Karnataka Teenage Murder | ఇన్‌స్టాలో మరో అబ్బాయితో చాటింగ్ చేసిందని.. 16 ఏళ్ల ప్రియురాలిని తుపాకీతో కాల్చి చంపిన మైనర్!

• వేరే అబ్బాయితో ఇన్‌స్టాగ్రామ్‌లో మాట్లాడుతోందనే కోపంతో 16 ఏళ్ల మైనర్ బాలుడి దారుణం
• కనకపుర తాలూకాలో తనతో సహజీవనం చేస్తున్న బాలికను నాటు తుపాకీతో కాల్చి చంపిన వైనం
• హత్యను దాచిపెట్టేందుకు బాలుడికి సహకరించి, పొలంలో మృతదేహాన్ని పూడ్చిపెట్టిన సోదరుడు, మామ
• మద్యం మత్తులో మామ చేసిన వ్యాఖ్యలతో వారం తర్వాత వెలుగులోకి వచ్చిన ఘటన. ముగ్గురు అరెస్ట్

Karnataka Teenage Murder | త్రినేత్ర.న్యూస్ : సోషల్ మీడియా పరిచయాలు, అనుమానాలు దారుణాలకు దారి తీస్తున్నాయి. కర్ణాటకలోని రామనగర (బెంగళూరు సౌత్) జిల్లా కనకపుర తాలూకాలో ఓ మైనర్ బాలుడు తనతో సహజీవనం (live-in relationship) చేస్తున్న 16 ఏళ్ల ప్రియురాలిని తుపాకీతో పాయింట్ బ్లాంక్‌లో కాల్చి చంపాడు. జులై 10న జరిగిన ఈ దారుణం.. ఓ వ్యక్తి మద్యం మత్తులో చేసిన వ్యాఖ్యలతో వారం తర్వాత వెలుగులోకి రావడం స్థానికంగా కలకలం రేపుతోంది.

ఇన్‌స్టాగ్రామ్ చాటింగే ప్రాణం తీసింది

పోలీసులు తెలిపిన వివరాల ప్రకారం.. నిందితుడికి, మృతురాలికి ఇద్దరికీ 16 ఏళ్లే. చదువు మానేసిన వీళ్లు రెండు నెలల క్రితం సోషల్ మీడియా ద్వారా పరిచయమయ్యారు. గత నెల రోజులుగా కొడిహళ్లి పోలీస్ స్టేషన్ పరిధిలోని కెంపలనాథ గ్రామంలో బాలుడి ఇంట్లోనే ఇద్దరూ కలిసుంటున్నారు.

జులై 10వ తేదీన బాలిక ఇన్‌స్టాగ్రామ్‌లో వేరొక అబ్బాయితో మెసేజ్‌లు చేయడం బాలుడు గమనించాడు. ఇదే విషయమై ఇద్దరి మధ్య తీవ్ర వాగ్వాదం జరిగింది. కోపంతో ఊగిపోయిన ఆ మైనర్ బాలుడు.. ఇంట్లో అక్రమంగా దాచిన తాతయ్య నాటు తుపాకీతో (country-made firearm) బాలిక ముఖంపై కాల్పులు జరపడంతో ఆమె అక్కడికక్కడే మృతి చెందింది.

పొలంలో మృతదేహం.. కప్పిపుచ్చే ప్రయత్నం

హత్య తర్వాత భయపడిన బాలుడు.. తన 19 ఏళ్ల అన్న పుట్టమాదు, 40 ఏళ్ల మామ రవికి సమాచారం ఇచ్చాడు. ఈ నేరాన్ని దాచేయడానికి ముగ్గురూ కలిసి పక్కా స్కెచ్ వేశారు. రాత్రికి రాత్రే బాలిక మృతదేహాన్ని తీసుకెళ్లి సమీపంలోని ఓ వ్యవసాయ పొలంలో పూడ్చిపెట్టారు.

మద్యం మత్తులో అసలు నిజం లీక్

ఈ దారుణం వారం రోజుల పాటు ఎవరికీ తెలియలేదు. అయితే, ఓ రోజు బార్‌లో మద్యం మత్తులో బాలుడి మామ ఈ హత్య గురించి తన స్నేహితుల దగ్గర ప్రస్తావించాడు. ఆ నోటా ఈ నోటా ఊర్లో పుకార్లు వ్యాపించాయి. మరోవైపు.. అప్పటికే బాలిక తల్లిదండ్రులు మిస్సింగ్ కేసు (missing report) నమోదు చేయడంతో పోలీసులు అలర్ట్ అయ్యారు. పుకార్ల ఆధారంగా బాలుడిని అదుపులోకి తీసుకొని విచారించగా అసలు నేరం అంగీకరించాడు.

ముగ్గురు అరెస్ట్.. సీరియస్‌గా విచారణ

జులై 18న తహసీల్దార్ సమక్షంలో పోలీసులు మృతదేహాన్ని వెలికితీసి పోస్ట్‌మార్టం నిమిత్తం తరలించారు. హత్యకు ఉపయోగించిన తుపాకీని సీజ్ చేశారు. ప్రధాన నిందితుడైన మైనర్ బాలుడితో పాటు.. మృతదేహాన్ని మాయం చేసేందుకు యత్నించిన అన్న, మామను అరెస్ట్ చేశారు. వారిపై హత్య, పోక్సో (POCSO) చట్టం కింద కేసులు నమోదు చేశారు.

మైనర్ల సహజీవనం గురించి తెలిసీ రెండు కుటుంబాల పెద్దలు ఎందుకు సైలెంట్‌గా ఉన్నారనే కోణంలో కూడా పోలీసులు దర్యాప్తు చేస్తున్నారు. ఈ కేసులో తల్లిదండ్రుల నిర్లక్ష్యం ఎంతవరకు ఉందనేది విచారణలో తేలనుంది.