Tollywood | రొమాంటిక్ కామెడీ సినిమాతో తొలి ప్రేమ డైరెక్ట‌ర్ రీ ఎంట్రీ – ఏడేళ్ల త‌ర్వాత ఛాన్స్‌

Tollywood | ప‌వ‌న్ క‌ళ్యాణ్ హీరోగా న‌టించిన తొలి ప్రేమ సినిమాతో డైరెక్ట‌ర్‌గా టాలీవుడ్‌లోకి ఎంట్రీ ఇచ్చాడు క‌రుణాక‌ర‌న్‌. తొలి సినిమాతోనే పెద్ద స‌క్సెస్‌ను అందుకున్నాడు. ప‌వ‌న్ క‌ళ్యాణ్‌కు స్టార్ ఇమేజ్‌ను తీసుకొచ్చిన సినిమాల్లో ఒక‌టిగా తొలి ప్రేమ నిలిచింది. ఆ త‌ర్వాత వాసు, హ్యాపీ, ఉల్లాసంగా ఉత్సాహంగా, డార్లింగ్ సినిమాల‌తో ద‌ర్శ‌కుడిగా తెలుగు ఆడియెన్స్‌ను మెప్పించాడు క‌రుణాక‌ర‌న్‌. రామ్ ఎందుకంటే ప్రేమంట సినిమాతో క‌రుణాక‌ర‌న్ విజ‌యాల ప‌రంప‌ర‌కు బ్రేక్ ప‌డింది. తేజ్ ఐ ల‌వ్ యూతో పాటు చిన్నదాన నీకోసం కూడా ఫెయిల్యూర్‌గా నిలిచాయి. ఈ డిజాస్ట‌ర్ల‌తో టాలీవుడ్‌లో క‌నిపించ‌కుండాపోయారు క‌రుణాక‌ర‌న్‌.

రొమాంటిక్ కామెడీ మూవీ...

దాదాపు ఏడేళ్ల త‌ర్వాత డైరెక్ట‌ర్‌గా రీఎంట్రీ ఇవ్వ‌బోతున్నాడు. బెల్లంకొండ సురేష్ త‌న‌యుడు గ‌ణేష్ హీరోగా క‌రుణాక‌ర‌న్ ద‌ర్శ‌క‌త్వంలో న్యూ ఏజ్ రొమాంటిక్ కామెడీ మూవీ తెర‌కెక్కుతోంది. సోమ‌వారం పూజా కార్య‌క్ర‌మాల‌తో ఈ సినిమా ప్రారంభ‌మైంది. ఈ సినిమా ఓపెనింగ్ ఈవెంట్‌కు వీవీ వినాయ‌క్ ముఖ్య అతిథిగా హాజ‌ర‌య్యారు. ఈ సినిమాకు జాతిర‌త్నాలు డైరెక్ట‌ర్ కేవీ అనుదీప్ డైలాగ్స్ అందించ‌బోతున్నారు. భీమ్స్ మ్యూజిక్ అందిస్తున్నాడు.

త్వ‌ర‌లో రెగ్యుల‌ర్ షూటింగ్‌...

క‌రుణాక‌ర‌ణ్ శైలి హ్యూమ‌ర్‌, ల‌వ్‌, ఫ్యామిలీ ఎమోష‌న్స్‌తో ఈ సినిమా తెర‌కెక్కుతోన్న‌ట్లు మేక‌ర్స్ వెల్ల‌డించారు. త్వ‌ర‌లోనే ఈ సినిమా రెగ్యుల‌ర్ షూటింగ్ మొద‌లుకాబోతుంది. హీరోయిన్‌తో పాటు ఇత‌ర న‌టీన‌టుల వివ‌రాల‌ను త్వ‌ర‌లోనే వెల్ల‌డిస్తామ‌ని అన్నారు.
స్వాతిముత్యం సినిమాతో హీరోగా మారారు బెల్లంకొండ గ‌ణేష్ బాబు, ఆ త‌ర్వాత నేను స్టూడెంట్‌నే సార్ అనే సినిమా చేశాడు. అత‌డు హీరోగా న‌టిస్తోన్న మూడో సినిమా ఇది.