Harish Rao | యూనివర్సిటీల భూములపై రేవంత్ సర్కార్ కక్ష.. విద్యా వ్యవస్థను నిర్వీర్యం చేస్తున్నారు: హరీష్ రావు ధ్వజం

Harish Rao | త్రినేత్ర.న్యూస్ : తెలంగాణలోని ప్రతిష్టాత్మక విశ్వవిద్యాలయాల భూములను రేవంత్ రెడ్డి ప్రభుత్వం లక్ష్యంగా చేసుకోవడంపై మాజీ మంత్రి, బీఆర్ఎస్ నేత హరీష్ రావు తీవ్ర ఆగ్రహం వ్యక్తం చేశారు. విద్యా నిలయాలను కాపాడాల్సింది పోయి, వాటిని రియల్ ఎస్టేట్ వెంచర్లుగా మారుస్తున్నారని ఆయన మండిపడ్డారు. ఈ మేరకు బుధవారం ఎక్స్ వేదికగా ప్రభుత్వంపై ఆయన ఘాటు విమర్శలు చేశారు. పరిశోధనా కేంద్రాల ధ్వంసం రెండేళ్ల కాంగ్రెస్ పాలనలో యూనివర్సిటీ భూములపై ఉద్దేశపూర్వక దాడి జరుగుతోందని హరీష్ రావు ఆరోపించారు. "మొన్న ప్రొఫెసర్ జయశంకర్ వ్యవసాయ వర్సిటీ, కొండా లక్ష్మణ్ ఉద్యాన వర్సిటీల నుంచి బలవంతంగా 100 ఎకరాలకు పైగా భూములను లాక్కున్నారు. 60 ఏళ్లుగా కాపాడుకుంటూ వస్తున్న ఔషధ, సుగంధ మొక్కల పరిశోధనా కేంద్రంలోని 60 ఎకరాలను పూర్తిగా ధ్వంసం చేశారు. ఎంతో విలువైన పరిశోధనా సంపద నేలమట్టమైంది" అని ఆయన ఆవేదన వ్యక్తం చేశారు. పర్యావరణానికి ముప్పు హైదరాబాద్ సెంట్రల్ యూనివర్సిటీకి చెందిన 400 ఎకరాలకు పైగా అటవీ భూమిని తాకట్టు పెట్టి విధ్వంసం సృష్టించారని, దీనివల్ల పర్యావరణ వ్యవస్థతో పాటు అక్కడి మూగజీవాల మనుగడ ప్రమాదంలో పడిందని విమర్శించారు. ఇప్పుడు తాజాగా మౌలానా ఆజాద్ జాతీయ ఉర్దూ విశ్వవిద్యాలయానికి (MANUU) చెందిన 50 ఎకరాల భూమిపై ప్రభుత్వం కన్నేసిందని, వాటిని కూడా లాక్కోవాలని చూస్తోందని ఆయన దుయ్యబట్టారు. ప్రభుత్వానికి హెచ్చరిక అభివృద్ధి అంటే కేవలం భవనాలు కట్టడం కాదని, భావితరాలకు జ్ఞానాన్ని అందించే పరిశోధనా కేంద్రాలను కాపాడుకోవడమని హరీష్ రావు గుర్తు చేశారు. రేవంత్ రెడ్డి ప్రభుత్వానికి విద్యార్థులన్నా, పర్యావరణమన్నా ఎందుకంత చిన్నచూపు అని ఆయన ప్రశ్నించారు. విజ్ఞాన కేంద్రాలను బుల్డోజర్లతో కూల్చడం సిగ్గుచేటని, వెంటనే ఈ చర్యలను ఆపాలని డిమాండ్ చేశారు. యూనివర్సిటీ భూములను వాటికే వదిలేయాలని, లేనిపక్షంలో విద్యార్థి లోకం, తెలంగాణ సమాజం చూస్తూ ఊరుకోదని ఆయన హెచ్చరించారు. In just two years, the @revanth_anumula government has repeatedly targeted university lands, raising serious concerns about its attitude toward education and research. 1) Over 100 acres were forcefully taken from Professor Jayashankar Telangana State Agricultural University and… — Harish Rao Thanneeru (@BRSHarish) January 7, 2026