Family Killed in Thrissur | ఫోన్ మాట్లాడేందుకు బైక్ ఆపారు.. అంతలోనే కారు రూపంలో దూసుకొచ్చిన మృత్యువు!

Family Killed in Thrissur | త్రినేత్ర.న్యూస్ : కేరళలోని (Keralam) త్రిస్సూర్ జిల్లాలో శనివారం అర్ధరాత్రి ఘోర విషాదం చోటుచేసుకుంది. ఓ శుభకార్యానికి వెళ్లి సంతోషంగా తిరిగి వస్తున్న ఆ కుటుంబం.. దారిమధ్యలో ఓ ఫోన్ కాల్ అటెండ్ చేసేందుకు బైక్ ఆపింది. కానీ, అదే వారి పాలిట శాపంగా మారింది. కంట్రోల్ తప్పి అతివేగంగా దూసుకొచ్చిన ఓ కారు వారి బైక్‌ను బలంగా ఢీకొట్టడంతో మూడేళ్ల చిన్నారి సహా ముగ్గురు ప్రాణాలు కోల్పోయారు.

మృతులను మునీర్ (35), అతని భార్య సఫ్నా (25), వారి కుమారుడు యామిల్ ఐబక్‌గా పోలీసులు గుర్తించారు. వీరు చావక్కాడ్ సమీపంలోని ఎడక్కాళియూర్‌కు చెందినవారు. శనివారం అర్ధరాత్రి సమయంలో గురువాయూర్-కున్నంకుళం (Guruvayur-Kunnamkulam) రోడ్డుపై ఈ ఘోర ప్రమాదం జరిగింది.

ఓ వివాహ వేడుకకు హాజరైన ఈ కుటుంబం బైక్‌పై ఇంటికి తిరుగు ప్రయాణమైంది. దారిలో ఫోన్ రావడంతో మాట్లాడేందుకు బైక్‌ను రోడ్డు పక్కన ఆపారు. ఇంతలో ఓ కారు (car) ఔట్ ఆఫ్ కంట్రోల్ అయ్యి అతివేగంగా వచ్చి వారి టూ-వీలర్‌ను (two-wheeler) ఢీకొట్టింది.

కారు ఢీకొట్టిన వేగానికి ఆ ముగ్గురు దాదాపు 50 మీటర్ల దూరంలో ఎగిరిపడ్డారు. తీవ్ర గాయాలపాలైన వారిని వెంటనే స్థానికులు దగ్గర్లోని ఆసుపత్రికి (hospital) తరలించినా ఫలితం దక్కలేదు. అప్పటికే వారు మృతి చెందినట్లు డాక్టర్లు నిర్ధారించారు.

ప్రమాదానికి కారణమైన కారు డ్రైవర్ మద్యం మత్తులో ఉన్నట్లు తెలుస్తోంది. కున్నంకుళం ఏరియాలో ఉన్న ఓ బార్ (bar) నుంచి అతడు వస్తున్నట్లు సమాచారం. యాక్సిడెంట్ జరిగిన వెంటనే డ్రైవర్ అక్కడి నుంచి పరారయ్యాడు. కారులో ఉన్న మరో ఇద్దరిని అదుపులోకి తీసుకున్న పోలీసులు.. వారిని విచారిస్తున్నారు. పరారీలో ఉన్న డ్రైవర్ కోసం గాలింపు చర్యలు చేపట్టారు.

ఇదిలా ఉంటే, కేవలం ఒక్కరోజు ముందే త్రిస్సూర్ జిల్లాలో మరో ఘోర ప్రమాదం జరిగింది. శుక్రవారం రాత్రి జాతీయ రహదారి 66పై ఆగి ఉన్న ట్రక్కును ఓ కారు ఢీకొట్టిన ఘటనలో తమిళనాడుకు చెందిన ఎనిమిది మంది ఇంజనీరింగ్ విద్యార్థులు (engineering students) ప్రాణాలు కోల్పోయిన విషయం తెలిసిందే.