Iran US conflict | హార్ముజ్ జలసంధి ఓపెన్ చేయడానికి ఇరాన్ 3 కండిషన్లు.. ట్రంప్ ఒప్పుకుంటారా?

Iran US conflict | త్రినేత్ర.న్యూస్ : అంతర్జాతీయ వాణిజ్యానికి అత్యంత కీలకమైన హార్ముజ్ జలసంధి (Strait of Hormuz) మూసివేతతో ప్రపంచవ్యాప్తంగా చమురు సంక్షోభం ముంచుకొస్తున్న వేళ, ఇరాన్ ఓ కొత్త ప్రతిపాదనను తెరపైకి తెచ్చింది. జలసంధిని తిరిగి తెరిచి, యుద్ధాన్ని ముగించేందుకు అమెరికా ముందు ఓ డీల్ ఉంచింది. అయితే, ఈ ప్రతిపాదన పట్ల అమెరికా అధ్యక్షుడు డొనాల్డ్ ట్రంప్ అంత సుముఖంగా లేరని వాల్ స్ట్రీట్ జర్నల్, న్యూయార్క్ టైమ్స్ కథనాలు వెల్లడించాయి.

ఓమన్, పాకిస్థాన్ దేశాల మధ్యవర్తులతో వారాంతంలో జరిగిన చర్చల్లో ఇరాన్ విదేశాంగ మంత్రి అబ్బాస్ అరాఘ్చీ ఈ కొత్త డీల్‌ను ప్రతిపాదించారు.

ఇరాన్ పెట్టిన 3 షరతులు ఇవే..

హార్ముజ్ జలసంధిని తిరిగి తెరవాలంటే ఇరాన్ ప్రధానంగా మూడు షరతులు పెట్టింది.

దిగ్బంధనం ఎత్తివేత: అమెరికా తమ దేశంపై, తమ ఓడరేవులపై విధించిన నావికా దిగ్బంధనాన్ని (Naval blockade) పూర్తిగా ఎత్తివేయాలి.

యుద్ధానికి ముగింపు: మిడిల్ ఈస్ట్‌లో జరుగుతున్న యుద్ధాన్ని తక్షణమే ముగించాలి.

అణు చర్చల వాయిదా: టెహ్రాన్ అణు కార్యక్రమానికి సంబంధించిన చర్చలను దౌత్య ప్రక్రియలో తదుపరి దశకు వాయిదా వేయాలి.

ట్రంప్ ఎందుకు అసంతృప్తిగా ఉన్నారు?

ఇరాన్ చేసిన ఈ తాజా ప్రతిపాదనపై డొనాల్డ్ ట్రంప్, ఆయన జాతీయ భద్రతా బృందం తీవ్ర సందేహాలు వ్యక్తం చేస్తోంది. ట్రంప్ అసంతృప్తికి ప్రధాన కారణం.. అణు కార్యక్రమంపై చర్చలను ఇరాన్ వాయిదా వేయాలనుకోవడమే. ఇరాన్ చేతికి అణ్వాయుధాలు చిక్కకూడదని ట్రంప్ పదే పదే స్పష్టం చేస్తున్నారు. టెహ్రాన్ అణ్వాయుధాలను అభివృద్ధి చేయకుండా అడ్డుకోవడమే అమెరికా ప్రధాన లక్ష్యాల్లో ఒకటి.

అమెరికా విదేశాంగ మంత్రి మార్కో రూబియో కూడా ఇరాన్ అణు కార్యక్రమాన్ని పక్కనపెట్టే ఎలాంటి ఒప్పందాన్ని అంగీకరించబోమని తేల్చి చెప్పారు. "వారు (ఇరాన్) ఇలా సులభంగా తప్పించుకోవడాన్ని మేము అనుమతించలేము. భవిష్యత్తులో ఇరాన్ ఎట్టి పరిస్థితుల్లోనూ అణ్వాయుధాల వైపు దూసుకుపోకుండా కచ్చితంగా నిరోధించే ఒప్పందం మాత్రమే మాకు కావాలి" అని రూబియో ఫాక్స్ న్యూస్‌కు ఇచ్చిన ఇంటర్వ్యూలో పేర్కొన్నారు.

వైట్ హౌస్ స్పందన.. ఇరాన్‌పై ట్రంప్ సెటైర్లు

ఇరాన్ ప్రతిపాదనపై వైట్ హౌస్ అధికారికంగా స్పందించలేదు. "మేము మీడియాతో చర్చలు జరపము. మా రెడ్ లైన్స్ ఏమిటో మేము స్పష్టంగా ఉన్నాము. అమెరికా ప్రజలకు, ప్రపంచానికి మేలు జరిగే డీల్ మాత్రమే అధ్యక్షుడు చేస్తారు" అని వైట్ హౌస్ ప్రతినిధి ఒలివియా వేల్స్ ఒక ప్రకటనలో తెలిపారు.

ఇక, ట్రంప్ తన సోషల్ మీడియా ప్లాట్‌ఫామ్ 'ట్రూత్ సోషల్ (Truth Social)' వేదికగా ఇరాన్ నాయకత్వంపై సెటైర్లు వేశారు. "ఇరాన్‌కు తమ నాయకుడు ఎవరో కూడా అర్థం కాని కష్టకాలం నడుస్తోంది. యుద్ధరంగంలో ఘోరంగా ఓడిపోతున్న 'హార్డ్‌లైనర్లు', ఏమాత్రం మితవాదులు కాని 'మోడరేట్ల' మధ్య జరుగుతున్న అంతర్గత పోరు చాలా క్రేజీగా ఉంది!" అని ట్రంప్ ఎద్దేవా చేశారు.

ట్రంప్‌పై పెరుగుతున్న ఒత్తిడి

శాంతియుత సమయాల్లో ప్రపంచంలో ట్రేడ్ అయ్యే ఆయిల్, గ్యాస్‌లో ఐదో వంతు హార్ముజ్ జలసంధి గుండానే రవాణా అవుతుంది. ఇప్పుడు ఆ మార్గం మూసుకుపోవడంతో గ్లోబల్ ఎనర్జీ, ఫైనాన్షియల్ మార్కెట్లలో తీవ్ర అనిశ్చితి నెలకొంది. కీలకమైన మిడ్‌టెర్మ్ ఎన్నికల ముందు చమురు, గ్యాసోలిన్ ధరలు ఆకాశాన్ని తాకుతుండటం ట్రంప్‌కు తలనొప్పిగా మారింది. మరోవైపు గల్ఫ్ మిత్రదేశాలు కూడా ఇబ్బందులు పడుతున్నాయి. ఈ ఆంక్షల వల్ల ఎరువులు, ఆహారం, ఇతర నిత్యావసరాల ధరలు పెరిగిపోతుండటంతో ప్రపంచ దేశాల నుంచి సైతం దిగ్బంధనాన్ని ఎత్తివేయాలన్న డిమాండ్ పెరుగుతోంది. ఈ టైమ్‌లో ఈ డీల్‌పై అమెరికా ఎలాంటి నిర్ణయం తీసుకుంటుందన్నది ఆసక్తికరంగా మారింది.