Cyber Fraud WhatsApp Reply No | ఓటీపీ లేదు, లింక్ అసలే లేదు.. కేవలం ‘నో’ అని రిప్లై ఇస్తే రూ.1.70 లక్షలు మాయం

Cyber Fraud WhatsApp Reply No | త్రినేత్ర.న్యూస్ : సైబర్ కేటుగాళ్లు రోజుకో కొత్త మోసంతో అమాయకులను నిండా ముంచేస్తున్నారు. ఇప్పటివరకు లింక్ క్లిక్ చేస్తేనో, ఓటీపీ (OTP) చెబితేనో లేదా ఫోన్ హ్యాక్ అయితేనో డబ్బులు పోయేవి. కానీ లక్నోలో వెలుగు చూసిన ఒక వింతైన ఘటన అందరినీ షాక్‌కు గురిచేస్తోంది. ఎలాంటి లింక్ క్లిక్ చేయకుండా, ఏ ఓటీపీ చెప్పకుండా.. కేవలం వాట్సప్‌లో 'నో' (No) అని రిప్లై ఇచ్చినందుకు ఓ చార్టర్డ్ అకౌంటెంట్ (CA) ఏకంగా రూ. 1.70 లక్షలు పోగొట్టుకున్నారు.

లక్నో పోలీసుల సైబర్ సేఫ్టీ అలర్ట్ ప్రకారం.. బాధితుడికి వాట్సాప్‌లో ఓ మెసేజ్ వచ్చింది. ఆ ఖాతా నుంచి రూ.90,000 డెబిట్ అయినట్లు ఆ సందేశంలో ఉంది. ఒకవేళ ఈ లావాదేవీని మీరు చేయకపోతే వెంటనే 'నో' (No) అని రిప్లై ఇవ్వాలని ఆ మెసేజ్ కోరింది.

సోషల్ ఇంజనీరింగ్ కొత్త వ్యూహం

అసలు ఏం జరుగుతుందో తెలుసుకోకుండా బాధితుడు ఆ వాట్సప్ మెసేజ్‌కు 'నో' అని రిప్లై ఇచ్చారు. అంతే, కొద్దిసేపటికే ఆయనకు చెందిన రెండు వేర్వేరు బ్యాంక్ ఖాతాల నుంచి రూ. 1.70 లక్షలు మాయమయ్యాయి.

ఇది పూర్తిగా 'సోషల్ ఇంజనీరింగ్' (Social Engineering) ట్రిక్ అని ఏడీసీపీ (క్రైమ్) కిరణ్ యాదవ్ వెల్లడించారు. ఎలాంటి లింక్‌లు, ఓటీపీలు వాడకుండా కేవలం ఫేక్ ట్రాన్సాక్షన్ అలర్ట్స్ పంపి బాధితుల చేత రిప్లై ఇప్పించడం ద్వారా మోసాలకు పాల్పడుతున్నారని ఆమె హెచ్చరించారు.

'నో' అని రిప్లై ఇస్తే ఫోన్ హ్యాక్ ఎలా అవుతుంది? అసలు గుట్టు ఇదీ

సైబర్ నేరస్థులు ఎలాంటి లింకులు పంపకుండా, ఓటీపీలు అడగకుండా కేవలం 'నో' (No) అని రిప్లై ఇస్తేనే డబ్బులు ఎలా కాజేస్తున్నారనే దానిపై లక్నో పోలీసులు, దర్యాప్తు అధికారులు విస్మయకరమైన విషయాలు వెల్లడించారు. ఈ సరికొత్త సైబర్ మోసంలో కేటుగాళ్లు వాట్సప్ మెసేజ్ టెంప్లేట్‌లోనే అత్యంత ప్రమాదకరమైన 'హిడెన్ ఆటో-ఎగ్జిక్యూషన్ పేలోడ్' (మాల్‌వేర్ స్క్రిప్ట్)ను చాలా చాకచక్యంగా దాచిపెడతారు. మనం ఎప్పుడైతే ఆ మెసేజ్‌ను చూసి అనుమానం లేకుండా 'నో' అని టైప్ చేసి రిప్లై పంపామో, ఆ ఇంటరాక్షన్ (interaction) కారణంగా బ్యాక్‌గ్రౌండ్‌లో ఆ మాల్‌వేర్ ఆటోమేటిక్‌గా రన్ అయి ఫోన్‌పై రిమోట్ కంట్రోల్‌ను సైబర్ నేరస్థులకు అప్పగిస్తుంది. దీనివల్ల బాధితులు ఎలాంటి లింక్ క్లిక్ చేయకపోయినా, ఓటీపీ చెప్పకపోయినా.. హ్యాకర్లు నేరుగా మన మొబైల్‌లోని బ్యాంకింగ్ యాప్స్‌ను యాక్సెస్ చేసి ఖాతాలోని డబ్బును క్షణాల్లో దోచుకుంటారు.

సైబర్ పోలీసుల కీలక సూచనలు

• తెలియని నంబర్ల నుంచి వచ్చే బ్యాంక్ డెబిట్ అలర్ట్స్‌కు ఎట్టి పరిస్థితుల్లోనూ స్పందించవద్దు.
• ఖాతాలో డబ్బు కట్ అయిందనే అనుమానం వస్తే, నేరుగా బ్యాంక్ అధికారిక యాప్ లేదా వెబ్‌సైట్ ద్వారా మాత్రమే చెక్ చేసుకోవాలి.
• బ్యాంకుల పేరుతో వాట్సప్‌లో వచ్చే అనధికారిక నంబర్లను నమ్మకండి.
• బ్యాంకులు ఎప్పుడూ కూడా వాట్సప్ రిప్లైల ద్వారా లావాదేవీలను కన్ఫర్మ్ చేసుకోమని కోరవు.

ఒకవేళ మోసానికి గురైతే వెంటనే సంబంధిత బ్యాంకును సంప్రదించాలని లేదా 1930 సైబర్ హెల్ప్‌లైన్‌కు కాల్ చేసి ఫిర్యాదు చేయాలని పోలీసులు సూచించారు.

బ్యాంకు నుంచి వస్తున్నట్లు వచ్చే ఏ వాట్సప్ మెసేజ్‌కు రిప్లై ఇచ్చే ముందు ఒకటికి రెండు సార్లు సరిచూసుకోండి. మీ ఒక్క చిన్న పొరపాటు మీ కష్టార్జితాన్ని క్షణాల్లో హారతి కర్పూరంలా మాయం చేయవచ్చు.