లోడ్ అవుతోంది...
A Sudheeksha
Hyderabad | Jan 14, 2026, 4.50 pm IST
Rajkumari Indira Devi | ప్రముఖ రచయిత్రి రాజకుమారి ఇందిరాదేవి (Rajkumari Indira Devi) ధన్రాజ్గిర్ (96) కన్నమూశారు. ఆమె దివంగత కవి, సాహిత్య అకాడమీ అవార్డు గ్రహీత గుంటూరు శేషేంద్రశర్మ (Gunturu Seshendra Sarma) సతీమణి. నగరంలోని గోషామహల్ ప్రాంతంలోని జ్జాన్బాగ్ ప్యాలెస్ (Gyan Bagh Palace) లో మంగళవారం తుదిశ్వాస విడిచారు. రాజకుమారి ఇందిరాదేవి రచయిత్రి మాత్రమే కాదు.. ఆమె కవియిత్రి, చిత్రకారిణి కూడా. ఆమెకు ఫొటోగ్రఫీ కూడా ఆసక్తి. ఇలా పలు రంగాల్లో ఆమె బహుముఖ ప్రతిభను ప్రదర్శించారు. ఆమె మృతి తెలుగు, హిందీ, ఉర్దూ సాహిత్య లోకాలకు తీరని లోటుగా మారింది. ఆమె ఉమ్మడి ఆంధ్రప్రదేశ్ హిందీ అకాడమీకి తొలి అధ్యక్షురాలిగా వ్యవహరించడంతో పాటు ఉర్దూ అకాడమీ చైర్పర్సన్గా కూడా సేవలందించారు.
స్వతహాగా ఆమె రాజకుంటుంబానికి చెందిన వారు. ఆమె పూర్వీకులు మహారాష్ట్రను పాలించేవారు. వారికి హైదరాబాద్ సహా దేశంలోని అనేక ప్రాంతాల్లో రాజభవనాలు ఉండేవి. ఇందిరాదేవి తండ్రి రాజా ధన్రాజ్గిర్ నగరంలో స్థిరపడ్డారు. నగరం నడిబొడ్డున ఉన్న జ్ఞాన్బాగ్ ప్యాలెస్ వారిదే. ఆయన తమ్ముడు సైతం నగరంలోనే స్థిరపడగా, ప్రస్తుతం ఈఎన్టీ ఆస్పత్రిగా వినియోగంలో ఉన్న భవనం ఆయన రాజభవనమే కావడం విశేషం. రాజకుంటుంబంలో జన్మించిన ఆమె నివాసంలో పులులు, చిరుతలు, గుర్రాలు వంటివాటితో చిన్నపాటి జూయే ఉండేది. ఆమె పాఠశాల విద్యవరకు మహబూబియా గర్ల్స్ స్కూల్లో చదివి, అక్కడికి ఆపివేశారు.
అల్లా ఇక్బాల్, గాలీబ్, శ్రీ అరబిందో వంటి మహానుభావుల రచనల నుంచి ప్రేరణ పొందిన ఇందిరాదేవి సాహిత్య రంగంలోకి అడుగుపెట్టారు. భావోద్వేగాలు, ఆధ్యాత్మికత, మానవ సంబంధాల లోతును ప్రతిబింబించేలా ఆమె కవిత్వం సాగింది. 1964లో ఆమె తొలి కవితా సంపుటి 'ది అపోసల్' ప్రచురితమైంది. అనంతరం 1965, 1966 సంవత్సరాల్లో మరికొన్ని కవితా సంకలనాలు వెలువరించి సాహిత్య వర్గాల్లో గుర్తింపు పొందారు. 1973లో వరల్డ్ పోయెట్రీ సొసైటీ ఇంటర్కాంటినెంటల్ (WPSI) అధ్యక్షుడు కృష్ణ శ్రీనివాస్ ఆమె పేరును సాహిత్యంలో నోబెల్ బహుమతికి నామినేట్ చేశారు. ఈ ఘనత సాధించిన తొలి భారతీయ మహిళగా రాజకుమారి ఇందిరాదేవి చరిత్రలో నిలిచారు.
Developed & Published by TRINETHRA MEDIA HOUSE PVT. LTD,
Sai Madhu Towers, Plot No. 17, Rohini Layout Rd, Jaihind Enclave, Madhapur, Hyderabad, Telangana 500081.
Copyright © 2025 . All rights reserved. - Powered by : Veegam