ్‌ కోచ్‌ వీరేంద్ర కుమార్‌ అవార్డులు అందుకున్నారు. ఇక క్రీడల అభివృద్ధి, ప్రోత్సాహానికి విశేష కృషి చేసిన సంస్థలకు అందించే జాతీయ క్రీడా ప్రోత్సాహక పురస్కారం పుణెలోని ఆర్మీ పారాలింపిక్‌ నోడ్‌కు లభించింది. రాష్ట్రపతి ద్రౌపదీ ముర్ము చేతుల మీదుగా లెఫ్టినెంట్‌ కల్నల్‌ దల్జీత్‌ సింగ్‌ ఈ అవార్డును స్వీకరించారు.

ఆలస్యంపై క్రీడాకారుల అసంతృప్తి

2025 జాతీయ క్రీడా పురస్కారాల తుది జాబితాను ఆగస్టు 18న కేంద్ర క్రీడల మంత్రిత్వ శాఖ ప్రకటించింది. సుప్రీంకోర్టు మాజీ న్యాయమూర్తి జస్టిస్‌ (రిటైర్డ్‌) అరుణ్‌ కుమార్‌ మిశ్రా నేతృత్వంలోని ఎంపిక కమిటీ సిఫార్సుల ఆధారంగా విజేతలను ఖరారు చేశారు. ఈసారి పెద్ద సంఖ్యలో దరఖాస్తులు రావడంతో వాటిని పరిశీలించేందుకు సమయం పట్టింది. కమిటీలో ప్రముఖ క్రీడాకారులు, క్రీడా జర్నలిజం అనుభవం ఉన్నవారు, క్రీడా పరిపాలకులు సభ్యులుగా ఉన్నారు. అవార్డుల ప్రకటనలో తీవ్ర జాప్యం జరగడంపై కొందరు క్రీడాకారులు అసంతృప్తి వ్యక్తం చేశారు. అయితే అవార్డుల పవిత్రత, పారదర్శకతను కాపాడేందుకే సమయం తీసుకున్నట్లు క్రీడల మంత్రిత్వ శాఖ వెల్లడించింది. సాధారణంగా హాకీ దిగ్గజం మేజర్‌ ధ్యాన్‌చంద్‌ జయంతి సందర్భంగా ఆగస్టు 29న జాతీయ క్రీడా పురస్కారాలు ప్రదానం చేసేవారు. కొవిడ్‌ మహమ్మారి తర్వాత ఈ తేదీ విషయంలో మార్పులు చోటుచేసుకుంటున్నాయి.

అర్జున, ద్రోణాచార్య అవార్డుల ప్రత్యేకత

1961లో ప్రారంభమైన అర్జున అవార్డు దేశంలోనే అత్యంత పురాతన జాతీయ క్రీడా పురస్కారం. వరుసగా నాలుగేళ్లపాటు క్రీడల్లో అత్యుత్తమ ప్రతిభ, నాయకత్వ లక్షణాలు, క్రీడాస్ఫూర్తి, క్రమశిక్షణ ప్రదర్శించిన వారికి ఈ అవార్డును అందజేస్తారు. పురస్కారంలో భాగంగా అర్జునుడి కాంస్య విగ్రహం, ప్రశంసాపత్రంతో పాటు రూ.15 లక్షల నగదు బహుమతి అందిస్తారు. 1985లో ప్రారంభమైన ద్రోణాచార్య అవార్డును అంతర్జాతీయ క్రీడా పోటీల్లో దేశానికి పతకాలు సాధించిపెట్టే క్రీడాకారులను తీర్చిదిద్దిన కోచ్‌లకు ప్రదానం చేస్తారు. గురు ద్రోణాచార్య విగ్రహం, ప్రశంసాపత్రం, సంప్రదాయ దుస్తులతో పాటు నగదు బహుమతి అందజేస్తారు. తాజా మార్పుల ప్రకారం సాధారణ ద్రోణాచార్య అవార్డు గ్రహీతలకు రూ.10 లక్షలు, జీవితకాల సాఫల్య విభాగంలో ఎంపికైన వారికి రూ.15 లక్షల నగదు బహుమతి ఇవ్వనున్నారు.