Bariatric Surgery Delhi | 16 ఏళ్లకే 275 కిలోల బరువు.. కారులో పట్టక వ్యాన్‌లో ఆసుపత్రికి: ఢిల్లీ బాలుడికి అరుదైన సర్జరీ

Bariatric Surgery Delhi | త్రినేత్ర.న్యూస్ : ఢిల్లీకి (Delhi) చెందిన 16 ఏళ్ల బాలుడు తీవ్రమైన ఊబకాయంతో అనారోగ్యానికి గురయ్యాడు. దాదాపు 275 కిలోల బరువు ఉండటంతో శ్వాస తీసుకోవడం కష్టంగా మారడం, అబ్స్ట్రక్టివ్ స్లీప్ ఆప్నియా (obstructive sleep apnoea), తీవ్రమైన చర్మ సంబంధిత ఇన్ఫెక్షన్లతో బాధపడుతూ న్యూఢిల్లీలోని సర్ గంగారామ్ హాస్పిటల్‌లో (Sir Ganga Ram Hospital) చేరాడు. అతనికి వైద్యులు విజయవంతంగా లాపరోస్కోపిక్ స్లీవ్ గాస్ట్రెక్టమీ (laparoscopic sleeve gastrectomy) సర్జరీ చేసి ప్రాణాపాయం నుంచి రక్షించారు.

మాటాడార్‌లో ఆసుపత్రికి తరలింపు

బాలుడి బరువు విపరీతంగా పెరిగిపోవడంతో అతడు సాధారణ కారులో (conventional car) పట్టలేదు. దీంతో అతడిని ఒక మాటాడార్ (Matador) వ్యాన్‌లో ఆసుపత్రికి తీసుకురావాల్సి వచ్చింది. శ్వాసకోశ, ఇతర సమస్యల కారణంగా సర్జరీకి ముందు దాదాపు రెండు వారాల పాటు పీడియాట్రిక్ ఇంటెన్సివ్ కేర్ యూనిట్‌లో (PICU) ఉంచి చికిత్స అందించారు. బాలుడి ఆరోగ్యాన్ని ముందుగా నిలకడగా ఉంచేందుకు డాక్టర్ అనిల్ సచ్‌దేవ్ నేతృత్వంలోని బృందం ఇంటెన్సివ్ కేర్ నిర్వహించింది.

20 మంది డాక్టర్లతో మెడికల్ బోర్డ్

బాలుడి బాడీ మాస్ ఇండెక్స్ (BMI) ఏకంగా 100 కు చేరుకోవడంతో ఈ కేసుకు సంబంధించి మల్టీడిసిప్లినరీ టీమ్ మూల్యాంకనం అవసరమైంది. పీడియాట్రిక్ క్రిటికల్ కేర్, బేరియాట్రిక్ సర్జరీ, కార్డియాలజీ, అనస్థీషియా సహా వివిధ విభాగాలకు చెందిన దాదాపు 20 మంది స్పెషలిస్ట్ డాక్టర్లు సర్జరీలో ఉండే రిస్క్‌ను నిశితంగా అంచనా వేశారు. కుటుంబ సభ్యులతో సుదీర్ఘంగా చర్చించిన అనంతరం, బేరియాట్రిక్ సర్జరీ (bariatric surgery) చేయడమే ఉత్తమమని వైద్య బృందం నిర్ణయించింది.

డాక్టర్ దక్ష్ సేథి, డాక్టర్ సుధీర్ కల్హన్, డాక్టర్ ముకుంద్ ఖేతన్, డాక్టర్ సువిరాజ్ జాన్‌లతో కూడిన సర్జన్ల బృందం ఈ లాపరోస్కోపిక్ సర్జరీని విజయవంతంగా పూర్తి చేసింది. "ఇది సాధారణ బేరియాట్రిక్ ఆపరేషన్ కాదు. బాలుడి వయసు, బరువు, స్లీప్ ఆప్నియాను దృష్టిలో ఉంచుకుని ప్రతి చిన్న విషయాన్ని జాగ్రత్తగా ప్లాన్ చేశాం" అని లీడ్ బేరియాట్రిక్ సర్జన్ డాక్టర్ దక్ష్ సేథి తెలిపారు. సర్జరీ తర్వాత బాలుడు త్వరగా కోలుకోవడంతో కేవలం మూడు రోజుల్లోనే ఆసుపత్రి నుంచి డిశ్చార్జ్ చేశారు.

రెండు నెలల్లో 50 కిలోల వెయిట్ లాస్

ఈ ఆపరేషన్ ఫలితాలు చాలా ప్రోత్సాహకరంగా ఉన్నాయని వైద్యులు వెల్లడించారు. సర్జరీ జరిగిన రెండు నెలల్లోనే బాలుడి బరువు 275 కిలోల నుంచి 223 కిలోలకు, అంటే దాదాపు 50 కిలోలు తగ్గింది. అయితే, కేవలం బరువు తగ్గించడమే తమ లక్ష్యం కాదని, బాలుడి దీర్ఘకాలిక ఆరోగ్యం, చురుకుదనం పెంచడం, జీవన నాణ్యతను మెరుగుపరచడమే తమ ప్రధాన ఉద్దేశమని సర్ గంగారామ్ హాస్పిటల్ బేరియాట్రిక్ సర్జరీ ఛైర్మన్ డాక్టర్ సుధీర్ కల్హన్ స్పష్టం చేశారు. భవిష్యత్తులో స్థిరంగా బరువు తగ్గేలా, ఆరోగ్యాన్ని మెరుగుపరిచేలా ఒక స్ట్రక్చర్డ్ వెయిట్ మేనేజ్‌మెంట్ ప్రోగ్రామ్ ద్వారా బాలుడిని పర్యవేక్షిస్తున్నారు.