Dehradun Student Suicide | కన్నీరు పెట్టిస్తున్న క్లాస్ 12 టాపర్ సూసైడ్ నోట్.. నీట్ ఎగ్జామ్ టెన్షన్‌తో కార్గిల్ వీరుడి కూతురు ఆత్మహత్య

Dehradun Student Suicide | త్రినేత్ర.న్యూస్ : ఉత్తరాఖండ్‌లోని డెహ్రాడూన్‌లో తీవ్ర విషాదం చోటుచేసుకుంది. 12వ తరగతిలో స్కూల్ టాపర్‌గా నిలిచిన 23 ఏళ్ల యువతి తన ఇంట్లోనే ఉరివేసుకుని ఆత్మహత్యకు పాల్పడింది. చదువుల ఒత్తిడిని తట్టుకోలేక బలవన్మరణానికి పాల్పడిన ఆమె.. "ఐ లవ్ యూ మమ్మీ, పాపా" అంటూ రాసిన సూసైడ్ నోట్ ప్రతి ఒక్కరినీ కంటతడి పెట్టిస్తోంది. ఈమె 1999 కార్గిల్ యుద్ధంలో దేశం కోసం పోరాడిన ఓ రిటైర్డ్ ఆర్మీ జవాను కుమార్తె కావడం గమనార్హం.

మృతురాలి పేరు రియా కుమారి థాపా. మంగళవారం మధ్యాహ్నం భోజనానికి పిలిచేందుకు తల్లి ఆమె రూమ్ దగ్గరికి వెళ్లడంతో ఈ ఘటన వెలుగులోకి వచ్చింది. తల్లి ఎంతసేపు పిలిచినా లోపలి నుంచి ఎలాంటి సమాధానం రాలేదు. ఆమె తలుపులు కూడా తీయకపోవడంతో అనుమానం వచ్చి వెంటనే తండ్రికి సమాచారం ఇచ్చింది. కుటుంబ సభ్యులు కంగారుగా తలుపులు పగలగొట్టి లోపలికి చూడగా, అప్పటికే రియా ఉరివేసుకుని విగతజీవిగా కనిపించింది.

వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు, ఆమె గదిలో ఒక సూసైడ్ నోట్‌ను స్వాధీనం చేసుకున్నారు. "ఐ లవ్ యూ మమ్మీ, పాపా. నా చావుకు ఎవరూ కారణం కాదు" అని అందులో హిందీలో రాసి ఉంది.

నీట్ ఎగ్జామ్ టెన్షనే కారణమా?

ఈ ఘటనపై సీనియర్ పోలీస్ ఆఫీసర్ అంకిత్ కండారి మాట్లాడుతూ.. "రియా రాత్రి పూట ఎక్కువసేపు చదువుకునేదని, ఉదయం ఆలస్యంగా నిద్రలేచేదని కుటుంబ సభ్యులు చెప్పారు. సూసైడ్ నోట్‌లో తన తండ్రిపై ఉన్న ప్రేమను వ్యక్తపరిచింది. తనను తాను అసమర్థురాలిగా భావించడం వల్లే ఈ నిర్ణయం తీసుకున్నట్లు అందులో రాసింది. తన మరణానికి ఎవరూ బాధ్యులు కారని స్పష్టం చేసింది" అని వెల్లడించారు. చదువులో తాను ఆశించిన స్థాయికి చేరుకోలేకపోతున్నాననే ఫ్రస్ట్రేషనే ఆమె ఆత్మహత్యకు ప్రధాన కారణమని పోలీసులు భావిస్తున్నారు.

రియా కుమారి థాపా చదువులో చాలా చురుగ్గా ఉండేది. 12వ తరగతిలో ఏకంగా 97 శాతం మార్కులు సాధించి స్కూల్ టాపర్‌గా నిలిచింది. డాక్టర్ కావాలన్న కలతో ప్రస్తుతం ఆమె జూన్ 21న జరగాల్సిన NEET-UG రీ-ఎగ్జామ్ కోసం ప్రిపేర్ అవుతోంది. గతంలో మొదటి అటెంప్ట్‌లో ఆమెకు మెడికల్ సీటు రాలేదు. ఆ వైఫల్యం, మళ్లీ రాయాల్సిన ఎగ్జామ్ తెచ్చిన ఒత్తిడి వల్లే ఆమె ఈ దారుణ నిర్ణయం తీసుకుని ఉంటుందని తెలుస్తోంది.