Jawaharlal Nehru – Edwina Mountbatten | డరో మత్.. ఎడ్వినాకు నెహ్రూ రాసిన ఆ లేఖలు వెనక్కి ఇవ్వండి

• నెహ్రూ, ఎడ్వినా లేఖల వివాదం
• ఆ 51 బాక్సుల్లో ఏముంది?
• గాంధీ కుటుంబానికి బీజేపీ సవాల్

Jawaharlal Nehru - Edwina Mountbatten | త్రినేత్ర న్యూస్ : దేశ తొలి ప్రధాని జవహర్‌లాల్ నెహ్రూ జయంతి (నవంబర్ 14) సందర్భంగా శనివారం మరోసారి ఆయన లేఖల వివాదం రాజకీయంగా వేడెక్కింది. నెహ్రూకు సంబంధించిన 51 బాక్సుల చారిత్రక లేఖలను ప్రైమ్ మినిస్టర్స్ మ్యూజియం అండ్ లైబ్రరీ (PMML)కి తిరిగి అప్పగించాలని కాంగ్రెస్ అగ్రనేతలు సోనియా గాంధీ, రాహుల్ గాంధీలను భారతీయ జనతా పార్టీ (బీజేపీ) డిమాండ్ చేసింది. 2008లో మ్యూజియం నుంచి తీసుకెళ్లిన ఈ డాక్యుమెంట్లలో ఎడ్వినా మౌంట్‌బాటెన్‌కు నెహ్రూ రాసిన లేఖలు కూడా ఉన్నాయని బీజేపీ పేర్కొంది.

బీజేపీ జాతీయ అధికార ప్రతినిధి సి.ఆర్. కేశవన్ సోషల్ మీడియా ప్లాట్‌ఫామ్ 'ఎక్స్' (X) వేదికగా ఈ అంశాన్ని లేవనెత్తారు. రాహుల్ గాంధీ తరచూ వాడే ‘డరో మత్’ (భయపడకండి) నినాదాన్ని ప్రస్తావిస్తూ.. ధైర్యం చేసి ఆ పత్రాలను దేశానికి తిరిగి ఇవ్వాలని ఆయన కోరారు. ఈ లేఖలు దేశ చారిత్రక వారసత్వ సంపదని, ఎవరి వ్యక్తిగత ఆస్తి కాదని కేశవన్ వ్యాఖ్యానించారు. రిసెర్చ్ చేసే వారికి, సామాన్య ప్రజలకు అందుబాటులో ఉండేలా వాటిని మ్యూజియంలో ఉంచాలని ఆయన అన్నారు.

1971లో నెహ్రూ మెమోరియల్ మ్యూజియంకు విరాళంగా ఇచ్చిన ఈ డాక్యుమెంట్లను, 2008 మే నెలలో యూపీఏ ప్రభుత్వం అధికారంలో ఉన్నప్పుడు సోనియా గాంధీ వెనక్కి తీసుకున్నారని కేశవన్ ఆరోపించారు. ఇందులో ఎడ్వినా మౌంట్‌బాటెన్‌తో పాటు ఇతర ప్రముఖులతో నెహ్రూ జరిపిన ఉత్తరప్రత్యుత్తరాలు ఉన్నాయని తెలిపారు. వాటిని ఎందుకు వెనక్కి తీసుకున్నారో చెప్పకపోవడం అనుమానాలకు తావిస్తోందని, ఇటీవల సోనియా గాంధీ రాసిన పుస్తకంలో కూడా ఈ విషయాన్ని ఎందుకు ప్రస్తావించలేదని ఆయన ప్రశ్నించారు.

2008 నుంచి కొనసాగుతున్న వివాదం.. కేంద్రం ఏం చెప్పిందంటే?

