Gold Chain Snatching in Metpally | మెట్‌పల్లిలో తెల్లవారుజామున దారుణం: బాత్రూమ్‌కు వెళ్తుండగా మహిళ మెడలోంచి గొలుసు లాకెళ్లిన దొంగ

Gold Chain Snatching in Metpally | జగిత్యాల జిల్లా మెట్‌పల్లి పట్టణంలో దొంగలు రెచ్చిపోతున్నారు. తాళం వేసిన ఇళ్లే కాదు, మనుషులు ఉన్న ఇళ్లను కూడా వదలడం లేదు. తాజాగా దుబ్బవాడ ప్రాంతంలో తెల్లవారుజామున ఓ మహిళ మెడలోంచి పుస్తెలతాడును లాక్కెళ్లిన ఘటన కలకలం రేపింది.

ఘటన వివరాల్లోకి వెళ్తే.. మెట్‌పల్లి పట్టణంలోని దుబ్బవాడకు చెందిన ఒక మహిళ శనివారం తెల్లవారుజామున నిద్రలేచి తన ఇంటి ఆవరణలో ఉన్న బాత్రూమ్‌కు వెళ్లేందుకు బయటకు వచ్చింది. అప్పటికే అక్కడ మాటు వేసిన దొంగ, ఆమెను గమనించి గోడ దూకి లోపలికి ప్రవేశించాడు. ఆమె తేరుకునే లోపే మెడలోని పుస్తెలతాడును (గొలుసు) బలంగా లాక్కున్నాడు.

భయాందోళనలో స్థానికులు

మహిళ కేకలు వేయడంతో చుట్టుపక్కల వారు వచ్చేలోపే నిందితుడు మళ్లీ గోడ దూకి చీకట్లో పరారయ్యాడు. తెల్లవారుజామున, అది కూడా ఇంటి ఆవరణలోనే ఇలాంటి ఘటన జరగడంతో దుబ్బవాడ ప్రజలు తీవ్ర భయాందోళనకు గురవుతున్నారు.

బాధితురాలు ఈ విషయంపై పోలీసులకు సమాచారం అందించారు. ఘటనా స్థలానికి చేరుకున్న పోలీసులు వివరాలు సేకరించి, నిందితుడి కోసం గాలింపు చేపట్టారు. సీసీ టీవీ కెమెరాల ఆధారంగా దొంగను గుర్తించే పనిలో పడ్డారు. ఇంటి ఆవరణలో ఉన్నప్పుడు కూడా మహిళలు అప్రమత్తంగా ఉండాలని పోలీసులు సూచిస్తున్నారు.