Alimony Rules in India | మాజీ భార్యకు రెండో పెళ్లి అయితే.. మొదటి భర్త భరణం చెల్లించాల్సిందేనా? చట్టం ఏం చెబుతోంది?

Alimony Rules in India | త్రినేత్ర.న్యూస్ : భారతదేశంలో విడాకులు, భరణం (Alimony) విషయానికి వస్తే చాలా మందిలో రకరకాల సందేహాలు ఉంటాయి. ముఖ్యంగా, విడాకులు తీసుకున్న భార్య భవిష్యత్తులో వేరొకరిని వివాహం చేసుకుంటే.. మొదటి భర్త ఆమెకు భరణం చెల్లించడం కొనసాగించాలా? లేదా అనే ప్రశ్న చాలా మందిలో మెదులుతుంది. ఈ విషయంలో మన దేశంలోని చట్టాలు స్పష్టమైన నిబంధనలను నిర్దేశిస్తున్నాయి. అవేంటో వివరంగా తెలుసుకుందాం రండి.

భార్యకు ఎంతకాలం భరణం పొందే అర్హత ఉంటుంది?

భారతీయ చట్టాల ప్రకారం, విడాకులు తీసుకున్న మహిళ తిరిగి వివాహం చేసుకునే వరకు మాత్రమే భరణం పొందేందుకు అర్హత కలిగి ఉంటుంది. ఆమె చట్టబద్ధంగా వేరొకరిని వివాహం చేసుకున్న క్షణమే, మొదటి భర్త నుండి భరణం తీసుకునే హక్కు పూర్తిగా రద్దవుతుంది. దీనికి ప్రధాన కారణం.. పునర్వివాహం తర్వాత ఆమె ఆర్థిక బాధ్యత కొత్త భర్తపైకి మారుతుంది.

చట్టాలు ఏం చెబుతున్నాయి?

హిందూ వివాహ చట్టం (Hindu Marriage Act): ఈ చట్టంలోని సెక్షన్ 25 ప్రకారం.. కోర్టు ఉత్తర్వుల మేరకు మాజీ భర్త ప్రతి నెలా భరణం చెల్లిస్తున్నప్పటికీ, ఆ మహిళ తిరిగి వివాహం చేసుకుంటే మాజీ భర్త కోర్టును ఆశ్రయించి ఆ పేమెంట్లను సవరించవచ్చు లేదా పూర్తిగా నిలిపివేయమని కోరవచ్చు. మహిళ పునర్వివాహం చేసుకున్న క్షణమే భరణం చెల్లించే బాధ్యత నుంచి మాజీ భర్త పూర్తిగా విముక్తుడవుతాడు.

బీఎన్‌ఎస్ఎస్ (BNSS - సెక్షన్ 144): అన్ని మతాలకు వర్తించే ఈ సెక్యులర్ చట్టం ప్రకారం కూడా విడాకులు పొందిన మహిళ అవివాహితగా ఉన్నంత కాలం మాత్రమే భరణం పొందడానికి అర్హురాలు. పునర్వివాహం జరిగిన వెంటనే ఈ హక్కు ముగిసిపోతుంది.

ముస్లిం పర్సనల్ లా: ముస్లిం వ్యక్తిగత చట్టం ప్రకారం కూడా విడాకులు తీసుకున్న మహిళ మరో వివాహం చేసుకుంటే, ఆమె మొదటి భర్త నుండి భరణం క్లెయిమ్ చేసే హక్కును కోల్పోతుంది.

పిల్లల బాధ్యత ఎవరిది?

భార్య పునర్వివాహం చేసుకున్నప్పటికీ.. మొదటి భర్త ద్వారా వారికి జన్మించిన పిల్లల విషయంలో చట్టం మరో కీలక నిబంధనను స్పష్టం చేస్తోంది. భార్య వేరే పెళ్లి చేసుకున్నప్పటికీ.. ఆ పిల్లల పెంపకం, చదువు ఖర్చులు భరించే చట్టపరమైన బాధ్యత మాత్రం పూర్తిగా వారి కన్న తండ్రి (బయోలాజికల్ ఫాదర్) పైనే ఉంటుంది.

చట్టపరమైన నిబంధనల ప్రకారం పునర్వివాహం అనేది భరణం చెల్లింపులను రద్దు చేసే ప్రధాన ప్రాతిపదికగా పనిచేస్తుంది, కానీ పిల్లల విషయంలో తండ్రి బాధ్యతలు ఎప్పటికీ మారవు.