Stock Markets | షార్ప్‌ పతనం తర్వాత మార్కెట్లకు ఊరట.. సెన్సెక్స్‌ 173 పాయింట్లు అప్‌..

Stock Markets | గత సెషన్‌లో భారీగా పతనమైన తర్వాత శుక్రవారం దేశీయ స్టాక్‌ మార్కెట్లు లాభాల్లో ట్రేడవుతున్నాయి. భారీగా పడిపోయిన షేర్లలో ఇన్వెస్టర్లు విలువ ఆధారిత కొనుగోళ్లకు మొగ్గుచూపడంతో బెంచ్‌మార్క్‌ సూచీలు సెన్సెక్స్‌, నిఫ్టీ స్వల్ప లాభాల్లో కదులుతున్నాయి. ఉదయం 9.40 గంటల సమయంలో సెన్సెక్స్‌ 172.89 పాయింట్లు (0.23 శాతం) లాభపడి 73,753.43 వద్ద ట్రేడైంది. మరోవైపు నిఫ్టీ 49.95 పాయింట్లు (0.22 శాతం) పెరిగి 23,113.05 వద్ద కొనసాగింది. గత సెషన్‌లో మార్కెట్లు 10 వారాల్లోనే అత్యంత భారీ పతనాన్ని నమోదు చేశాయి. పెరిగిన ముడి చమురు ధరలు, ప్రపంచ బాండ్‌ ఈల్డ్స్‌ మార్కెట్‌ సెంటిమెంట్‌పై ఒత్తిడి కొనసాగించడంతో భారీ అమ్మకాలు చోటుచేసుకున్నాయి. ఈ నేపథ్యంలో శుక్రవారం పడిపోయిన షేర్లలో ఇన్వెస్టర్లు విలువ ఆధారిత కొనుగోళ్లకు దిగడం మార్కెట్లకు కొంత మద్దతుగా నిలిచింది.

త‌గ్గిన చ‌మురు ధ‌ర‌లు..

ముడి చమురు ధరలు కూడా శుక్రవారం స్వల్పంగా తగ్గాయి. అయితే బ్రెంట్‌ క్రూడ్‌ బ్యారెల్‌కు 105 డాలర్లకు పైనే కొనసాగడం భారత్‌కు ఇప్పటికీ కీలకమైన రిస్క్‌గా ఉంది. అమెరికా, ఇరాన్‌ మధ్య కాల్పుల విరమణకు అవకాశం ఉందన్న అంచనాలతోపాటు, సౌదీ అరేబియాపై హౌతీ దాడుల నేపథ్యంలో కొనసాగుతున్న భౌగోళిక రాజకీయ ఉద్రిక్తతలను ఇన్వెస్టర్లు పరిశీలిస్తున్నారు. బ్రెంట్‌ క్రూడ్‌ ఫ్యూచర్స్‌ 0.82 శాతం తగ్గి బ్యారెల్‌కు 105.73 డాలర్లకు చేరగా, వెస్ట్‌ టెక్సాస్‌ ఇంటర్మీడియట్‌ 1.65 శాతం తగ్గి 93.05 డాలర్ల వద్ద నిలిచింది. మార్కెట్‌లో భయాన్ని సూచించే ఇండియా విక్స్‌ కూడా 3 శాతం తగ్గి 12.32 స్థాయికి చేరింది. విక్స్‌ తగ్గడం మార్కెట్‌లో తక్షణ భయాందోళనలు కొంత తగ్గినట్లు సూచిస్తోంది.

బ‌ల‌హీనంగానే నిఫ్టీ50..

సాంకేతికంగా మాత్రం నిఫ్టీ 50పై ఒత్తిడి కొనసాగుతోందని ఎన్‌రిచ్‌ మనీ సీఈఓ, సెబీ రిజిస్టర్డ్‌ ఆన్‌లైన్‌ ట్రేడింగ్‌, వెల్త్‌టెక్‌ సంస్థకు చెందిన పొన్ముడి ఆర్‌ పేర్కొన్నారు. గత సెషన్‌లో భారీ పతనం తర్వాత నిఫ్టీ విస్తృత నిర్మాణం బలహీనంగానే ఉందని తెలిపారు. పైవైపు 23,200 నుంచి 23,300 స్థాయి వరకు తక్షణ నిరోధ ప్రాంతంగా ఉండే అవకాశం ఉందన్నారు. 23,300 పైన స్థిరమైన ముగింపు నమోదైతే 23,400 నుంచి 23,500 వరకు ఉపశమన ర్యాలీకి అవకాశం ఉంటుంద‌ని పేర్కొన్నారు. అయితే ఆ స్థాయిని స్పష్టంగా తిరిగి సాధించే వరకు ఏదైనా పెరుగుదలలో మళ్లీ అమ్మకాల ఒత్తిడి ఎదురయ్యే అవకాశం ఉందన్నారు. మరోవైపు 23,000 స్థాయి కీలక మానసిక మద్దతుగా ఉంటుందని పొన్ముడి ఆర్‌ తెలిపారు. ఆప్షన్స్‌ డేటాలో 23,000 స్థాయి వద్ద భారీ పుట్‌ ఓపెన్‌ ఇంట్రెస్ట్‌ ఉండడం కూడా ఈ స్థాయికి ప్రాధాన్యతను పెంచుతోందన్నారు. 23,000 కంటే దిగువకు నిర్ణయాత్మకంగా పడిపోతే అమ్మకాలు మరింత వేగం పుంజుకుని నిఫ్టీ 22,900 నుంచి 22,800 స్థాయిల వైపు వెళ్లే అవకాశం ఉందన్నారు.

మొత్తంగా సమీప కాలంలో నిఫ్టీ నిర్మాణం బేరిష్‌గానే ఉందని ఆయన పేర్కొన్నారు. ఓవర్‌సోల్డ్‌ పరిస్థితుల కారణంగా మధ్యమధ్యలో స్వల్ప ఉపశమన ర్యాలీలు కనిపించే అవకాశం ఉన్నప్పటికీ, స్థిరమైన రికవరీ కోసం నిఫ్టీ ముందుగా 23,300 స్థాయిని, ఆ తర్వాత 23,500 స్థాయిని తిరిగి సాధించాల్సి ఉంటుందని వివరించారు.