NASA ISRO Moon Base | చంద్రుడిపై మనుషులు నివసించేలా ‘మూన్ బేస్’ నిర్మిస్తున్న నాసా.. కలిసి పనిచేద్దాం రండి: ఇస్రోకు ఆహ్వానం

చంద్రుడిపై మనుషులు నివసించేలా నాసా నిర్మిస్తున్న 'మూన్ బేస్' ప్రాజెక్టులో భాగస్వామ్యం కావాలని ఇస్రోకు ఆహ్వానం అందింది. దీనివల్ల మనకేంటి లాభం?

Jagadeesh

Science | Published On Aug 11, 2026, 4.38 pm IST

NASA ISRO Moon Base | చంద్రుడిపై మనుషులు నివసించేలా ‘మూన్ బేస్’ నిర్మిస్తున్న నాసా.. కలిసి పనిచేద్దాం రండి: ఇస్రోకు ఆహ్వానం

సంక్షిప్త సారాంశం

చంద్రుడి దక్షిణ ధృవంపై శాశ్వత మానవ నివాసాలు ఏర్పాటు చేసే 'మూన్ బేస్' ప్రాజెక్టులో కలిసి పనిచేయాలని నాసా ఇస్రోను కోరింది. ఆగస్టు 5, 6 తేదీల్లో బెంగళూరులో జరిగిన ఇండో-యూఎస్ సివిల్ స్పేస్ జాయింట్ వర్కింగ్ గ్రూప్ భేటీలో ఈ కీలక ప్రతిపాదన చేశారు. చంద్రయాన్-3 సక్సెస్‌తో దక్షిణ ధృవంపై పట్టు సాధించిన ఏకైక దేశంగా భారత్ సాధించిన ఘనతే ఈ ఆహ్వానానికి ప్రధాన కారణం. ఈ డీల్ ఓకే అయితే.. భవిష్యత్తులో ఇస్రో చేపట్టే గగన్‌యాన్ లాంటి ప్రతిష్టాత్మక ప్రయోగాలకు అమెరికా సాంకేతిక సహకారం భారీగా లభించనుంది.

NASA ISRO Moon Base | త్రినేత్ర.న్యూస్ : భవిష్యత్తులో చంద్రుడిపై మనుషులు నివసించేందుకు వీలుగా అమెరికా అంతరిక్ష సంస్థ నాసా (NASA) ప్రతిష్టాత్మకంగా చేపట్టిన 'మూన్ బేస్' (Moon Base) ప్రాజెక్టులో భాగస్వామ్యం కావాలని భారత అంతరిక్ష పరిశోధనా సంస్థ ఇస్రోను (ISRO) కోరింది. ఆగస్టు 5, 6 తేదీల్లో బెంగళూరు ఇస్రో ప్రధాన కార్యాలయం వేదికగా జరిగిన 9వ ఇండియా-యూఎస్ సివిల్ స్పేస్ జాయింట్ వర్కింగ్ గ్రూప్ (CSJWG) సమావేశాల్లో ఈ కీలక ప్రతిపాదన తెరపైకి రావడం ఇప్పుడు ప్రపంచవ్యాప్తంగా ఆసక్తి రేపుతోంది.

అసలేంటి ఈ 'మూన్ బేస్' ప్రాజెక్ట్?

అమెరికా అధ్యక్షుడు డొనాల్డ్ ట్రంప్ నేషనల్ స్పేస్ పాలసీలో భాగంగా.. ఈ ఏడాది మార్చిలో నాసా ఈ ప్రాజెక్టును ప్రకటించింది. చంద్రుడి దక్షిణ ధృవం (Lunar South Pole) వద్ద శాశ్వత మానవ నివాస కేంద్రాలను ఏర్పాటు చేయడం దీని ముఖ్య ఉద్దేశం. వ్యోమగాములు అక్కడే ఉండి పరిశోధనలు చేయడం, భవిష్యత్తులో అంగారక గ్రహం (Mars) మీదకు మనుషులను పంపేందుకు అవసరమైన టెక్నాలజీని డెవలప్ చేయడం ఈ ప్రాజెక్ట్ ప్రధాన లక్ష్యం.

