Feel the Jail | రూ.500 ఇస్తే చంచల్‌గూడ జైల్లో వేస్తారు.. భయపడి బయటకొస్తే రూ.1000 ఫైన్! ఏంటి ఈ ‘ఫీల్ ది జైల్’?

• చంచల్‌గూడ జైలులో 'ఫీల్ ది జైల్
• ఒక్క రోజు ఖైదీగా మారే అవకాశం
• హైదరాబాద్‌లో సరికొత్త అనుభూతి
• రూ.500తో ఒక్క రోజు ఖైదీగా జైలు జీవితం

Feel the Jail | త్రినేత్ర.న్యూస్ : వీకెండ్ వస్తే చాలు.. కేఫ్‌లు, మాల్స్, సినిమా థియేటర్లకు వెళ్లడం సాధారణం. కానీ, ఈ వీకెండ్‌లో ఏదైనా కొత్తగా, భిన్నంగా ట్రై చేయాలనుకుంటున్నారా? అయితే హైదరాబాద్‌లోని చంచల్‌గూడ జైలు మీకు స్వాగతం పలుకుతోంది. వినడానికి ఆశ్చర్యంగా ఉన్నా ఇది నిజం! తెలంగాణ జైళ్ల శాఖ ఆధ్వర్యంలో చంచల్‌గూడ సెంట్రల్ జైలు ప్రాంగణంలోని స్టేట్ ఇన్‌స్టిట్యూట్ ఆఫ్ కరెక్షనల్ అడ్మినిస్ట్రేషన్ వద్ద సరికొత్త 'జైలు మ్యూజియం'తో పాటు 'ఫీల్ ది జైల్' కార్యక్రమాన్ని ప్రారంభిస్తున్నారు.

సంగారెడ్డి నుంచి చంచల్‌గూడకు

నిజానికి ఈ 'ఫీల్ ది జైల్' కార్యక్రమం 2016లోనే సంగారెడ్డి హెరిటేజ్ జైలు మ్యూజియంలో ప్రారంభమై విశేష ఆదరణ పొందింది. అయితే కోవిడ్ సమయంలో ఆ పురాతన భవనం దెబ్బతినడం, వస్తువులు పాడవడంతో.. ఇప్పుడు ఈ కార్యక్రమాన్ని మరింత మెరుగైన వసతులతో చంచల్‌గూడ జైలుకు మార్చారు. ఈ ప్రాజెక్టు ముఖ్య ఉద్దేశం వినోదం కాదు.. స్వేచ్ఛ విలువను తెలియజేయడం, నేరాల వల్ల కలిగే పరిణామాలపై ప్రజల్లో, ముఖ్యంగా యువతలో అవగాహన పెంచడం.

ఒక్క రోజు ఖైదీగా.. దినచర్య ఎలా ఉంటుందంటే?

ఇక్కడ మీరు కేవలం సందర్శకుడిగా వెళ్లరు. 24 గంటల పాటు పూర్తి స్థాయి ఖైదీగా జీవించాల్సి ఉంటుంది. ఇది పర్యాటకులను ఆకర్షించే ఫేక్ ఎక్స్‌పీరియన్స్ కాదు, నూటికి నూరు శాతం రియాలిటీ.

నియమాలు: లోపలికి వెళ్లగానే మీ మొబైల్ ఫోన్లు, పర్సులు, ఇతర వ్యక్తిగత వస్తువులను అధికారులకు అప్పగించాలి. ఈ టైమ్‌లో ఎలాంటి ఎలక్ట్రానిక్ గ్యాడ్జెట్స్ అనుమతించరు. వాటిని లాకర్లలో భద్రపరుస్తారు.

దుస్తులు: మీకు స్వచ్ఛమైన ఖద్దరు దుస్తులు, పడుకోవడానికి ఒక చాప, దుప్పటి ఇస్తారు.

దినచర్య: ఖైదీల మాదిరిగానే ఉదయం 5 గంటలకే నిద్రలేవాలి. మీ సెల్‌ను మీరే శుభ్రం చేసుకోవాలి. మొక్కలు నాటడం లేదా తోటపని లాంటి పనులు చేయాల్సి ఉంటుంది.

భోజనం: జైలు మాన్యువల్ ప్రకారం ఖైదీలకు పెట్టే ఆహారమే (ఉప్మా, అన్నం, పప్పు, సాంబార్/రసం) ఇక్కడ అల్యూమినియం లేదా స్టీల్ ప్లేట్లలో వడ్డిస్తారు.

ఫీజు, జరిమానా

ఈ 24 గంటల జైలు జీవిత అనుభూతి కోసం సుమారు రూ.500 ఫీజుగా నిర్ణయించారు. అయితే, జైలు వాతావరణంలో ఉండలేక 24 గంటలు పూర్తి కాకముందే మధ్యలో బయటకు వచ్చేయాలనుకుంటే మాత్రం రూ.1,000 జరిమానా చెల్లించాల్సి ఉంటుంది.

చంచల్‌గూడ జైలు మ్యూజియం ప్రత్యేకతలు

'ఫీల్ ది జైల్'తో పాటు ఇక్కడ ఒక అద్భుతమైన మ్యూజియాన్ని కూడా ఏర్పాటు చేశారు. ప్రాచీన కాలం నాటి శిక్షల నుంచి ఆధునిక జైలు సంస్కరణల వరకు జరిగిన పరిణామాలను ఇక్కడ చూడవచ్చు. పాతకాలపు సంకెళ్లు, చేనేత యంత్రాలు, పురాతన జైలు గదులను కళ్లకు కట్టినట్లు ప్రదర్శనలో ఉంచారు. కోర్టు విచారణలు, ములాఖత్‌లు ఎలా ఉంటాయో ఆడియో-విజువల్స్ ద్వారా వివరిస్తారు. ఇది సోమవారం నుంచి శనివారం వరకు ఉదయం 8:00 గంటల నుండి సాయంత్రం 5:00 గంటల వరకు తెరిచి ఉంటుంది (ఆదివారం సెలవు).

బుకింగ్ ఎలా చేసుకోవాలి?

ప్రస్తుతం ఈ 'ఫీల్ ది జైల్' కార్యక్రమానికి ఎలాంటి ఆన్‌లైన్ పోర్టల్ లేదు. ఆసక్తి ఉన్నవారు ఒక రోజు ముందే జైలు అధికారులను ఫోన్ ద్వారా సంప్రదించి బుక్ చేసుకోవాలి. వెళ్లేటప్పుడు ఆధార్ లేదా ఓటర్ ఐడీ కార్డ్ (విదేశీయులైతే పాస్‌పోర్ట్) తప్పనిసరిగా తీసుకెళ్లాలి.

సంప్రదించాల్సిన నంబర్లు: 040-24527846, 040-24528877.

ఏప్రిల్ 28న ప్రారంభం కావాల్సిన ఈ జైలు మ్యూజియం అనివార్య కారణాల వల్ల వాయిదా పడింది. మే మొదటి వారంలో ఇది సందర్శకులకు పూర్తిగా అందుబాటులోకి రానుంది.

లగ్జరీకి బదులు రియాలిటీని, కంఫర్ట్‌కు బదులు జీవిత పాఠాన్ని నేర్పే ఈ సరికొత్త ఎక్స్‌పీరియన్స్ కోసం మీరు సిద్ధమేనా?