Amazon Music | అమెజాన్ మ్యూజిక్‌లో భారీ మార్పులు.. కొత్త అన్‌లిమిటెడ్ ప్లాన్ ప్రారంభం..

Amazon Music | దేశంలో అమెజాన్ మ్యూజిక్ తన సేవలను విస్తరించుతూ కొత్త ప్రీమియం సబ్‌స్క్రిప్షన్ ప్లాన్ అమెజాన్ మ్యూజిక్ అన్‌లిమిటెడ్ ని అధికారికంగా ప్రారంభించింది. ఈ తాజా అప్‌డేట్‌తో అమెజాన్ మ్యూజిక్ సేవలను మూడు వేర్వేరు టియర్లుగా విభజించింది. వినియోగదారుల అవసరాలు, ఆడియో నాణ్యత, ఫీచర్లు, ధరలను దృష్టిలో ఉంచుకుని ఈ కొత్త నిర్మాణాన్ని తీసుకొచ్చింది. క్యాజువల్‌గా సంగీతం వినేవారి నుంచి హై-క్వాలిటీ ఆడియో అనుభవాన్ని కోరుకునే వినియోగదారుల వరకు అందరికీ తగిన ఎంపికలను అందించడమే ఈ మార్పుల ప్రధాన లక్ష్యంగా అమెజాన్ తెలిపింది. ప్రస్తుతం అమెజాన్ మ్యూజిక్ మూడు విభాగాల్లో అందుబాటులోకి వచ్చింది. అమెజాన్ మ్యూజిక్ అన్‌లిమిటెడ్, అమెజాన్ మ్యూజిక్ ఫర్ ప్రైమ్ మెంబర్స్, అమెజాన్ మ్యూజిక్ ఫ్రీ పేరిట మూడు కేట‌గిరిల్లో ఈ సేవ‌ల‌ను అందిస్తున్నారు. అయితే ఫ్రీ ప్లాన్ మాత్రం త్వ‌ర‌లో ప్రారంభం కానుంది.

ప్రైమ్ స‌భ్యుల‌కు నెల‌కు రూ.99

అమెజాన్ మ్యూజిక్ అన్‌లిమిటెడ్ అత్యంత ప్రీమియం ప్లాన్‌గా అందుబాటులోకి వచ్చింది. ఇందులో 100 మిలియన్లకు పైగా పాటలను ఆన్-డిమాండ్‌లో వినే అవకాశం ఉంటుంది. ప్రకటనలు లేకుండా సంగీతాన్ని ఆస్వాదించవచ్చు. అలాగే హెచ్‌డీ, అల్ట్రా హెచ్‌డీ, స్పేషియల్ ఆడియో (డాల్బీ అట్మాస్) సపోర్ట్ లభిస్తుంది. పాటలను డౌన్‌లోడ్ చేసుకుని ఇంటర్నెట్ లేకుండానే వినే సదుపాయం కూడా ఉంటుంది. ప్రముఖ పోడ్‌కాస్ట్‌లకు యాక్సెస్ లభిస్తుంది. ఈ ప్లాన్ ధర ప్రైమ్ సభ్యులకు నెలకు రూ.99 కాగా, నాన్-ప్రైమ్ వినియోగదారులకు నెలకు రూ.119గా నిర్ణయించారు. ఇక అమెజాన్ మ్యూజిక్ ఫర్ ప్రైమ్ మెంబర్స్ పేరిట ప్రైమ్ సభ్యత్వంలో అదనపు చార్జీలు లేకుండా ఈ సేవ అందుబాటులో ఉంటుంది. 100 మిలియన్లకు పైగా పాటలు, పోడ్‌కాస్ట్‌లకు పూర్తి ఆన్-డిమాండ్ యాక్సెస్ ఉంటుంది. అయితే ఈ టియర్‌లో పరిమిత ప్రకటనలు ఉంటాయి. అలాగే ఆఫ్‌లైన్ డౌన్‌లోడ్ సదుపాయం అందుబాటులో ఉండదు.

ఫ్రీ ప్లాన్ కూడా..

త్వరలో ప్రారంభం కానున్న అమెజాన్ మ్యూజిక్ ఫ్రీ టియర్ ద్వారా నాన్-ప్రైమ్ వినియోగదారులు కూడా అమెజాన్ మ్యూజిక్ పూర్తి క్యాటలాగ్‌ను ఉచితంగా వినగలుగుతారు. అయితే ఇది ప్రకటనల ఆధారిత సేవగా ఉంటుంది. చెల్లింపు ప్లాన్‌లతో పోలిస్తే కొన్ని ఫీచర్లు పరిమితంగా ఉంటాయి. అమెజాన్ మ్యూజిక్ అన్‌లిమిటెడ్ ప్లాన్‌ను అత్యుత్తమ సంగీత అనుభవం కోసం రూపొందించారు. ఇందులో స్టూడియో-క్వాలిటీ సౌండ్ అందించే స్పేషియల్ ఆడియో, హెచ్‌డీ, అల్ట్రా హెచ్‌డీ ట్రాక్‌లకు మద్దతు ఉంటుంది. మొత్తం సంగీతం, పోడ్‌కాస్ట్ క్యాటలాగ్‌ను ప్రకటనలు లేకుండా వినవచ్చు. అలాగే పాటలను డివైస్‌లో డౌన్‌లోడ్ చేసుకుని ఆఫ్‌లైన్‌లో వినే అవకాశం కల్పించారు.

ప్రారంభ ఆఫ‌ర్‌..

కొత్త అన్‌లిమిటెడ్ సేవ ప్రారంభం సంద‌ర్భంగా అమెజాన్ ప్రత్యేక ట్రయల్ ఆఫర్‌ను ప్రకటించింది. ప్రైమ్ సభ్యులు ఆరు నెలల పాటు ఉచితంగా అమెజాన్ మ్యూజిక్ అన్‌లిమిటెడ్‌ను ఉపయోగించుకోవచ్చు. ట్రయల్ ముగిసిన తర్వాత నెలకు రూ.99 చెల్లించి సేవను కొనసాగించవచ్చు. నాన్-ప్రైమ్ వినియోగదారులకు మూడు నెలల ఉచిత ట్రయల్ లభిస్తుంది. ఆ తర్వాత సబ్‌స్క్రిప్షన్ ఆటోమేటిక్‌గా నెలకు రూ.119 ధరతో రీన్యూ అవుతుంది. ప్రస్తుతం ఈ కొత్త టియర్లు అమల్లోకి రాగా వినియోగదారులు అమెజాన్ మ్యూజిక్ యాప్ లేదా వెబ్‌సైట్ ద్వారా తాజా ప్లాన్‌లను ఉపయోగించుకోవచ్చు.