Rare Blood Disorder Pregnancy | అరుదైన వ్యాధి.. ముగ్గురు శిశువుల మృతి.. ఆపై మృత్యువును జయించి పండంటి బిడ్డకు జన్మనిచ్చిన తల్లి

Rare Blood Disorder Pregnancy | త్రినేత్ర.న్యూస్ : మహారాష్ట్రలోని జాల్నా (Jalna) జిల్లాకు చెందిన ఓ 32 ఏళ్ల మహిళ జీవితంలో వరుస విషాదాలు. పుట్టిన వారం రోజులకే ముగ్గురు పిల్లలు కన్నుమూశారు. నాలుగోసారి గర్భం దాల్చినా ప్రాణాపాయ స్థితి! కానీ, ముంబైలోని ప్రసిద్ధ సర్ జేజే హాస్పిటల్ (JJ Hospital) డాక్టర్ల కృషితో ఆ తల్లి మృత్యువును జయించింది. అరుదైన రక్త సంబంధిత వ్యాధి (Rare blood disorder) నుంచి బయటపడి, మే 2025లో ఓ పండంటి ఆడబిడ్డకు జన్మనిచ్చింది. గ్రామీణ ప్రాంతాల్లో సరైన వైద్యం అందక తీవ్రమైన వ్యాధులు ఎలా నిర్లక్ష్యానికి గురవుతాయో ఈ ఘటనే ఒక ఉదాహరణ.

అసలేం జరిగిందంటే?

గతంలో ఆమెకు ముగ్గురు పిల్లలు (ఇద్దరు బాబులు, ఒక పాప) పుట్టారు. కానీ, బ్లీడింగ్ డిజార్డర్ వల్ల ఏ ఒక్కరూ వారం రోజులకు మించి బతకలేదు. తాజాగా 37 వారాల ప్రెగ్నెన్సీతో ఆమె జేజే హాస్పిటల్‌కు వచ్చింది. అప్పటికే ఆమె రక్తంలో ప్లేట్‌లెట్స్ (Platelets) సంఖ్య కేవలం 15,000 మాత్రమే ఉంది. (సాధారణంగా 1.5 లక్షలు ఉండాలి). డెలివరీ సమయంలో విపరీతమైన బ్లీడింగ్ జరిగే రిస్క్ ఉందని డాక్టర్లు గుర్తించారు.

డాక్టర్ల ముందు సవాల్..

"పేషెంట్ హిస్టరీ చూశాక పరిస్థితి తీవ్రత అర్థమైంది. కానీ, ఆమెకు ఎలాంటి వ్యాధి ఉందనే దానికి సరైన రిపోర్ట్స్ లేవు. కేవలం 15 వేల ప్లేట్‌లెట్స్‌తో ఈ హై-రిస్క్ ప్రెగ్నెన్సీని (High-risk pregnancy) మేనేజ్ చేయడం మాకు పెద్ద ఛాలెంజ్" అని డాక్టర్ ప్రతీక్షా డి. ఖమ్కర్ తెలిపారు. ఆమె శరీరం సొంత ప్లేట్‌లెట్స్‌నే నాశనం చేసే ITP (Immune Thrombocytopenic Purpura) అనే ఆటో ఇమ్యూన్ వ్యాధితో పాటు, HELLP సిండ్రోమ్ లక్షణాలు కూడా కనిపించడం డాక్టర్లను కలవరపెట్టింది.

ఎమర్జెన్సీ ఆపరేషన్.. 22 యూనిట్ల ప్లేట్‌లెట్స్

ఎన్నిసార్లు రక్తం ఎక్కించినా ప్లేట్‌లెట్స్ పెరగకపోవడంతో ఇంట్రావీనస్ ఇమ్యునోగ్లోబులిన్ (IVIG) ఇచ్చారు. అదే సమయంలో కడుపులోని బిడ్డకు ఇబ్బందిగా మారడంతో డాక్టర్లు ఎమర్జెన్సీగా సీ-సెక్షన్ (C-Section) చేశారు. ఆపరేషన్ సమయంలో విపరీతమైన రక్తస్రావం (Hemorrhage) జరిగింది. గర్భాశయం కుంచించుకుపోకపోవడంతో డాక్టర్లు వెంటనే సర్జరీ ద్వారా బ్లీడింగ్ కంట్రోల్ చేసి, 2.4 కిలోల బరువున్న పండంటి ఆడబిడ్డను సురక్షితంగా బయటకు తీశారు. ఆమె బిడ్డలు ప్రాణాలతో మిగలడం ఇదే తొలిసారి.

డెలివరీ తర్వాత కూడా తల్లి పరిస్థితి విషమంగానే ఉంది. బీపీ 170/110కి పెరిగిపోయింది. నరాలకు సంబంధించిన సమస్య (PRES) కూడా తలెత్తింది. హాస్పిటల్‌లో ఉన్న సమయంలో ఆమెకు ఏకంగా 22 యూనిట్ల ప్లేట్‌లెట్స్, 5 యూనిట్ల రెడ్ బ్లడ్ సెల్స్, 6 యూనిట్ల ప్లాస్మా ఎక్కించారు. సుమారు నెల రోజుల సుదీర్ఘ పోరాటం తర్వాత ప్లేట్‌లెట్స్ సంఖ్య మెరుగుపడటంతో ఆమె పూర్తిగా కోలుకుని, బిడ్డతో సహా క్షేమంగా ఇంటికి డిశ్చార్జ్ అయ్యింది.