Transgenders extortion Hyderabad BMW | లగ్జరీ కారు కొన్న పాపానికి రూ.2 లక్షలు ఇవ్వాలా? హైదరాబాద్‌లో BMW డెలివరీ వేళ ట్రాన్స్‌జెండర్ల బెదిరింపులు

Transgenders extortion Hyderabad BMW | త్రినేత్ర.న్యూస్ : కొత్త లగ్జరీ కారు కొన్నామన్న ఆనందం ఆ యజమానికి కొన్ని నిమిషాలు కూడా నిలవలేదు. హైదరాబాద్ నగరంలో కొత్తగా కొనుగోలు చేసిన బీఎండబ్ల్యూ (BMW) కారు డెలివరీ తీసుకునేందుకు వచ్చిన ఒక యువకుడికి ఊహించని చేదు అనుభవం ఎదురైంది. షోరూమ్ వద్దే సదరు యువకుడిని కొందరు ట్రాన్స్‌జెండర్లు అడ్డగించి, ఏకంగా రూ.2 లక్షల రూపాయలు డిమాండ్ చేస్తూ నడిరోడ్డుపై నానా హంగామా సృష్టించారు.

సాధారణంగా కొత్త వాహనాలు కొన్నప్పుడు లేదా ఇళ్ల వద్ద వేడుకలు జరిగినప్పుడు ట్రాన్స్‌జెండర్లు వచ్చి కొంత బహుమతి (షగున్) తీసుకోవడం ఆనవాయితీగా వస్తోంది. అయితే ఇక్కడ ఆ డిమాండ్ శృతిమించి ఏకంగా లక్షల్లోకి చేరింది. కొత్త బీఎండబ్ల్యూ కారు కనిపిస్తే చాలు వేలల్లో కాదు.. ఏకంగా రూ.2 లక్షలు ఇవ్వాల్సిందేనంటూ పట్టుబట్టారు. బాధితుడు తన వద్ద ఉన్నంతలో కొంత మొత్తం ఇస్తానని బతిమాలినా వారు ససేమిరా ఒప్పుకోలేదు.

క్యూఆర్ కోడ్ చూపిస్తూ ఆన్‌లైన్ వసూళ్లు!

బాధితుడు నగదు లేదని చెప్పేసరికి వారు ఏకంగా తమ ఫోన్లలోని యూపీఐ క్యూఆర్ కోడ్ (QR Code) తీసి యువకుడి ముందు పెట్టారు. అక్కడికక్కడే ఆన్‌లైన్ ద్వారా రూ.2 లక్షలు పంపాలని తీవ్ర ఒత్తిడి తెచ్చారు. అంత పెద్ద మొత్తం ఇవ్వడం సాధ్యం కాదని ఆ యువకుడు తేల్చి చెప్పడంతో పరిస్థితి ఒక్కసారిగా ఉద్రిక్తంగా మారింది.

ఆగ్రహానికి గురైన వారు అసభ్యకరంగా ప్రవర్తిస్తూ రోడ్డుపైనే బైఠాయించి వాహన రాకపోకలకు అంతరాయం కలిగించారు. డెలివరీ తీసుకుంటున్న వేళ ఇంతటి భయానక వాతావరణం ఏర్పడటంతో ఆ యువకుడు తీవ్ర భయాందోళనలకు గురయ్యాడు. ఇటీవల నగరంలో లగ్జరీ కార్ల షోరూమ్‌లను టార్గెట్ చేసుకుని ఇలాంటి భారీ బలవంతపు వసూళ్లకు పాల్పడుతున్న ముఠాలపై పోలీసులు కఠిన చర్యలు తీసుకోవాలని వాహనదారులు విజ్ఞప్తి చేస్తున్నారు. గృహ ప్రవేశాలు, పెళ్లిళ్లు లాంటి శుభకార్యాల్లోనూ ట్రాన్స్‌జెండర్లు భారీ మొత్తంలో డిమాండ్ చేస్తున్న విషయం తెలిసిందే.

కొత్త BMW కారు డెలివరీ వేళ.. ట్రాన్స్‌జెండర్ల వీరంగం, రూ.2 లక్షలు డిమాండ్!

భాగ్యనగరంలో ఓ లగ్జరీ కారు యజమానికి చేదు అనుభవం ఎదురైంది. అత్యంత ఖరీదైన కొత్త బిఎండబ్ల్యూ (BMW) కారును షోరూమ్ నుంచి డెలివరీ తీసుకున్న సంతోషం క్షణాల్లోనే ఆవిరైపోయింది. కారు కొనుగోలు చేసిన సంతోషాన్ని… pic.twitter.com/3F3nYVzj7t

— JSP Naresh (@JspBVMNaresh) September 13, 2026