Festive Season Appliance Price Hike | పండక్కి ఆఫర్లా.. వాతలా? వినియోగదారులకు ఊహించని షాక్.. అక్టోబర్ 1 నుంచి ఏసీలు, టీవీల ధరలు పైపైకి

Festive Season Appliance Price Hike | త్రినేత్ర న్యూస్ : దసరా, దీపావళి పండగలు వస్తున్నాయంటే చాలు.. టీవీలు, ఏసీలు, వాషింగ్ మెషీన్లు కొందామని ప్రతి ఇల్లూ ప్లాన్ చేసుకుంటుంది. ప్రతి ఏటా పండగ సీజన్‌లో భారీ డిస్కౌంట్లు, ఆఫర్లు పెట్టడం సహజం. కానీ, ఈసారి సీన్ పూర్తిగా రివర్స్ అయ్యింది. పండగ ఆఫర్ల కోసం ఎదురుచూస్తున్న వినియోగదారుల నెత్తిన కంపెనీలు ధరల భారాన్ని మోపనున్నాయి. అక్టోబర్ 1 నుంచి హోమ్ అప్లయన్సెస్ ధరలను 5% నుంచి 8% వరకు పెంచేందుకు బ్లూ స్టార్, గోద్రెజ్, హైయర్, డైకిన్ వంటి దిగ్గజ సంస్థలు సిద్ధమయ్యాయి. 2026 సంవత్సరంలోనే ఇది మూడోసారి కావడం గమనార్హం.

ఏయే వస్తువులపై ఎంత భారం?

ఏసీలు అండ్ డీప్ ఫ్రీజర్ల ధరలు 5% నుంచి 8% వరకు పెరగనున్నాయి. వాషింగ్ మెషీన్లు, ఫ్రిడ్జ్‌లు, ఎల్‌ఈడీ టీవీలపై సుమారు 3% నుంచి 4% వరకు అదనపు భారం పడనుంది. బడ్జెట్ సైజ్ టీవీలపై దీపావళి తర్వాత ఏకంగా 10% నుంచి 20% వరకు పెరిగే అవకాశముంది.

పండగ వేళ ధరలు ఎందుకు పెరుగుతున్నాయి?

సాధారణంగా ఫెస్టివల్ సేల్స్‌లో కంపెనీలు లాభాలను తగ్గించుకుని భారీగా విక్రయాలు జరుపుతాయి. కానీ ఈసారి గ్లోబల్ పరిస్థితులు కంపెనీల మార్జిన్లను పూర్తిగా దెబ్బతీశాయి.

ముడిసరుకుల రేట్ల మంట: ఒక ఏసీ తయారీకి 3 నుంచి 4 కేజీల రాగి అవసరం. అంతర్జాతీయ మార్కెట్లో టన్ను రాగి ధర గత ఏడాదితో పోలిస్తే 8,000 డాలర్ల నుంచి ఏకంగా 14,500 డాలర్లకు ఎగబాకింది. అల్యూమినియం, స్టీల్ ధరలు కూడా 25% పైగా పెరిగాయి.

యుద్ధ మేఘాలు - షిప్పింగ్ ఛార్జీలు: పశ్చిమాసియా సంక్షోభం వల్ల సముద్ర రవాణా వ్యయాలు విపరీతంగా పెరిగిపోయాయి. డాలర్ బలపడటంతో దిగుమతి ఖర్చులు తడిసిమోపెడవుతున్నాయి.

ఏఐ చిప్‌ల ప్రభావం: చిప్ తయారీ సంస్థలు తమ ప్రొడక్షన్‌ను ఏఐ సర్వర్ మెమరీ చిప్‌ల వైపు మళ్లించడంతో.. సాధారణ స్మార్ట్ టీవీలు, వాషింగ్ మెషీన్లకు వాడే చిప్‌ల కొరత ఏర్పడి రేట్లు పెరిగాయి.

కస్టమర్లకు ఉన్న ఊరట ఒక్కటే

మరి పండగ ఆఫర్ల పరిస్థితి ఏంటి? కంపెనీలు ఎప్పటిలాగే బ్యాంక్ క్యాష్‌బ్యాక్‌లు, నో-కాస్ట్ ఈఎంఐ ఆఫర్లు ప్రకటిస్తాయి. అయితే బేస్ ప్రైస్ పెరగడం వల్ల గత ఏడాదితో పోలిస్తే జేబుకు చిల్లు పడటం ఖాయం.

అయితే కొనుగోలుదారులకు ఒక చిన్న వెసులుబాటు ఉంది. డీలర్లు, షోరూమ్ యజమానులు ఆగస్టు, సెప్టెంబర్ నెలల్లోనే పాత ధరలతో భారీగా స్టాక్‌ను గోడౌన్లలో నిల్వ చేసుకున్నారు. ఈ "ఓల్డ్ స్టాక్" మరో నెల నుంచి నెలన్నర పాటు అంటే దాదాపు దీపావళి వరకు అందుబాటులో ఉంటుందని గోద్రెజ్ అప్లయన్సెస్ బిజినెస్ హెడ్ కమల్ నంది తెలిపారు. కాబట్టి కొత్త ధరలు అమల్లోకి రాకముందే, పాత స్టాక్ ఉన్నప్పుడే కొనుగోలు పూర్తి చేసుకోవడం వినియోగదారులకు ఎంతో మేలు. దీపావళి ముగిసిన వెంటనే కొత్త రేట్లు పూర్తిస్థాయిలో అమల్లోకి వస్తాయి.