Iron Rod | షాకింగ్‌.. బాలుడి నోట్లోకి దూసుకెళ్లిన ఇనుప రాడ్..

Iron Rod | త్రినేత్ర న్యూస్ : గుజ‌రాత్ (Gujarat)లో షాకింగ్ ఘ‌ట‌న చోటు చేసుకుంది. ఆడుకుంటున్న స‌మ‌యంలో ప్ర‌మాద‌వ‌శాత్తు కింద‌ప‌డిపోవ‌డంతో ఓ ఐదేళ్ల బాలుడి నోట్లోకి ఇనుప రాడ్ దూసుకెళ్లింది. ఈ ఘ‌ట‌న పటాన్ జిల్లా (Patan district) సమీ తాలూకా వేద్ గ్రామంలో వెలుగు చూసింది. అయితే, వైద్యుల చొర‌వ‌తో అదృష్ట‌వశాత్తూ ఆ బాలుడు ప్రాణాల‌తో బ‌య‌ట‌ప‌డ్డాడు.

అధికారుల స‌మాచారం ప్ర‌కారం.. బాలుడు తన ఇంటి సమీపంలో ఆరుబయట ఆడుకుంటూ ప్రమాదవశాత్తు కిందపడిపోయాడు. ఆ సమయంలో అక్కడ ఉన్న ఒక పదునైన ఇనుప రాడ్ నేరుగా బాలుడి నోట్లోకి దూసుకెళ్లింది. దీంతో బాలుడికి తీవ్ర ర‌క్త‌స్రావ‌మైంది. నొప్పికి చిన్నారి అల్లాడిపోయాడు. అప్ర‌మ‌త్త‌మైన త‌ల్లిదండ్రులు వెంట‌నే బాలుడిని రాధ‌న్‌పూర్ ప్ర‌భుత్వ ఆసుప‌త్రికి (Radhanpur Government Hospital) తీసుకెళ్లారు.

బాలుడిని ప‌రీక్షించిన వైద్యులు ఇనుప రాడ్ ద‌వ‌డ‌లు, పంటి స‌మీపంలో లోతుగా ఇరుక్కుపోయిన‌ట్లు గుర్తించారు. రాడ్ ఉన్న స్థానం చాలా సున్నితమైనది కావడంతో దాన్ని తొలగించడానికి ప్రత్యేక వైద్య సహాయం అవసరమైంది. దీంతో వైద్య సిబ్బంది ఓ ప్రైవేట్ డెంట‌ల్ స‌ర్జ‌న్‌ను పిలిపించి శ‌స్త్ర‌చికిత్స చేసింది. వైద్యులు దాదాపు గంట‌పాటూ శ్ర‌మించి దవడకు, చుట్టుపక్కల కణజాలానికి ఎలాంటి హాని కలగకుండా బాలుడి నోట్లో ఇరుక్కుపోయిన రాడ్‌ను విజ‌య‌వంతంగా తొల‌గించారు. రాధన్‌పూర్ ప్రభుత్వ ఆసుపత్రి వైద్యులు, ప్రైవేట్ వైద్యులు సకాలంలో స్పందించి చేసిన కృషితో బాలుడి ప్రాణాలు నిలిచాయి. ఆప‌రేష‌న్ అనంత‌రం దంత వైద్యులు డాక్ట‌ర్ డీఎస్ సోధా మాట్లాడుతూ.. పిల్ల‌లు బ‌హిరంగ ప్ర‌దేశాల్లో ఆడుకునేట‌ప్పుడు త‌ల్లిదండ్రులు త‌గిన‌ జాగ్ర‌త్త‌లు వ‌హించాల‌ని, పిల్ల‌ల‌పై ప్ర‌త్యేక దృష్టి పెట్టాల‌ని సూచించారు.

Also Read..

త‌ప్పుడు కంటెంట్‌పై కొర‌డా.. మెటాకు కేంద్రం కీల‌క ఆదేశాలు

ఆసుప‌త్రి నుంచి ఎల్‌కే అద్వానీ డిశ్చార్జ్‌

టాంజానియాలో ఘనంగా బతుకమ్మ సంబరాలు