Early Heatwave Strikes India | ముందే మొదలైన ఎండల భగభగ.. దేశంలో 75 శాతం ప్రజలకు తీవ్ర ముప్పు: రికార్డులు బద్దలు కొడుతున్న ఉష్ణోగ్రతలు

Early Heatwave Strikes India | త్రినేత్ర.న్యూస్ : వేసవి కాలం పూర్తిగా రాకముందే దేశవ్యాప్తంగా సూర్యుడు ప్రతాపం చూపిస్తున్నాడు. మునుపెన్నడూ లేని విధంగా ఉష్ణోగ్రతలు రికార్డు స్థాయిలో నమోదవుతున్నాయి. తాజాగా వెలువడిన ఒక నివేదిక దేశంలో హీట్‌వేవ్స్ (Heatwaves), ఎండల తీవ్రతపై షాకింగ్ విషయాలను వెల్లడించింది. దేశంలో ఏకంగా 75 శాతం మంది 'అత్యధిక' ఉష్ణోగ్రతల ముప్పు (High to Very High heat risk) ఉన్న జిల్లాల్లో నివసిస్తున్నారని ఈ అధ్యయనం స్పష్టం చేసింది.

మార్చి తొలి వారంలోనే రికార్డులు బ్రేక్ 

భారత వాతావరణ శాఖ (IMD) నమోదు చేసిన తాజా వివరాల ప్రకారం మార్చి మొదటి వారం నుంచే దేశంలోని పలు ప్రాంతాల్లో ఎండలు దంచికొడుతున్నాయి.

ఢిల్లీ: గత 15 ఏళ్లలో ఎన్నడూ లేనంత ముందుగానే ఢిల్లీలో ఉష్ణోగ్రతలు 35 డిగ్రీలు దాటాయి.

ముంబై, పూణే: ఈ రెండు నగరాల్లో ఈ సీజన్‌కు సంబంధించిన మొట్టమొదటి హీట్‌వేవ్ (వడగాల్పులు) హెచ్చరికలు అప్పుడే జారీ అయ్యాయి.

తెలంగాణ : తెలంగాణలోని కొన్ని జిల్లాలు ఇప్పటికే హై రిస్క్ జోన్‌లో ఉండగా, మరికొన్ని జిల్లాలు మోడరేట్ జోన్‌లో ఉన్నాయి.

ఆంధ్రప్రదేశ్: కోస్తా ఆంధ్రప్రదేశ్‌లో ఉక్కబోతతో పాటు, వడగాల్పుల పరిస్థితులు తీవ్రంగా నెలకొన్నాయి.

విదర్భ, తమిళనాడు: మహారాష్ట్రలోని విదర్భ ప్రాంతంలో ఉష్ణోగ్రతలు ఏకంగా 40–41 డిగ్రీలకు చేరువయ్యాయి. తమిళనాడులోని కొన్ని ప్రాంతాల్లో సీజన్ ప్రారంభంలోనే 40 డిగ్రీలు ఉష్ణోగ్రతలు నమోదవుతుండటం ఆందోళన కలిగిస్తోంది.

నివేదికలోని ముఖ్యాంశాలు

దేశవ్యాప్తంగా 734 జిల్లాల్లో, 35 వేర్వేరు సూచికల ఆధారంగా నిర్వహించిన మొట్టమొదటి జిల్లా స్థాయి 'హీట్ రిస్క్ అసెస్‌మెంట్' పలు కీలక అంశాలను వెలుగులోకి తెచ్చింది.

పశ్చిమ తీరానికి భారీ ముప్పు: గుజరాత్, మహారాష్ట్ర, గోవా, కేరళ రాష్ట్రాలు ఉన్న పశ్చిమ తీర ప్రాంతం తీవ్రమైన వడగాల్పులను ఎదుర్కొంటోంది. ఇక్కడి 75 శాతానికి పైగా జిల్లాలు 'అత్యంత తీవ్రమైన' (Very High Risk) ఉష్ణోగ్రతల ముప్పులో ఉన్నాయి.

ఢిల్లీ పట్టణ ప్రాంతాలు: దేశ రాజధాని ఢిల్లీలోని సగానికి పైగా పట్టణ జిల్లాలు (Urban districts) పెరుగుతున్న ఉష్ణోగ్రతలతో అత్యంత తీవ్రమైన హీట్ రిస్క్ కేటగిరీలోకి చేరాయి.

వ్యవసాయానికి దెబ్బ: వ్యవసాయ పరంగా అత్యంత కీలకమైన ఉత్తరప్రదేశ్, బీహార్ రాష్ట్రాల్లోని ఇండో-గంగా మైదాన (Indo-Gangetic plains) ప్రాంతాల్లోని అనేక జిల్లాలు అధిక ముప్పు బారిన పడుతున్నాయి. దీని ప్రభావం పంటల దిగుబడిపై పడే అవకాశం ఉంది.

సమస్య వేడిగా ఉండటం కాదు.. ముందే రావడం

భారతదేశంలో పెరుగుతున్న ఎండల సంక్షోభం కేవలం 'వేసవి కాలం వేడిగా ఉండటం' వరకే పరిమితం కాలేదు. ఎండలు ఎంత త్వరగా వస్తున్నాయి? అవి ఎక్కడ ఎక్కువగా కేంద్రీకృతమవుతున్నాయి? వాతావరణ మార్పుల వల్ల ఎవరు ఎక్కువగా ప్రభావితం అవుతున్నారు? అనే విషయాలు ఈ నివేదిక ద్వారా స్పష్టమవుతున్నాయి. రాబోయే ఏప్రిల్, మే నెలల్లో ఎండల తీవ్రత మరింత పెరిగే అవకాశం ఉందని, ప్రజలు వడదెబ్బ బారిన పడకుండా అప్రమత్తంగా ఉండాలని నిపుణులు సూచిస్తున్నారు.