Chanchalguda to Santoshnagar Flyover | పాతబస్తీ ట్రాఫిక్ కష్టాలకు చెక్: చంచల్‌గూడ – సంతోష్‌నగర్ స్టీల్ ఫ్లైఓవర్ ప్రారంభించిన సీఎం రేవంత్

Chanchalguda to Santoshnagar Flyover | త్రినేత్ర.న్యూస్ : హైదరాబాద్ పాతబస్తీ వాసుల చిరకాల కల నెరవేరింది. ఏళ్ల తరబడి స్థానికులను వేధిస్తున్న ట్రాఫిక్ సమస్యలకు శాశ్వత పరిష్కారం చూపుతూ చంచల్‌గూడ నుంచి సంతోష్‌నగర్ వరకు నిర్మించిన భారీ స్టీల్ ఫ్లైఓవర్‌ (ఉక్కు వంతెన) అందుబాటులోకి వచ్చింది. గురువారం ఈ ప్రతిష్టాత్మక ప్రాజెక్టును ముఖ్యమంత్రి రేవంత్ రెడ్డి లాంఛనంగా ప్రారంభించారు.

ఓపెన్ టాప్ వాహనంలో సీఎం సందడి

వంతెన ప్రారంభోత్సవం అనంతరం సీఎం రేవంత్ రెడ్డి ఒక ఓపెన్ టాప్ వాహనంలో ప్రయాణించి ఫ్లైఓవర్ నిర్మాణాన్ని స్వయంగా పరిశీలించారు. ఈ కార్యక్రమంలో మంత్రులు పొన్నం ప్రభాకర్, ఎంపీలు అసదుద్దీన్ ఓవైసీ, అనిల్ కుమార్ యాదవ్, సీనియర్ నేతలు అజారుద్దీన్, వేం నరేందర్ రెడ్డి, రఘువీర్ రెడ్డిలతో పాటు పలువురు ఎమ్మెల్యేలు, ఎమ్మెల్సీలు, కార్పొరేషన్ చైర్మన్లు పాల్గొన్నారు.

ప్రాజెక్టు హైలైట్స్ ఇవే..

ఈ అద్భుతమైన ఫ్లైఓవర్‌ను సుమారు రూ. 620 కోట్ల భారీ వ్యయంతో జీహెచ్‌ఎంసీ (GHMC) నిర్మించింది. దీని మొత్తం పొడవు 3.2 కిలోమీటర్లు కాగా.. 16.6 మీటర్ల (100 అడుగులు) వెడల్పుతో నాలుగు లేన్లుగా తీర్చిదిద్దారు. ఈ ఫ్లైఓవర్ అందుబాటులోకి రావడంతో పాతబస్తీ పరిధిలోని సంతోష్‌నగర్, చంపాపేట, సైదాబాద్, చంచల్‌గూడ ప్రాంతాల్లో నిత్యం ఎదురయ్యే ట్రాఫిక్ జాం సమస్యలకు బ్రేక్ పడనుంది. ప్రజల రోజువారీ ప్రయాణం మరింత ఈజీ కానుంది.

చంచల్‌గూడ గ్రౌండ్‌లో సీఎం సభ.. ట్రాఫిక్ డైవర్షన్స్

ఫ్లైఓవర్ ప్రారంభోత్సవం ముగిసిన తర్వాత చంచల్‌గూడ గవర్నమెంట్ డిగ్రీ కాలేజీ గ్రౌండ్‌లో ఏర్పాటు చేసిన భారీ బహిరంగ సభలో సీఎం రేవంత్ రెడ్డి ప్రసంగించనున్నారు. ఈ కార్యక్రమాల నేపథ్యంలో పోలీసులు మధ్యాహ్నం 2 గంటల నుంచి రాత్రి 7 గంటల వరకు ఆయా రూట్లలో ప్రత్యేక ట్రాఫిక్ ఆంక్షలు విధించారు. ముఖ్యంగా సైదాబాద్ వై-జంక్షన్ నుంచి నల్గొండ క్రాస్ రోడ్స్ వరకు రోడ్డును మూసివేసి, వాహనాలను ప్రత్యామ్నాయ మార్గాల్లోకి (డైవర్షన్స్) మళ్లిస్తున్నారు. వాహనదారులు ఈ విషయాన్ని గమనించి ప్రయాణించాల్సిందిగా పోలీసులు సూచించారు.