Meta AI | ఆ వివాదంలో మెటా యూటర్న్‌.. వెబ్‌సైట్ల కంటెంట్‌పై కీలక వివరణ!

Meta AI | ఆర్టిఫిషియల్‌ ఇంటెలిజెన్స్‌ (AI) మోడల్స్ అభివృద్ధి కోసం వెబ్‌సైట్లలోని కంటెంట్‌ను వినియోగించే అంశంపై టెక్‌ దిగ్గజం మెటా వెనక్కి తగ్గింది. వార్తా సంస్థలు, డిజిటల్‌ పబ్లిషర్ల నుంచి విమర్శలు వెల్లువెత్తడంతో తన వాణిజ్య నిబంధనల్లోని వివాదాస్పద నిబంధనను తొలగించింది. అయితే, దీనివల్ల వెబ్‌ క్రాలింగ్‌ విధానంలో ఎలాంటి మార్పు రాలేదని, వెబ్‌సైట్ల కంటెంట్‌ను వినియోగించే హక్కులను పెంచుకోలేదని కంపెనీ స్పష్టం చేసింది.

ఇంతకీ వివాదం ఏమిటి?

మెటా బిజినెస్ రూల్స్ పేజీలో ఇటీవల ఓ నిబంధనను చేర్చింది. నిర్దిష్ట డొమైన్లు, వెబ్‌పేజీలు, యూఆర్‌ఎల్‌లలోని కంటెంట్‌ను తమ ఉత్పత్తులు, సేవలు, ఫీచర్ల అభివృద్ధి, మెరుగుదల, పరిశోధన, శిక్షణ కోసం వినియోగించవచ్చని అందులో పేర్కొంది. దీంతో వార్తా సంస్థలు, పబ్లిషర్ల వెబ్‌సైట్లలోని సమాచారాన్ని ఏఐ మోడళ్ల శిక్షణకు ఉపయోగించుకునే అవకాశం ఉందనే ఆందోళనలు వ్యక్తమయ్యాయి. ప్రపంచవ్యాప్తంగా అనేక వార్తా సంస్థలు, మీడియా సంస్థలు ఫేస్‌బుక్‌, ఇన్‌స్టాగ్రామ్‌లలో తమ కథనాలను పంచుకుంటున్నాయి. ఈ నేపథ్యంలో వెబ్‌సైట్లలోని వార్తలు, ఇంటర్వ్యూలు, విశ్లేషణలను ఏఐ శిక్షణకు వినియోగిస్తే.. అసలు వెబ్‌సైట్లకు నష్టం వాటిల్లుతుందని పబ్లిషర్స్ ఆందోళన వ్యక్తం చేశారు.

పబ్లిషర్లకు ట్రాఫిక్‌, ప్రకటనల ఆదాయంపై ఆందోళన

మెటా ఏఐ మోడళ్లు వార్తలను విశ్లేషించి, వినియోగదారుల ప్రశ్నలకు నేరుగా ఫేస్‌బుక్‌, ఇన్‌స్టాగ్రామ్‌లలో సమాధానాలు ఇస్తే.. అసలు వార్తా వెబ్‌సైట్లను సందర్శించే వారి సంఖ్య తగ్గే ప్రమాదం ఉందనే అభిప్రాయాలు వ్యక్తమయ్యాయి. దీనివల్ల పబ్లిషర్ల వెబ్‌సైట్‌ ట్రాఫిక్‌తోపాటు ప్రకటనల ద్వారా వచ్చే ఆదాయంపైనా ప్రభావం పడొచ్చనే ఆందోళనలు వ్య‌క్త‌మ‌య్యాయి. వెబ్‌సైట్లలోని సమాచారాన్ని ఏఐ శిక్షణకు వినియోగించేందుకు అనుమతి అవసరమా? కంటెంట్ క్రియేట‌ర్స్‌కు పరిహారం చెల్లించాలా? అనే ప్రశ్నలు మరోసారి చర్చకు వచ్చాయి.

వెబ్‌ క్రాలింగ్‌పై నిపుణుల సందేహాలు

మెటా నిబంధనలపై నీమన్‌ ల్యాబ్‌, కార్నెల్‌ యూనివర్సిటీకి చెందిన డిజిటల్‌ లా నిపుణుడు జేమ్స్‌ గ్రిమెల్‌మన్‌ సహా పలువురు నిపుణులు సందేహాలు వ్యక్తం చేశారు. నిబంధనలను విస్తృతంగా అర్థం చేసుకుంటే.. వెబ్‌సైట్ల కంటెంట్‌ను ఎలాంటి చెల్లింపులు లేకుండా ఏఐ శిక్షణకు వినియోగించే అవకాశం ఉంటుందని ఆందోళన వ్యక్తం చేశారు. వెబ్‌సైట్లలోని సమాచారాన్ని ఆటోమేటిక్‌గా సేకరించే బాట్లు, వెబ్‌ క్రాలర్లను నియంత్రించేందుకు నిర్వాహకులు సాధారణంగా `robots.txt` ఫైల్‌ను ఉపయోగిస్తారు. అయితే, మెటా కొత్త నిబంధనలు ఈ పరిమితులను పక్కనపెట్టే అవకాశం ఉందా? అనే సందేహాలు కూడా తలెత్తాయి.

