Yamaha Aerox E | యమహా నుంచి కొత్త ఎలక్ట్రిక్ స్కూటర్.. ఒక్క‌సారి చార్జ్ చేస్తే 117 కి.మీ. రేంజ్‌..

Yamaha Aerox E | భారత మార్కెట్లో యమహా తన కొత్త ఎలక్ట్రిక్ స్కూటర్ యమహా ఏరోక్స్-ఈ ని అధికారికంగా విడుదల చేసింది. ఈ స్కూటర్ ప్రారంభ ఎక్స్‌షోరూమ్ ధర ఢిల్లీలో రూ.2.82 లక్షలుగా ఉంది. గతేడాది అంతర్జాతీయంగా పరిచయం చేసిన ఈ మోడల్‌ను ఇప్పుడు భారత మార్కెట్లో ఎంపిక చేసిన నగరాల్లో విక్రయానికి అందుబాటులోకి తీసుకొచ్చింది. ప్రస్తుతం ఈ ఎలక్ట్రిక్ స్కూటర్ ఢిల్లీ, బెంగళూరు, చెన్నై, ముంబై, పుణే నగరాల్లో కొనుగోలుకు అందుబాటులో ఉంది. భారత ఎలక్ట్రిక్ స్కూటర్ మార్కెట్లో ఇప్పటికే ఉన్న ఏథర్ 450 ఏపెక్స్, టీవీఎస్ ఎక్స్, ఓలా ఎస్1 ప్రో వంటి ప్రీమియం మోడళ్లకు యమహా ఏరోక్స్-ఈ గట్టి పోటీ ఇవ్వనుంది. యమహా ఏరోక్స్-ఈలో రెండు 1.5 కిలోవాట్ అవర్ సామర్థ్యం క‌లిగిన రిమూవ‌బుల్‌ బ్యాటరీ ప్యాక్‌లను అందించారు. ఇందులో పర్మనెంట్ మాగ్నెట్ సింక్రోనస్ మోటార్ (పీఎంఎస్‌ఎమ్)ను అమర్చారు. ఈ మోటార్ గరిష్ఠంగా 9.4 కిలోవాట్లు (12.60 హెచ్‌పీ) పవర్, 48 ఎన్ఎమ్ టార్క్ ను ఉత్పత్తి చేస్తుంది.

117 కిలోమీట‌ర్ల మైలేజ్‌..

కంపెనీ తెలిపిన వివరాల ప్రకారం పూర్తి చార్జ్‌తో ఈ స్కూటర్ ఐడీసీ సర్టిఫైడ్ 117 కిలోమీటర్ల వరకు రేంజ్ అందిస్తుంది. పవర్ మోడ్‌లో బూస్ట్ ఫీచర్ ను ఆన్ చేస్తే గరిష్ఠ వేగం గంటకు 95.5 కిలోమీటర్ల వరకు చేరుతుంది. బ్యాటరీ చార్జింగ్ విషయానికి వస్తే, ఒక్కో బ్యాటరీని 0 నుంచి 100 శాతం వరకు చార్జ్ చేయడానికి సుమారు 3 గంటల 10 నిమిషాలు పడుతుంది. రెండు బ్యాటరీలను ఒకేసారి పూర్తిగా చార్జ్ చేయాలంటే సుమారు 6 గంటల 20 నిమిషాల సమయం అవసరమవుతుంది. డిజైన్ పరంగా చూస్తే యమహా ఏరోక్స్-ఈ, పెట్రోల్ వెర్షన్ ఏరోక్స్ 155ను పోలి ఉంటుంది. అయితే ఇందులో ఉన్న ప్రధాన మార్పు కొత్త టీఎఫ్‌టీ డిస్‌ప్లే, ఇది పెట్రోల్ మోడల్‌లోని ఎల్‌సీడీ ఇన్‌స్ట్రుమెంట్ క్లస్టర్ స్థానాన్ని భర్తీ చేసింది. స్పోర్టీ మ్యాక్సీ-స్కూటర్ స్టైలింగ్, షార్ప్ బాడీ డిజైన్‌ను అలాగే కొనసాగించారు.

మూడు ర‌కాల రైడింగ్ మోడ్స్‌..

ఈ స్కూటర్ వీల్‌బేస్ 1,360 మిల్లీమీటర్లు కాగా, కర్బ్ వెయిట్ 139 కిలోలుగా ఉంది. ఇది సాధారణ ఏరోక్స్ 155 కంటే సుమారు 13 కిలోలు ఎక్కువ బరువును కలిగి ఉంది. యమహా ఏరోక్స్-ఈలో 14 ఇంచుల అలాయ్ వీల్స్ ను అందించారు. ముందు భాగంలో 110/80 టైర్, వెనుక భాగంలో 140/70 టైర్‌ను అమర్చారు. ఇవి మెరుగైన స్థిరత్వంతోపాటు స్పోర్టీ రైడింగ్ అనుభవాన్ని అందించేందుకు సహాయపడతాయి. ఈ ఎలక్ట్రిక్ స్కూటర్‌లో ఎకానమీ, స్టాండర్డ్, పవర్ అనే మూడు రైడింగ్ మోడ్‌లు ఉన్నాయి. అలాగే బూస్ట్ మోడ్, రివర్స్ మోడ్, ట్రాక్షన్ కంట్రోల్ సిస్టమ్ ను కూడా అందించారు. ఇతర ఫీచర్లలో యమహా వై-కనెక్ట్ ద్వారా బ్లూటూత్ కనెక్టివిటీ, ముందు-వెనుక డిస్క్ బ్రేక్‌లు, ఎల్‌ఈడీ హెడ్‌ల్యాంప్‌లు, ఎల్‌ఈడీ టెయిల్‌ల్యాంప్‌లు, టీఎఫ్‌టీ ఇన్‌స్ట్రుమెంట్ క్లస్టర్, సింగిల్-ఛానల్ ఏబీఎస్ వంటి ఆధునిక సదుపాయాలు ఉన్నాయి.