RGV on Artificial Intelligence | జేబులో చిల్లిగవ్వ లేనప్పుడు ఎదురుగా నగదుతో నిండిన పెద్ద లాకర్ ఉంటే దాన్ని తెరవకుండా ఎంతసేపు ఉండగలరు?

• ముందు నిండుగా డబ్బుల లాకర్ ఉంటే ఎంతకాలం ఆగగలరు?
• ఆర్టిఫిషియల్ ఇంటెలిజెన్స్‌పై రామ్ గోపాల్ వర్మ సంచలన విశ్లేషణ

RGV on Artificial Intelligence | త్రినేత్ర.న్యూస్ : ఆర్టిఫిషియల్ ఇంటెలిజెన్స్ (AI) రోజురోజుకూ కొత్త పుంతలు తొక్కుతూ ప్రపంచాన్ని ఆశ్చర్యపరుస్తోంది. అయితే AI అభివృద్ధిని నియంత్రించగలమా? లేక పూర్తిగా ఆపేయగలమా? అనే ప్రశ్నపై ప్రముఖ దర్శకుడు రామ్ గోపాల్ వర్మ సోషల్ మీడియా వేదికగా తనదైన శైలిలో స్పందించారు. టెక్ కంపెనీలు చెబుతున్న మాటలను గుడ్డిగా నమ్మలేమని, ప్రపంచ రాజకీయాలు, మానవ నైజం నేపథ్యంలో AI రేసును ఆపడం దాదాపు అసాధ్యమని ఆర్జీవీ విశ్లేషించారు.

టెక్నాలజీ పరంగా AI స్పీడ్‌ను నెమ్మదింపజేయడం కాగితాలపై సాధ్యమే అయినా, దాన్ని ఆచరణలో అమలు చేయడం ఎవరి వల్లా కాదని ఆర్జీవీ అభిప్రాయపడ్డారు. "ఈ రేసులో ముందుగా గమ్యాన్ని చేరే వారికి అపారమైన ఆర్థిక ప్రయోజనాలు, తిరుగులేని మిలిటరీ ఆధిక్యం, అంతర్జాతీయంగా తిరుగులేని గుర్తింపు దక్కుతాయి. ఒకవేళ మనం ఆపినా శత్రు దేశం లేదా ప్రత్యర్థి కంపెనీ ముందుకు వెళ్తుందనే అనుమానమే ప్రతి ఒక్కరినీ రహస్యంగా పరిశోధనలు కొనసాగించేలా చేస్తుంది" అని ఆయన రాసుకొచ్చారు.

రహస్య ప్రయోగాలు, అబద్ధాలు తప్పవు

తదుపరి తరం AI మోడళ్లను రహస్యంగా ట్రైన్ చేయడం లేదా 'ఇది కేవలం సేఫ్టీ రీసెర్చ్ కోసమే' అని బుకాయించడం రాబోయే రోజుల్లో సర్వసాధారణం అవుతుందని వర్మ పేర్కొన్నారు. ఆంత్రోపిక్ (Anthropic), ఓపెన్ఏఐ (OpenAI) లాంటి ప్రముఖ సంస్థలు స్వతంత్ర నిపుణులకు సమీక్షించే అవకాశం ఇస్తామని చెబుతున్నప్పటికీ, తాము చూపించాలనుకున్న సమాచారాన్ని మాత్రమే చూపిస్తాయని తెలిపారు. ఒక దుర్మార్గమైన దేశం లేదా ప్రభుత్వాలే మోసపూరితంగా వ్యవహరించినప్పుడు అంతర్జాతీయంగా చేసేదేమీ ఉండదని ఆయన స్పష్టం చేశారు.

ప్రభుత్వాలు సెమీకండక్టర్ సప్లై చైన్లపై ఆంక్షలు పెట్టినా, భారీ కంప్యూట్ క్లస్టర్లను తనిఖీ చేసినా పెద్దగా ప్రయోజనం ఉండబోదని ఆర్జీవీ అన్నారు. ఒక దేశానికి సిలికాన్ వ్యాలీ స్థాయి ఎకోసిస్టమ్ అవసరం లేదని, తమ అవసరాలకు సరిపడా శక్తిమంతమైన వ్యవస్థలను వారు సులభంగానే సమకూర్చుకోగలరని చెప్పారు. ఇరాన్ యురేనియం సంపాదించడానికంటే ఏఐ సిస్టమ్‌ను తయారుచేసుకోవడమే సులువైన పని కావచ్చని పోల్చారు.

మానవ అత్యాశే అసలైన సమస్య

అన్నింటికంటే ముఖ్యంగా AI ఇచ్చే అపరిమిత ప్రయోజనాలను తిరస్కరించే శక్తి మానవాళికి లేదని వర్మ కుండబద్దలు కొట్టారు. "అంతులేని ఆర్థిక సంపద, ఊహించని సైనిక ఆధిపత్యం, మానవాళి సమస్యలన్నింటికీ పరిష్కారం అందించే సామర్థ్యం AIకి ఉన్నప్పుడు ఎవరైనా ఎలా ఆపగలరు? జేబులో చిల్లిగవ్వ లేనప్పుడు ఎదురుగా నగదుతో నిండిన పెద్ద లాకర్ ఉంటే దాన్ని తెరవకుండా ఎవరైనా ఎంతసేపు ఆపుకోగలరు?" అంటూ ఆలోచింపజేసే ప్రశ్నతో ఆర్జీవీ తన పోస్ట్‌ను ముగించారు.

Can AI development be truly slowed down or stopped? ..What if they just say , and not do it ? How will one know if they are really doing it ? Do we have to just take their gentlemen word for it?
A slowdown is maybe technically possible.But I don’t believe it’s currently…

— Ram Gopal Varma (@RGVzoomin) September 13, 2026