నెహ్రూ లేఖల అప్పగింతపై కొన్నేళ్లుగా చర్చ నడుస్తోంది. 2024 సెప్టెంబర్‌లో పీఎంఎంఎల్ (PMML) సొసైటీ సభ్యుడు రిజ్వాన్ ఖాద్రీ సోనియా గాంధీకి లేఖ రాశారు. ఆ 51 బాక్సులను తిరిగి ఇవ్వాలని, లేదా పరిశోధనల కోసం వాటిని డిజిటలైజ్ చేసి స్కాన్ కాపీలు తీసుకునేందుకు అనుమతించాలని ఆయన కోరారు. ఎడ్వినా మౌంట్‌బాటెన్‌తో పాటు మాజీ కేంద్ర మంత్రి గోవింద్ వల్లభ్ పంత్, సోషలిస్ట్ నేత జయప్రకాశ్ నారాయణ్ తదితరులతో నెహ్రూ జరిపిన ఉత్తరప్రత్యుత్తరాలు ఇందులో ఉన్నాయని ఖాద్రీ పేర్కొన్నారు. 2025లో ఆయన రాహుల్ గాంధీకి కూడా ఇదే విషయంపై విజ్ఞప్తి చేశారు.

మరోవైపు, ఈ పత్రాలు కనిపించకుండా పోయాయన్న ప్రచారాన్ని కేంద్ర సాంస్కృతిక మంత్రిత్వ శాఖ 2025 డిసెంబర్‌లోనే తోసిపుచ్చింది. తొలి ప్రధానికి సంబంధించిన ఏ ఒక్క డాక్యుమెంట్ కూడా మ్యూజియం నుంచి మిస్ కాలేదని, అవి ఎక్కడ ఉన్నాయో స్పష్టంగా తెలుసని కేంద్ర మంత్రి గజేంద్ర సింగ్ షెకావత్ వెల్లడించారు. 2008 ఏప్రిల్ 29న సోనియా గాంధీ ప్రతినిధి ఎం.వి. రాజన్ రాసిన లేఖ మేరకు.. నెహ్రూ వ్యక్తిగత కుటుంబ లేఖలు, నోట్స్‌ను ఆమెకు పంపినట్లు మంత్రిత్వ శాఖ తెలిపింది. వాటిని తిరిగి మ్యూజియంకు అప్పగించాలని కోరుతూ 2025 జనవరి 28న, జూలై 3న సోనియా గాంధీ కార్యాలయానికి మ్యూజియం లేఖలు రాసినట్లు పేర్కొంది.

నెహ్రూకు కాంగ్రెస్ నేతల ఘన నివాళి

ఇదిలా ఉండగా, నెహ్రూ జయంతి సందర్భంగా లోక్‌సభ ప్రతిపక్ష నేత రాహుల్ గాంధీ ఆయనకు ఘన నివాళులర్పించారు. నెహ్రూను ‘భారత రత్నం’ (జ్యువెల్ ఆఫ్ ఇండియా)గా అభివర్ణించిన రాహుల్.. ఆధునిక, శాస్త్రీయ, ప్రగతిశీల భారతదేశం కోసం ఆయన కన్న కలలు కాంగ్రెస్ పార్టీకి ఎప్పటికీ స్ఫూర్తినిస్తాయని 'ఎక్స్'లో పేర్కొన్నారు. భిన్నత్వమే బలంగా, ప్రజాస్వామ్యమే విశ్వాసంగా, సమానత్వమే పునాదిగా నెహ్రూ కలలుగన్న భారతాన్ని నిర్మించడమే ఆయనకు ఇచ్చే నిజమైన నివాళి అని రాహుల్ అన్నారు.

కాంగ్రెస్ ఎంపీ ప్రియాంక గాంధీ వాద్రా స్పందిస్తూ.. నెహ్రూ ఒక విప్లవకారుడు, దార్శనికుడు, దేశ నిర్మాత అని కొనియాడారు. ఆయన మరణించి ఆరు దశాబ్దాలు దాటినా ఇప్పటికీ విమర్శలు ఎదుర్కొంటున్నారంటేనే రాజ్యాంగం, ప్రజాస్వామ్యం పట్ల ఆయనకు ఉన్న నిబద్ధత అర్థమవుతోందని వ్యాఖ్యానించారు. లౌకికవాదం, శాస్త్రీయ దృక్పథం, పిల్లల విద్యకు నెహ్రూ ఎంతో ప్రాధాన్యత ఇచ్చారని కాంగ్రెస్ అధ్యక్షుడు మల్లికార్జున్ ఖర్గే గుర్తు చేసుకున్నారు. 1889 నవంబర్ 14న ప్రయాగ్‌రాజ్‌లో జన్మించిన నెహ్రూ, భారత తొలి ప్రధానిగా పనిచేశారు. ఆయన జయంతిని దేశవ్యాప్తంగా బాలల దినోత్సవంగా జరుపుకుంటారు.