Formula E Race Case | ఫార్ములా ఈ రేస్ కేసులో బిగుస్తున్న ఉచ్చు: ఐఏఎస్ అరవింద్ కుమార్ ప్రాసిక్యూషన్‌కు కేంద్రం గ్రీన్ సిగ్నల్

Formula E Race Case | త్రినేత్ర.న్యూస్ : తెలంగాణ రాజకీయాల్లో సంచలనం సృష్టించిన ఫార్ములా ఈ (Formula E) కార్ రేస్ నిధుల మళ్లింపు కేసులో అత్యంత కీలక పరిణామం చోటుచేసుకుంది. ఈ కేసులో ఆరోపణలు ఎదుర్కొంటున్న సీనియర్ ఐఏఎస్ అధికారి అరవింద్ కుమార్‌ను (IAS Arvind Kumar) విచారించేందుకు (ప్రాసిక్యూషన్) కేంద్ర ప్రభుత్వం గ్రీన్ సిగ్నల్ ఇచ్చింది.

రాష్ట్రానికి అందిన సమాచారం

అరవింద్ కుమార్ ప్రాసిక్యూషన్‌కు అనుమతి ఇస్తూ కేంద్ర ప్రభుత్వం తీసుకున్న నిర్ణయాన్ని రాష్ట్ర ప్రభుత్వానికి అధికారికంగా తెలియజేసింది. ఈ మేరకు కేంద్రం నుంచి రాష్ట్రానికి సమాచారం అందింది. గత బీఆర్ఎస్ ప్రభుత్వ హయాంలో నిబంధనలకు విరుద్ధంగా రూ.55 కోట్లను ఫార్ములా ఈ రేస్ నిర్వాహక సంస్థలకు బదిలీ చేశారన్నది ప్రధాన ఆరోపణ.

ఇప్పటికే కేటీఆర్‌పై అనుమతి

ఈ కేసులో అప్పటి మున్సిపల్ శాఖ మంత్రి కేటీఆర్‌పై (KTR) కూడా ఏసీబీ కేసు నమోదు చేసిన విషయం తెలిసిందే. కేటీఆర్‌ను ప్రాసిక్యూట్ చేయడానికి గవర్నర్ ఇప్పటికే అనుమతి ఇచ్చారు. ఇప్పుడు ఐఏఎస్ అధికారి విషయంలోనూ కేంద్రం నుంచి అనుమతి రావడంతో కేసు దర్యాప్తు తుది దశకు చేరుకుంది.

ఛార్జ్‌షీట్‌కు ఏసీబీ సిద్ధం

ఫార్ములా ఈ వ్యవహారంపై ఇప్పటికే అవినీతి నిరోధక శాఖ (ACB) లోతుగా విచారణ జరుపుతోంది. ఈ కేసులో ప్రధానంగా నిర్ణయాలు తీసుకున్న మాజీ మంత్రి కేటీఆర్, నిధులు విడుదల చేసిన అధికారి.. ఇద్దరి ప్రాసిక్యూషన్‌కు అడ్డంకులు తొలగిపోవడంతో ఏసీబీ దూకుడు పెంచింది. త్వరలోనే న్యాయస్థానంలో ఛార్జ్‌షీట్ (Charge Sheet) దాఖలు చేసేందుకు ఏసీబీ అధికారులు సన్నాహాలు చేస్తున్నారు. రాష్ట్రంలో సంచలనం రేపిన ఈ కేసులో తదుపరి పరిణామాలు ఎలా ఉండబోతున్నాయనేది ఇప్పుడు రాజకీయ వర్గాల్లో ఆసక్తికరంగా మారింది.