NMMSS Scholarship 2026 | విద్యార్థులకు అలర్ట్: కేంద్ర స్కాలర్‌షిప్ గడువు పెంపు.. ఏటా రూ.12,000 పొందే చాన్స్

• విద్యార్థులకు గుడ్ న్యూస్
• కేంద్ర NMMSS స్కాలర్‌షిప్ గడువు పెంపు

NMMSS Scholarship 2026 | త్రినేత్ర న్యూస్ : ఆర్థికంగా వెనుకబడిన ప్రతిభావంతులైన పాఠశాల విద్యార్థులకు కేంద్ర ప్రభుత్వం శుభవార్త చెప్పింది. 2026-27 విద్యా సంవత్సరానికి సంబంధించిన నేషనల్ మీన్స్-కమ్-మెరిట్ స్కాలర్‌షిప్ స్కీమ్ (NMMSS) దరఖాస్తుల తుది గడువును నవంబర్ 15, 2026 వరకు పొడిగిస్తున్నట్లు కేంద్ర విద్యాశాఖ శనివారం అధికారికంగా ప్రకటించింది. అర్హులైన విద్యార్థులు తమ దరఖాస్తులను నేషనల్ స్కాలర్‌షిప్ పోర్టల్ (NSP)లో పూర్తి చేసుకునేందుకు, అలాగే అధికారుల పరిశీలన సజావుగా సాగేందుకు ఈ అదనపు సమయం కల్పించినట్లు వెల్లడించింది.

ఈ పథకం ద్వారా ప్రభుత్వ, ఎయిడెడ్, స్థానిక సంస్థల పాఠశాలల్లో చదువుతూ ఎంపికైన విద్యార్థులకు ఏటా రూ.12,000 చొప్పున ఆర్థిక సాయం అందుతుంది. ఈ మొత్తాన్ని నేరుగా విద్యార్థుల బ్యాంకు ఖాతాల్లో డీబీటీ (DBT) పద్ధతిలో జమ చేస్తారు.

తాజా షెడ్యూల్ వివరాలు

కేంద్ర విద్యాశాఖ సవరించిన షెడ్యూల్ ప్రకారం గడువు తేదీలు ఇలా ఉన్నాయి.

ఆన్‌లైన్ దరఖాస్తుల సమర్పణ తుది తేదీ: నవంబర్ 15, 2026

ఇన్‌స్టిట్యూట్ నోడల్ ఆఫీసర్ (L1) వెరిఫికేషన్: నవంబర్ 30, 2026

డిస్ట్రిక్ట్ నోడల్ ఆఫీసర్ (L2) పరిశీలన: డిసెంబర్ 15, 2026

ఎవరు అర్హులు?

ఎనిమిదో తరగతి తర్వాత పేదరికం కారణంగా చదువు ఆపేయకుండా, 12వ తరగతి వరకు విద్యను కొనసాగించేలా ప్రోత్సహించడమే ఈ పథకం ముఖ్య ఉద్దేశం. దేశవ్యాప్తంగా ప్రతీ ఏటా ఒక లక్ష మంది కొత్త విద్యార్థులకు ఈ స్కాలర్‌షిప్‌లను అందజేస్తారు. 7వ తరగతిలో కనీసం 55 శాతం మార్కులు సాధించి ఉండాలి (ఎస్సీ/ఎస్టీ విద్యార్థులకు 5 శాతం సడలింపు ఉంటుంది). రాష్ట్రాలు/కేంద్రపాలిత ప్రాంతాలు నిర్వహించే అర్హత పరీక్షలో ఉత్తీర్ణత సాధించిన 9వ తరగతి విద్యార్థులకు ఈ స్కాలర్‌షిప్ వర్తిస్తుంది. తదుపరి తరగతుల్లో (10 నుంచి 12 వరకు) రెన్యూవల్ చేసుకోవచ్చు. విద్యార్థి తల్లిదండ్రుల వార్షిక ఆదాయం రూ.3.50 లక్షలకు మించకూడదు.

ఎలా దరఖాస్తు చేసుకోవాలి?

ఈ స్కాలర్‌షిప్ కోసం విద్యార్థులు నేషనల్ స్కాలర్‌షిప్ పోర్టల్ (scholarships.gov.in) ద్వారా దరఖాస్తు చేసుకోవాల్సి ఉంటుంది. పోర్టల్‌లో ముందుగా వన్-టైమ్ రిజిస్ట్రేషన్ (OTR) పూర్తి చేసిన తర్వాతే స్కాలర్‌షిప్ ఫారమ్‌ను సమర్పించాల్సి ఉంటుంది. ఇప్పటివరకు దేశవ్యాప్తంగా 90,483 కొత్త దరఖాస్తులు, 1,99,531 రెన్యూవల్ దరఖాస్తులు వచ్చినట్లు విద్యాశాఖ పేర్కొంది. అర్హత గల విద్యార్థులు నవంబర్ 15లోగా రిజిస్ట్రేషన్ పూర్తి చేసుకుని, తమ పాఠశాల లాగిన్‌లో నవంబర్ 30లోగా వెరిఫై అయ్యేలా చూసుకోవాలని అధికారులు సూచించారు.