Panipat Civil Hospital Crime | సీటీ స్కాన్ రూమ్‌లో దారుణం: మహిళపై సెక్యూరిటీ గార్డు లైంగిక దాడి.. చికిత్స పొందుతూ బాధితురాలి మృతి

• హర్యానాలోని పానిపట్ సివిల్ ఆసుపత్రిలో (Panipat Civil Hospital) సీటీ స్కాన్ రూమ్‌లో 57 ఏళ్ల మహిళపై లైంగిక దాడి
• టెక్నీషియన్ విధుల్లో ఉన్న రాకేష్ అనే సెక్యూరిటీ గార్డు (Security Guard) ఈ అఘాయిత్యానికి పాల్పడినట్లు గుర్తింపు
• గుండె సంబంధిత సమస్యతో బాధపడుతున్న బాధితురాలు
• రోహతక్ పీజీఐ (PGI) ఆసుపత్రిలో చికిత్స పొందుతూ మంగళవారం మృతి
• నిందితుడిపై భారతీయ న్యాయ సంహిత (BNS) చట్టం కింద కేసు నమోదు
• అతడిని, అసలు టెక్నీషియన్‌ను విధుల నుంచి తొలగించిన ప్రైవేట్ సంస్థ

Panipat Civil Hospital Crime | త్రినేత్ర.న్యూస్ : హర్యానాలోని పానిపట్ సివిల్ హాస్పిటల్‌లో (Panipat Civil Hospital) అత్యంత దారుణమైన ఘటన వెలుగుచూసింది. ఆదివారం రాత్రి సీటీ స్కాన్ (CT scan) కోసం వెళ్లిన 57 ఏళ్ల మహిళపై.. టెక్నీషియన్ అవతారం ఎత్తిన ఓ సెక్యూరిటీ గార్డు (Security guard) లైంగిక దాడికి పాల్పడ్డాడు. తీవ్ర అనారోగ్యంతో బాధపడుతున్న ఆ బాధితురాలు వేరే ఆసుపత్రిలో చికిత్స పొందుతూ మంగళవారం మృతి చెందడంతో ఈ ఘటన తీవ్ర కలకలం రేపుతోంది.

ఒంటరిగా లోపలికి తీసుకెళ్లి

గుండె సంబంధిత సమస్యతో బాధపడుతున్న బాధితురాలు ఆగస్టు 16న రాత్రి ఆసుపత్రిలో చేరారు. వైద్యుల సూచన మేరకు ఎక్స్-రే (X-ray), సీటీ స్కాన్ కోసం ఆమెను తీసుకెళ్లారు. కుటుంబ సభ్యులను బయటే ఉంచి, రాకేష్ అనే సెక్యూరిటీ గార్డు ఆమెను ఒంటరిగా స్కాన్ రూమ్‌లోకి తీసుకెళ్లాడు. ఆ సమయంలో అక్కడ వేరే వైద్య సిబ్బంది ఎవరూ లేరు. ఇదే అదనుగా భావించిన అతడు ఆమెపై లైంగిక దాడికి పాల్పడ్డాడు. జరిగిన విషయాన్ని ఎవరికైనా చెబితే తీవ్ర పరిణామాలు ఉంటాయని బెదిరింపులకు కూడా దిగాడు.

కుటుంబ సభ్యులకు చెప్పడంతో వెలుగులోకి

స్కాన్ గది నుంచి బయటకు వచ్చేసరికి ఆ మహిళ సగం అపస్మారక స్థితిలో (Semi-conscious state) ఉంది. కాస్త స్పృహలోకి రాగానే లోపల జరిగిన దారుణాన్ని కుటుంబ సభ్యులకు వివరించింది. దీంతో వారు వెంటనే డయల్ 112 (Dial 112) కు కాల్ చేసి పోలీసులకు సమాచారం అందించారు. ఆ తర్వాత మెరుగైన వైద్యం కోసం రోహతక్‌లోని ప్రభుత్వ పీజీఐ (PGI) ఆసుపత్రికి తరలించగా, ఆమె చికిత్స పొందుతూ ప్రాణాలు విడిచారు.

బాధితురాలి ఫిర్యాదు మేరకు సిటీ పోలీస్ స్టేషన్ ఎస్‌హెచ్‌ఓ దేవేందర్ కుమార్ స్పందిస్తూ.. భారతీయ న్యాయ సంహిత (BNS) సెక్షన్లు 64(1), 351(3) కింద నిందితుడిపై ఎఫ్ఐఆర్ (FIR) నమోదు చేసినట్లు వెల్లడించారు.

నిందితుడిపై వేటు.. మహిళా సంఘాల ఆగ్రహం

ఈ ఘటనపై మహిళా హక్కుల కోసం పనిచేసే 'నారీ తు నారాయణి' సంస్థ అధ్యక్షురాలు సవితా ఆర్య తీవ్ర ఆగ్రహం వ్యక్తం చేశారు. స్కాన్ రూమ్‌లో కనీసం ఒక మహిళా సిబ్బంది కూడా లేకుండా.. పురుష సిబ్బంది తలుపులు వేసి స్కాన్ చేయడం తీవ్ర ఆందోళన కలిగించే విషయమన్నారు. నిందితుడిని వెంటనే అరెస్ట్ చేయాలని డిమాండ్ చేశారు.

మరోవైపు, పానిపట్ సివిల్ సర్జన్ డాక్టర్ విజయ్ మాలిక్ మాట్లాడుతూ.. నిందితుడు ప్రభుత్వ ఉద్యోగి కాదని స్పష్టం చేశారు. పీపీపీ (PPP) మోడల్ కింద హాస్పిటల్‌లో సీటీ స్కాన్, అల్ట్రాసౌండ్ సేవలు అందించే 'హెల్త్‌మ్యాప్' (Healthmap) అనే ప్రైవేట్ సంస్థలో అతడు పనిచేస్తున్నాడని తెలిపారు. సెక్యూరిటీ గార్డుగా ఉంటూ టెక్నీషియన్‌గా వ్యవహరించిన రాకేశ్‌తో పాటు.. అతడికి ఆ బాధ్యతలు అప్పగించిన అసలు టెక్నీషియన్ సచిన్‌ను కూడా ఆ ప్రైవేట్ సంస్థ ఉద్యోగంలో నుంచి తొలగించినట్లు డాక్టర్ మాలిక్ వివరించారు. ఇకపై మహిళా రోగులకు స్కాన్ చేసేటప్పుడు కచ్చితంగా మహిళా సిబ్బంది ఉండేలా చూస్తామని యాజమాన్యం హామీ ఇచ్చినట్లు ఆయన తెలిపారు.