Nagoba Jatara 2026 | ముగిసిన నాగోబా జాతర: కేస్లాపూర్‌లో మెస్రం వంశీయుల ప్రత్యేక పూజలు.. అశేషంగా తరలివచ్చిన భక్తులు

ఆదిలాబాద్ జిల్లాలో ఐదు రోజుల పాటు సాగిన నాగోబా జాతర వైభవంగా ముగిసింది. మెస్రం వంశీయులు బేతాళ పూజ నిర్వహించగా, వేలాదిగా తరలివచ్చిన భక్తులు మొక్కులు చెల్లించుకున్నారు.

Jagadeesh

Adilabad | Published On Jan 23, 2026, 10.00 pm IST

Nagoba Jatara 2026 | ముగిసిన నాగోబా జాతర: కేస్లాపూర్‌లో మెస్రం వంశీయుల ప్రత్యేక పూజలు.. అశేషంగా తరలివచ్చిన భక్తులు

సంక్షిప్త సారాంశం

కేస్లాపూర్ నాగోబా జాతర శుక్రవారంతో ముగిసింది. మెస్రం వంశీయులు ఆలయంలో మందగజిలి, బేతాళ పూజ వంటి సంప్రదాయ క్రతువులు నిర్వహించారు. అనంతరం ఎడ్లబండ్లపై శామ్ పూర్ కు పయనమయ్యారు. ఈ వేడుకను వీక్షించేందుకు పొరుగు రాష్ట్రాల నుండి కూడా వేలాది మంది భక్తులు తరలివచ్చారు.

Nagoba Jatara 2026 | త్రినేత్ర.న్యూస్: ఉమ్మడి ఆదిలాబాద్ జిల్లాలో మెస్రం వంశీయుల ఆరాధ్య దైవం, అత్యంత ముఖ్యమైన గిరిజన పండుగ 'నాగోబా జాతర' శుక్రవారంతో ముగిసింది. ఇంద్రవెల్లి మండలం కేస్లాపూర్ గ్రామంలో ఐదు రోజుల పాటు జరిగిన ఈ మతపరమైన, సాంస్కృతిక వేడుకలు అత్యంత భక్తిశ్రద్ధలతో ముగిశాయి.

ముగింపు వేడుకల్లో 'బేతాళ పూజ'

జాతర ముగింపు రోజున మెస్రం వంశీయులు ఆలయ ప్రాంగణంలో 'మందగజిలి', 'బేతాళ పూజ' నిర్వహించారు. ఈ సందర్భంగా బేతాళ దేవుడు పూనకంతో ఊగిపోయిన రాజ్‌గోండ్ పెద్దలు గాలిలోకి ఎగురుతూ, దేవుడికి ప్రతీకగా భావించే పెద్ద కర్రలను తిప్పుతూ తమ యుద్ధ నైపుణ్యాలను ప్రదర్శించారు. ఈ విన్యాసాలు అక్కడకు చేరుకున్న భక్తులను విశేషంగా ఆకట్టుకున్నాయి.

శామ్ పూర్ కు పయనం

మెస్రం వంశాధిపతి మెస్రం వెంకట్రావు, పూజారులు కోసు, కోశేరావు, చీఫ్ దాదేరావుల ఆధ్వర్యంలో ఈ క్రతువులు సాగాయి. జాతర ముగిసిన అనంతరం మెస్రం వంశీయులంతా ఎడ్లబండ్లపై ఉట్నూరు మండలం శామ్ పూర్ గ్రామానికి బయలుదేరారు. అక్కడ బుడుం దేవ్ ఆలయాన్ని సందర్శించిన తర్వాత తమ సొంత గ్రామాలకు చేరుకుంటారు.

అశేషంగా తరలివచ్చిన భక్తులు

జాతర ముగింపు రోజున దాదాపు 50,000 మంది భక్తులు కేస్లాపూర్‌కు తరలివచ్చారు. తెలంగాణతో పాటు ఆంధ్రప్రదేశ్, మహారాష్ట్ర, ఛత్తీస్‌గఢ్, బీహార్ రాష్ట్రాల నుండి కూడా భక్తులు భారీగా తరలివచ్చి నాగోబాను దర్శించుకున్నారు. భక్తుల రద్దీతో ఆలయ పరిసరాలు కిక్కిరిసిపోయాయి.

Find us on