Pomegranate Amla Muskmelon Juice | దానిమ్మ, ఉసిరి, కర్బూజ.. రోజూ ఉదయాన్నే ఈ జ్యూస్ తాగితే మీ బాడీలో జరిగే మ్యాజిక్ ఇదే!

Pomegranate Amla Muskmelon Juice | త్రినేత్ర.న్యూస్ : మచ్చల్లేని ముఖం, ఆరోగ్యకరమైన జీర్ణవ్యవస్థ కోసం మనం ఎన్నో ఖరీదైన సీరమ్స్, సప్లిమెంట్స్ వాడుతుంటాం. కానీ, ప్రకృతి ప్రసాదించిన పండ్లలోనే వీటికి అసలైన పరిష్కారం ఉంది. ముఖ్యంగా దానిమ్మ, ఉసిరి, కర్బూజ కలిపిన జ్యూస్ ఇప్పుడు ఓ సూపర్ ఫుడ్‌గా మారుతోంది. ఉదయం అల్పాహారానికి ముందు, పరగడుపున ఈ జ్యూస్ తాగడం వల్ల శరీరంలో కణాల పునరుత్పత్తి జరిగి చర్మం, జీర్ణక్రియ అద్భుతంగా మెరుగుపడతాయి. డైజెషన్ కు ప్రాధాన్యత ఇచ్చే మీ దినచర్యలో ఈ జ్యూస్ ఎందుకు ఉండాలో తెలుసుకుందాం రండి.

కొన్ని పోషకాలను కలిపి తీసుకున్నప్పుడు శరీరం వాటిని మరింత వేగంగా గ్రహిస్తుంది. ఫుడ్ సైన్స్ అండ్ టెక్నాలజీ జర్నల్ లో ప్రచురితమైన ఒక అధ్యయనం ప్రకారం, 57.14% దానిమ్మ, 5.04% ఉసిరి, 37.82% కర్బూజ (సుమారు 5:1:4 నిష్పత్తిలో) కలిపి జ్యూస్ లా తీసుకుంటే శరీరానికి అత్యధిక పోషకాలు అందుతాయి. ఈ మిశ్రమం ద్వారా ఫినోలిక్స్, ఫ్లేవనాయిడ్స్ సమృద్ధిగా లభించి, ఆక్సీకరణ ఒత్తిడిని తగ్గించి కణాల వృద్ధాప్యాన్ని అడ్డుకుంటాయి.

ఈ స్పెషల్ జ్యూస్ తాగడం వల్ల కలిగే 3 ఆరోగ్య ప్రయోజనాలు

కొల్లాజెన్ ఉత్పత్తితో మెరిసే చర్మం

ఆరోగ్యకరమైన కొల్లాజెన్ ఉత్పత్తి, తక్కువ ఆక్సీకరణ నష్టం జరిగినప్పుడే చర్మం కాంతివంతంగా ఉంటుంది. ప్యునికలాజిన్స్ పుష్కలంగా ఉండే దానిమ్మ.. సూర్యరశ్మి (UV) నుంచి చర్మాన్ని కాపాడుతుంది. కణాల ఉత్పత్తిని పెంచి చర్మాన్ని యవ్వనంగా ఉంచుతుంది. విటమిన్ సి కి కేరాఫ్ అడ్రస్ అయిన ఉసిరి కొల్లాజెన్ ఉత్పత్తిని పెంచి, ముడతలు రాకుండా చర్మం సాగే గుణాన్ని కాపాడుతుంది. ఇక బీటా కెరోటిన్, నీటి శాతం ఎక్కువగా ఉండే కర్బూజ చర్మాన్ని లోపలి నుంచి తేమగా ఉంచుతుంది.

మెరుగైన జీర్ణక్రియ, గట్ హెల్త్

పొట్ట ఆరోగ్యంగా ఉంటేనే ముఖంపై ఆ కాంతి కనిపిస్తుంది. దానిమ్మ జ్యూస్‌లోని ప్రీబయోటిక్స్ పొట్టలో మంచి బ్యాక్టీరియాను పెంచుతాయి. ఉసిరి గ్యాస్ట్రిక్ రసాల విడుదలను క్రమబద్ధీకరించి, ఎసిడిటీ రాకుండా ఆహారం సులభంగా జీర్ణమయ్యేలా చేస్తుంది. కర్బూజలోని ఫైబర్, పొటాషియం మలబద్ధకం, ఉదయాన్నే వచ్చే బ్లోటింగ్ సమస్యలను నివారిస్తాయి.

పరగడుపున తాగితే 100% ప్రయోజనం

మనం తీసుకునే టైమ్ ఇక్కడ చాలా ముఖ్యం. రాత్రంతా ఖాళీగా ఉన్న కడుపులోకి ఉదయాన్నే ఈ న్యూట్రియంట్-డ్రింక్ పంపినప్పుడు, పొట్ట దాన్ని చాలా వేగంగా స్వీకరిస్తుంది. కడుపులో ఎలాంటి కొవ్వులు, ప్రోటీన్లు లేకపోవడం వల్ల ఈ జ్యూస్ లోని విటమిన్లు, యాంటీ ఆక్సిడెంట్లు ఎటువంటి ఆటంకం లేకుండా నేరుగా రక్తంలో కలిసిపోయి గరిష్ట ప్రయోజనాన్ని అందిస్తాయి.

తయారీ విధానం, తీసుకోవాల్సిన జాగ్రత్తలు

ఈ జ్యూస్ ఎప్పటికప్పుడు తాజాగా ఇంట్లోనే చేసుకోవాలి. సూపర్ మార్కెట్లలో దొరికే ప్యాక్డ్ జ్యూస్ లలో ఉండే చక్కెర వల్ల లాభం కంటే నష్టమే ఎక్కువ.

సరైన నిష్పత్తి: దానిమ్మ, ఉసిరి, కర్బూజను సుమారుగా 5:1:4 నిష్పత్తిలో తీసుకోవాలి.

తయారు చేసే విధానం: ముందుగా దానిమ్మ, ఉసిరిని బ్లెండ్ చేసి గింజలు లేకుండా వడకట్టాలి. ఆ తర్వాత ఆ రసంలో కర్బూజ ముక్కలు వేసి బ్లెండ్ చేయాలి. ఇలా చేయడం వల్ల జ్యూస్ బాగా మిక్స్ అవుతుంది. తాగడానికి వీలుగా ఉంటుంది.

తాగాల్సిన టైమ్: జ్యూస్ తయారుచేసిన 15 నిమిషాల్లోపు తాగేయాలి. అప్పుడే అందులోని పోషకాలు గాలికి ఆక్సీకరణ చెందకుండా ఉంటాయి.

ఈ మూడు పండ్ల కలయిక కేవలం ఒక రిఫ్రెషింగ్ డ్రింక్ మాత్రమే కాదు, ఆరోగ్యానికి సైంటిఫిక్ గా నిరూపించబడిన అద్భుతమైన ఔషధం. ప్రతిరోజూ బ్రేక్ ఫాస్ట్ కు ముందు దీన్ని అలవాటు చేసుకుంటే మీ చర్మం, జీర్ణక్రియ పర్ఫెక్ట్ గా ఉంటాయి. అయితే, జీర్ణవ్యవస్థ సమస్యలు లేదా ఏవైనా ఇతర ఆరోగ్య సమస్యలు ఉన్నవారు ఈ డైట్ మొదలుపెట్టే ముందు ఒకసారి వైద్యుడిని సంప్రదించడం మంచిది.