Srisailam | శ్రీశైలంలో కార్తీక మాసోత్సవాలు.. వారంలో మూడు రోజులు ఆ దర్శనాలు రద్దు

Srisailam | త్రినేత్ర న్యూస్‌: శివ‌కేశ‌వుల‌కు అత్యంత ప్రీతిపాత్ర‌మైన కార్తీక మాసం (Karthika Masam) ప్రారంభ‌మైంది. ఈ నేప‌థ్యంలో ప్ర‌ముఖ శైవ‌క్షేత్రం శ్రీశైల మ‌ల్లికార్జున స్వామివారి ఆల‌యంలో (Srisailam) కార్తీక మాసోత్సవాలు ఘ‌నంగా ఆరంభ‌మ‌య్యాయి. డిసెంబ‌ర్ 9 వ‌ర‌కు మాసోత్స‌వాలు (Karthika Masotsavam) అత్యంత వైభ‌వంగా జ‌రుగుతాయి. పాడ్యమి ఘడియలు రావడంతో సోమవారం రాత్రి 7 గంటలకు ఆలయ ప్రాంగణంలో ఆలయ ఈవో ఎం శ్రీనివాసరావు దంపతులు, అర్చకులు ఆకాశ దీపానికి పూజలు చేశారు. అనంతరం వేదమంత్రోచ్చరణల మధ్య ఆకాశ దీపాన్ని ప్రధాన ధ్వజస్తంభంపై ఆవిష్కరించారు.

ఈ నేప‌థ్యంలో నెల రోజుల‌పాటు గర్భాలయ అభిషేకాలు, సామూహిక అభిషేకాలు (Abhishekams) పూర్తిగా నిలిపివేశారు. ప్రతి శని, ఆది, సోమ వారాలతో పాటు పర్వదినాల్లో స్వామివారి స్పర్శ దర్శనం నిలిపివేశారు. దీంతో భక్తులకు అలంకార దర్శనం మాత్రమే కల్పించనున్నారు. అలాగే క్షేత్రంలోని పురాతన పంచమఠాలలో కొలువై ఉన్న శివలింగాలకు అభిషేకాలు నిర్వహించుకోవచ్చు. శని, ఆది, సోమవారాల్లో స్వామి వారి అలంకార దర్శనం ఉంటుంది. మంగళవారం నుంచి శుక్రవారం వ‌ర‌కు విడతల వారీగా స్పర్శ దర్శనం చేసుకునేందుకు అధికారులు ఏర్పాట్లు చేశారు. ఈ నెల 24న ఆలయ ప్రాంగణంలో కోటి దీపోత్సవం నిర్వహించనున్నారు. కార్తీక మాసోత్సవాల సమయంలో పంచమఠాలలో ఆర్జిత అభిషేకాలు (Arjitha Abhishekams) నిర్వహిస్తారు.

దీనికోసం భ‌క్తులు రూ.216 చెల్లించాల్సి ఉంటుంది. ఒక సేవాటిక్కెట్టుపై దంపతులు లేదా ఒకరికి మాత్రమే ప్రవేశం క‌ల్పిస్తారు. భక్తులు అభీష్టం మేరకు ఈ సేవాటిక్కెట్టుపై ఘంటామఠం, భీమశంకరమఠం, విభూతిమఠం, రుద్రాక్షమఠం, సారంగధరమఠాలలోని ఏదైనా ఒకమఠంలో అభిషేకాన్ని జరిపించుకోవ‌చ్చు