Praful Patel | ఎన్సీపీ పగ్గాలు నాకా? ఆ వార్తల్లో నిజం లేదు: ప్రఫుల్ పటేల్

Praful Patel | నేషనలిస్ట్ కాంగ్రెస్ పార్టీ (NCP) అధ్యక్షుడు అజిత్ పవార్ మరణంతో మహారాష్ట్ర రాజకీయాల్లో విషాదం నెలకొంది. ఈ క్రమంలో ఎన్సీపీ తదుపరి చీఫ్‌గా (NCP Chief) సీనియర్ నేత ప్రఫుల్ పటేల్‌ను నియమించారంటూ మీడియాలో, సోషల్ మీడియాలో వార్తలు చక్కర్లు కొట్టాయి. అయితే, ఈ వార్తలను ప్రఫుల్ పటేల్ తీవ్రంగా ఖండించారు.

వదంతులు నమ్మవద్దు

ఎన్సీపీ అధ్యక్షుడిగా తనను ఎంపిక చేశారంటూ వస్తున్న ఊహాగానాలపై ప్రఫుల్ పటేల్ స్పందించారు. "అజిత్ పవార్ ఆకస్మిక మరణంతో మేమంతా తీవ్ర దిగ్భ్రాంతిలో ఉన్నాము. ఈ సమయంలో పార్టీ నాయకత్వం గురించి వస్తున్న వార్తలు పూర్తిగా అవాస్తవం. పార్టీ అధ్యక్ష పదవిపై ఇప్పటివరకు ఎలాంటి నిర్ణయం తీసుకోలేదు" అని ఆయన స్పష్టం చేశారు.

ఇది సమయం కాదు

పార్టీ అత్యంత క్లిష్ట పరిస్థితుల్లో ఉన్నప్పుడు ఇలాంటి నిరాధారమైన వార్తలను ప్రచారం చేయడం సరికాదని ఆయన అభిప్రాయపడ్డారు. కార్యకర్తలు, ప్రజలు ఇలాంటి వదంతులను నమ్మవద్దని కోరారు. అజిత్ పవార్ దశదిన కర్మ, ఇతర కార్యక్రమాలపైనే ప్రస్తుతం దృష్టి సారించామని, నాయకత్వ బాధ్యతలపై పార్టీ తగిన సమయంలో నిర్ణయం తీసుకుంటుందని ఆయన పేర్కొన్నారు.

అజిత్ పవార్ మరణం తర్వాత పార్టీ భవిష్యత్తుపై అనేక చర్చలు జరుగుతున్న నేపథ్యంలో ఇప్పటికే అజిత్ భార్య సునేత్ర పవార్ మహారాష్ట్ర డిప్యూటీ సీఎంగా శనివారం ప్రమాణ స్వీకారం చేశారు. ఎన్సీపీ శాసనసభా పక్ష నేతగానూ ఆమెను ఎన్నుకున్న విషయం తెలిసిందే. ఈ నేపథ్యంలో ప్రఫుల్ పటేల్ చేసిన ఈ వ్యాఖ్యలు ప్రాధాన్యత సంతరించుకున్నాయి.