విమర్శలతో నిబంధన తొలగింపు

కొత్త నిబంధనపై టెక్‌ రంగంతోపాటు మీడియా సంస్థలు, డిజిటల్‌ పబ్లిషర్ల నుంచి విమర్శలు రావడంతో మెటా అక్టోబర్‌ 17న వివాదాస్పద క్లాజ్‌ను తొలగించింది. తమ నిబంధనలను తప్పుగా అర్థం చేసుకున్నారని కంపెనీ ప్రతినిధి వివరణ ఇచ్చారు. ఈ నిబంధనలు ప్రకటనలు, వ్యాపార సంబంధిత టూల్స్‌ను మెరుగుపరచడానికి ఉద్దేశించినవేనని పేర్కొన్నారు. మెటా కమ్యూనికేషన్స్‌ వైస్‌ ప్రెసిడెంట్‌ ఆండీ స్టోన్‌ కూడా వెబ్‌ క్రాలర్ల ద్వారా సమాచారాన్ని సేకరించే విధానంలో ఎలాంటి మార్పు లేదని తెలిపారు. దీనికి విరుద్ధంగా వస్తున్న వాదనలు అవాస్తవమని పేర్కొన్నారు. అయితే, వివాదాస్పద నిబంధన తొలగింపుతో వెబ్‌సైట్ల కంటెంట్‌ వినియోగంపై ఉన్న విస్తృత చర్చకు తెరపడినట్లు కాదు.

ఏఐ శిక్షణ కోసం డేటా వినియోగంపై గతంలోనూ వివాదాలు

ఏఐ సంస్థలు తమ మోడళ్ల సామర్థ్యాలను పెంచుకునేందుకు ఇంటర్నెట్‌లో అందుబాటులో ఉన్న విస్తృత సమాచారాన్ని వినియోగిస్తుంటాయి. అయితే, సమాచారం బహిరంగంగా అందుబాటులో ఉందనే కారణంతో దాన్ని ఎలాంటి పరిమితులు లేకుండా ఉపయోగించవచ్చా? అనే అంశంపై కాపీరైట్‌, గోప్యత, అనుమతులకు సంబంధించిన వివాదాలు కొనసాగుతున్నాయి. ఎలాన్‌ మస్క్‌కు చెందిన ఎక్స్‌ఏఐ సంస్థ తన గ్రోక్‌ చాట్‌బాట్‌ శిక్షణ కోసం ఎక్స్‌లోని బహిరంగ పోస్టులను ఉపయోగిస్తోంది. మెటా కూడా 18 ఏళ్లు పైబడిన వినియోగదారులు బహిరంగంగా పంచుకున్న కొంత కంటెంట్‌ను ఏఐ శిక్షణకు వినియోగిస్తోంది. ఈ విధానాలు డేటా వినియోగం, వినియోగదారుల సమ్మతి అంశాలపై చర్చకు దారితీశాయి. గతేడాది కాపీరైట్‌ ఉల్లంఘన ఆరోపణలతో దాఖలైన ఓ కీలక కేసులో మెటాకు అనుకూలంగా తీర్పు వచ్చింది. అయితే, ఇతర ఏఐ సంస్థలపై ఇలాంటి కేసులు ఇంకా కొనసాగుతున్నాయి. ఒక్కో కేసులోని వాస్తవాలు, చట్టపరమైన అంశాలు వేర్వేరుగా ఉండొచ్చు.

వీట్రాన్స్‌ఫర్‌ కూడా నిబంధనలు మార్చింది

వినియోగదారుల కంటెంట్‌ను ఏఐ శిక్షణకు ఉపయోగించే అంశంపై మెటా ఒక్కటే వివాదాన్ని ఎదుర్కొంటున్న సంస్థ కాదు. ఫైల్‌ షేరింగ్‌ సేవల సంస్థ వీట్రాన్స్‌ఫర్‌ 2025 జూలైలో తన స‌ర్వీస్ నిబంధనలను మార్చింది. వినియోగదారులు అప్‌లోడ్‌ చేసిన ఫైళ్లను మెషిన్‌ లెర్నింగ్‌ మోడళ్ల మెరుగుదలకు ఉపయోగించవచ్చనే అర్థం వచ్చే నిబంధనలపై అభ్యంతరాలు వ్యక్తమయ్యాయి. దీంతో ఆ తర్వాత తన నిబంధనల్లో మెషిన్‌ లెర్నింగ్‌, ఏఐ ప్రస్తావనలను తొలగించింది. మొత్తంగా మెటా తాజా పరిణామం ఇంటర్నెట్‌లోని కంటెంట్‌ను ఏఐ శిక్షణకు వినియోగించే అంశంపై మరోసారి చర్చకు దారితీసింది. కంటెంట్‌ సృష్టికర్తల హక్కులు, కాపీరైట్‌, డేటా గోప్యత, అనుమతులపై టెక్‌ సంస్థలు, పబ్లిషర్ల మధ్య వివాదాలు కొనసాగే అవ‌కాశం క‌నిపిస్తోంది.