MMC Commissioner Vinay Krishna Reddy | అక్రమ నిర్మాణాలు చేపడితే భవనాలు సీజ్: మల్కాజిగిరి మున్సిపల్ కమిషనర్ వినయ్ కృష్ణా రెడ్డి వార్నింగ్

MMC Commissioner Vinay Krishna Reddy | త్రినేత్ర.న్యూస్ : నగరపాలక సంస్థ నిబంధనలను బేఖాతరు చేస్తూ, అనుమతులకు విరుద్ధంగా భవన నిర్మాణాలు చేపడితే కఠిన చర్యలు తప్పవని మల్కాజిగిరి మున్సిపల్ కార్పొరేషన్ (MMC) కమిషనర్ వినయ్ కృష్ణా రెడ్డి హెచ్చరించారు. ఉల్లంఘనలకు పాల్పడే వారికి కేవలం జరిమానా విధించడమే కాకుండా, ఏకంగా భవనాలను సీజ్ చేస్తామని ఆయన స్పష్టం చేశారు.

ప్రభుత్వం ప్రతిష్టాత్మకంగా చేపట్టిన '99 రోజుల కార్యాచరణ - ప్రజా పాలన - ప్రగతి ప్రణాళిక'లో భాగంగా బుధవారం అధికారుల బృందంతో కలిసి కమిషనర్ విస్తృత పర్యటన చేపట్టారు. తిరుమల నగర్, కృష్ణా నగర్, నాచారం, రాఘవేంద్ర నగర్, కార్తికేయ నగర్ ప్రాంతాల్లో పర్యటించి క్షేత్రస్థాయి పరిస్థితులను సమీక్షించారు.

నాచారంలో వాణిజ్య భవనాలు సీజ్

టౌన్ ప్లానింగ్ నిబంధనలు ఉల్లంఘించిన వారిపై మున్సిపల్ అధికారులు కొరడా ఝుళిపించారు. నాచారంలో చేపట్టిన తనిఖీల్లో తీవ్ర ఉల్లంఘనలు వెలుగుచూశాయి.

ఎలిఫెంట్ సర్కిల్ వద్ద అక్రమ నిర్మాణం: నాచారం ఎలిఫెంట్ సర్కిల్ వద్ద ఉన్న ఒక వాణిజ్య భవనానికి సెల్లార్ (G+3) అంతస్తులకు మాత్రమే అనుమతి ఉండగా, అదనంగా మరో రెండు అంతస్తులు నిర్మించినట్లు అధికారులు గుర్తించారు. దీనికి తోడు రహదారిని సైతం ఆక్రమించారు. ఈ తీవ్రమైన ఉల్లంఘనల నేపథ్యంలో టౌన్ ప్లానింగ్ అధికారులు ఆ భవనాన్ని సీజ్ చేశారు.

రాఘవేంద్ర నగర్‌లో మరో భవనంపై వేటు: నాచారం పోలీస్ స్టేషన్ ఎదురుగా ఉన్న రాఘవేంద్ర నగర్‌లోనూ టౌన్ ప్లానింగ్ అధికారులు ఒక వాణిజ్య భవనాన్ని సీజ్ చేశారు. అనుమతించిన ప్లాన్‌కు విరుద్ధంగా నిర్మాణం చేపట్టడమే కాకుండా, సుమారు రూ. 14 లక్షల ఆస్తి పన్నును (Property Tax) ఏళ్లుగా చెల్లించకుండా ఎగవేసినట్లు గుర్తించారు. యజమానిపై తగిన చట్టపరమైన చర్యలు తీసుకోవాలని కమిషనర్ ఆదేశించారు.

వాణిజ్య సముదాయాల్లో ట్రేడ్ లైసెన్సుల తనిఖీ

తిరుమల నగర్‌లో పర్యటించిన కమిషనర్ వినయ్ కృష్ణా రెడ్డి, వాణిజ్య సముదాయాల్లో ట్రేడ్ లైసెన్సులను స్వయంగా పరిశీలించారు. సరైన నిర్వహణ లేని ప్లాంటర్ బాక్స్‌లను వెంటనే తొలగించాలని ఆదేశించారు. అలాగే, కొత్తగా నిర్మిస్తున్న భవనాలకు తప్పనిసరిగా సరైన సెట్‌బ్యాక్‌లు పాటించేలా చూడాలని అధికారులకు సూచించారు.

మహిళా సంఘాలకు (SHG) ఆర్థిక భరోసా

మహిళా సాధికారతపై కమిషనర్ ప్రత్యేక దృష్టి సారించారు. కృష్ణా నగర్‌లో టిఫిన్ సెంటర్ నిర్వహిస్తున్న స్వయం సహాయక సంఘం (SHG) సభ్యులతో ఆయన ముఖాముఖి సమావేశమయ్యారు. వారికి అందుబాటులో ఉన్న ఆర్థిక సహాయం, ప్రభుత్వ రుణ సౌకర్యాల గురించి వివరించారు. వారి ఉపాధిని మరింత బలోపేతం చేసి, స్థిరమైన ఆదాయం పొందే దిశగా మార్గనిర్దేశం చేశారు.

నిర్ణీత వ్యవధిలోగా నాలాల డీసిల్టింగ్ పూర్తి కావాలి

కార్తికేయ నగర్‌లో జరుగుతున్న నాలా డీసిల్టింగ్ (పూడికతీత) పనులను కమిషనర్ పరిశీలించారు. వర్షాకాలం దృష్ట్యా నీటి ప్రవాహానికి ఎలాంటి ఆటంకం లేకుండా చూడాలన్నారు. పనుల పురోగతిని సమీక్షించిన ఆయన, నిర్ణీత కాలవ్యవధిలోగా పూడికతీత పనులను పూర్తి చేసి, పక్కాగా నిర్వహణ చేపట్టాలని సంబంధిత అధికారులను ఆదేశించారు.