ఇస్రోనే ఎందుకు ఎంచుకున్నారు?

నాసా ఈ ల్యూనార్ ఔట్‌పోస్ట్‌ను నిర్మించాలనుకుంటున్నది చంద్రుడి దక్షిణ ధృవంపైనే. ఇక్కడ ల్యాండర్ దించి విజయవంతంగా పరిశోధనలు చేసిన ఏకైక దేశం మన భారతదేశం మాత్రమే. చంద్రయాన్-3 (Chandrayaan-3) సాధించిన ఘనవిజయం, 'శివశక్తి పాయింట్' వద్ద విక్రమ్ ల్యాండర్, ప్రజ్ఞాన్ రోవర్లు అందించిన డేటా నాసాను విశేషంగా ఆకర్షించాయి. దక్షిణ ధృవంలో ఉండే మంచును.. భవిష్యత్తులో తాగునీరు, ఆక్సిజన్, రాకెట్ ఇంధనంగా మార్చుకోవచ్చని శాస్త్రవేత్తలు భావిస్తున్నారు. అందుకే ఆ వాతావరణంపై పూర్తి అనుభవం ఉన్న ఇస్రోతో కలిసి అడుగులేయాలని నాసా ఆరాటపడుతోంది.

ఆర్టెమిస్ అకార్డ్స్.. నెక్స్ట్ లెవెల్ పార్టనర్‌షిప్

2023లో భారత్ సంతకం చేసిన 'ఆర్టెమిస్ అకార్డ్స్' (Artemis Accords) పునాదిగా ఈ కొత్త భాగస్వామ్యం రూపుదిద్దుకోనుంది. బెంగళూరులో జరిగిన ఈ సమావేశంలో నాసా ప్రతినిధులు, అమెరికా రాయబారి సెర్గియో గోర్, ఇస్రో శాస్త్రవేత్తలతో చర్చలు జరిపారు. 1.4 బిలియన్ డాలర్ల వ్యయంతో అత్యంత ఖరీదైన 'నిసార్' (NISAR - NASA-ISRO Synthetic Aperture Radar) ఎర్త్-అబ్జర్వేషన్ శాటిలైట్ సక్సెస్ గురించి, అలాగే సైంటిఫిక్ డేటాను రెండు దేశాలు పంచుకోవడంపై ఈ భేటీలో ప్రధానంగా చర్చించారు.

భారత్‌కు కలిగే లాభం ఏంటి?

కేవలం ఎర్త్ అబ్జర్వేషన్ శాటిలైట్స్ మాత్రమే కాకుండా, అపోలో యుగం తర్వాత మనుషులను చంద్రుడిపైకి పంపే అత్యంత భారీ ప్రాజెక్టులో అమెరికా మనల్ని ఒక స్ట్రాంగ్ పార్టనర్‌గా చూస్తోందని ఈ పరిణామం స్పష్టం చేస్తోంది. ఒకవేళ భారత్ ఈ ఆఫర్‌ను అంగీకరిస్తే.. ఇస్రో భవిష్యత్తులో చేపట్టబోయే 'గగన్‌యాన్' (Gaganyaan) మానవ సహిత అంతరిక్ష ప్రయోగాలకు, అలాగే 2047 నాటికి సొంతంగా ఒక స్పేస్ స్టేషన్‌ను నిర్మించాలన్న కల సాకారం చేసుకోవడానికి ఈ డీల్ ఒక గేమ్ చేంజర్‌లా మారనుంది.

US Ambassador to India Sergio Gor tweets, "NASA has invited ISRO to join its Moon Base program, deepening the US-India deep space partnership! The news came as the Department of State and NASA co-chaired the 9th Civil Space Joint Working Group in Bengaluru, advancing the US-India… https://t.co/HlRVP6YwuJ pic.twitter.com/8mncKFKZ6r

— ANI (@ANI) August 11, 2026