Balochistan Bomb Blast | పాక్ సైనికుల రైలుపై ఆత్మాహుతి దాడి.. 24 మంది మృతి

Balochistan Bomb Blast | త్రినేత్ర.న్యూస్ : పాకిస్థాన్‌లోని అల్లర్ల ప్రభావిత ప్రాంతమైన బలూచిస్థాన్‌లో ఆదివారం ఘోర ఉగ్రదాడి చోటుచేసుకుంది. క్వెట్టాలోని చమన్ ఫటక్ సమీపంలో సైనికులు ప్రయాణిస్తున్న ఓ రైలును పేలుడు పదార్థాలతో ఉన్న కారుతో ఢీకొట్టారు. ఈ ఆత్మాహుతి (సూసైడ్) దాడిలో కనీసం 24 మంది మృత్యువాత పడగా, పలువురు తీవ్రంగా గాయపడ్డారు. మృతుల్లో ఎక్కువ మంది ఆర్మీ జవాన్లు, వారి కుటుంబ సభ్యులే ఉన్నారు. మంగళవారం రాబోయే ఈద్ పండుగను తమ సొంతూళ్లలో జరుపుకునేందుకు వీరంతా జాఫర్ ఎక్స్‌ప్రెస్ రైలులో పెషావర్ వెళ్తుండగా ఈ దారుణం జరిగింది.

భారీ పేలుడు.. చెలరేగిన మంటలు

పేలుడు ధాటికి రెండు రైలు బోగీలు పట్టాలు తప్పి బోల్తా పడ్డాయి. వెంటనే వాటిల్లో మంటలు చెలరేగాయి. దట్టమైన నల్లటి పొగ ఆ ప్రాంతమంతా కమ్ముకుంది. ఘటనా స్థలంలో ఎటు చూసినా చెల్లాచెదురుగా పడి ఉన్న మృతదేహాలు, రక్తపు మడుగులో ఉన్న క్షతగాత్రులే కనిపించారు. భద్రతా బలగాలు సహాయక చర్యలు చేపట్టి, బాధితులను స్ట్రెచర్ల మీద ఆసుపత్రులకు తరలించాయి. పేలుడు తీవ్రతకు రైల్వే ట్రాక్‌కు 25-30 మీటర్ల దూరంలో పార్క్ చేసిన కార్లు కూడా పూర్తిగా కాలిపోయాయి. పక్కనే ఉన్న ఒక బహుళ అంతస్తుల భవనం అద్దాలు పగిలి, గోడలు కూలిపోయి తీవ్రంగా దెబ్బతింది.

దాడికి బాధ్యత మాదే: బీఎల్ఏ ప్రకటన

ఈ దారుణ మారణకాండకు తామే బాధ్యులమని బలూచ్ లిబరేషన్ ఆర్మీ (బీఎల్ఏ) ప్రకటించింది. తమ గ్రూప్‌నకు చెందిన 'మజీద్ బ్రిగేడ్' అనే ఆత్మాహుతి దళం ఈ ఫిదాయీ దాడిని పక్కా ప్లాన్‌తో అమలు చేసిందని వెల్లడించింది. దీనికి సంబంధించిన పూర్తి వివరాలను, ప్రాణ నష్టం వివరాలను త్వరలోనే మీడియాకు విడుదల చేస్తామని ఒక ప్రకటనలో తెలిపింది.

ఈ దాడిని పాక్ ప్రధాని షెహబాజ్ షరీఫ్ తీవ్రంగా ఖండించారు. ఇదొక పిరికిపంద చర్య అని మండిపడ్డారు.

బలూచిస్థాన్‌లో అసలేం జరుగుతోంది?

ఇరాన్, ఆఫ్ఘనిస్థాన్ సరిహద్దులను పంచుకునే బలూచిస్థాన్ ప్రావిన్స్ రాజధానే ఈ క్వెట్టా. ఇక్కడ దశాబ్దాలుగా అలజడులు, దాడులు జరుగుతూనే ఉన్నాయి. తమ ప్రాంతానికి స్వయంప్రతిపత్తితో పాటు, సహజ వనరుల్లో తమకు ఎక్కువ వాటా కావాలని స్థానిక బలూచ్ వేర్పాటువాదులు పాక్ ప్రభుత్వంతో పోరాడుతున్నారు. ఈ క్రమంలోనే బీఎల్ఏ వంటి గ్రూపులు పాక్ భద్రతా బలగాలతో పాటు, చైనా-పాకిస్థాన్ ఎకనామిక్ కారిడార్ ప్రాజెక్టులను లక్ష్యంగా చేసుకుని తరచుగా దాడులకు పాల్పడుతున్నాయి.