Meerut Divorce Celebration | “భరణం వద్దు.. నా బిడ్డే నాకు ముద్దు”: కూతురి విడాకులను పండుగలా జరిపిన తండ్రి

Meerut Divorce Celebration | త్రినేత్ర.న్యూస్ : సాధారణంగా కూతురికి విడాకులు వస్తే ఏ తల్లిదండ్రులైనా తీవ్ర మనోవేదనకు గురవుతారు. కూతురి భవిష్యత్తు ఏమైపోతుందోనని కుంగిపోతారు. కానీ, ఉత్తరప్రదేశ్‌లోని మీరట్‌కు చెందిన ఓ తండ్రి మాత్రం ఇందుకు పూర్తి భిన్నంగా ఆలోచించాడు. ఏడేళ్లుగా నరకం అనుభవించిన తన బిడ్డకు విడాకులు మంజూరు కాగానే, కోర్టు ఆవరణలోనే స్వీట్లు పంచుతూ, డప్పుల మోతతో సంబరాలు చేసుకున్నాడు. రిటైర్డ్ జడ్జి అయిన ఆ తండ్రి చేసిన పని ఇప్పుడు సోషల్ మీడియాలో హాట్ టాపిక్‌గా మారింది.

ఏడేళ్ల నరకం.. బిడ్డ పుట్టినా మారని వైనం

వినీత అనే మహిళకు 2018లో మేజర్ గౌరవ్ అగ్నిహోత్రితో వివాహం జరిగింది. పెళ్లైన కొన్నాళ్లకే వారి మధ్య విభేదాలు మొదలయ్యాయి. గత ఏడెనిమిదేళ్లుగా వినీత భర్త చేతిలో ఎన్నో వేధింపులకు గురైంది. కనీసం బిడ్డ పుట్టిన తర్వాత అయినా భర్త ప్రవర్తనలో మార్పు వస్తుందని ఆశించింది, కానీ పరిస్థితి ఏమాత్రం మారలేదు. ఈ క్రమంలోనే ఆ చేదు బంధం నుంచి బయటపడేందుకు ఆమె న్యాయపోరాటం ప్రారంభించి, చివరకు విడాకులు పొందింది.

"నా కూతురే నా ప్రాణం.."

ఈ సందర్భంగా వినీత తండ్రి మాట్లాడుతూ భావోద్వేగానికి గురయ్యారు. "నేను నా అల్లుడి దగ్గర నుంచి ఎలాంటి భరణం (Alimony) తీసుకోలేదు. నా కూతురిని మాత్రమే నేను సంతోషంగా తిరిగి ఇంటికి తీసుకొచ్చాను. ఆమె నా కూతురు.. నా ప్రాణం. పెళ్లి తర్వాత ఆమె సంతోషంగా లేనప్పుడు, ఆమెను సంతోషంగా ఉంచాల్సిన బాధ్యత తండ్రిగా నాపై ఉంది" అని ఆయన అన్నారు.

కోర్టు ఆవరణలోనే డ్యాన్సులు, స్వీట్లు

మీరట్ కోర్టులో విడాకుల తీర్పు వెలువడగానే.. వినీత కుటుంబ సభ్యులు, బంధువులు కోర్టు ప్రాంగణంలోనే సంబరాలు మొదలుపెట్టారు. అందరూ ‘ఐ లవ్ మై డాటర్’ (I Love My Daughter) అని రాసి ఉన్న టీ-షర్టులు ధరించి సందడి చేశారు. డోలు వాయిస్తూ, డ్యాన్సులు చేస్తూ స్వీట్లు పంచుకున్నారు. ఈ అనూహ్య పరిణామాన్ని చూసి అక్కడి వారంతా ఆశ్చర్యపోయారు.

విడాకులు ముగింపు కాదు.. కొత్త ఆరంభం

విడాకులు తీసుకున్న మహిళను సమాజం చిన్నచూపు చూస్తుంటుంది. ఆ సూటిపోటి మాటలకు చాలామంది మహిళలు కుంగిపోతుంటారు. అలా తన కూతురు బాధపడకూడదని, విడాకులతోనే జీవితం ముగిసిపోదని భరోసా ఇచ్చేందుకే వినీత తల్లిదండ్రులు ఈ విధంగా చేశారు. విడాకులు అనేది ఒక ముగింపు కాదని, ఒక చేదు గతం నుంచి బయటపడి కొత్త జీవితాన్ని ప్రారంభించే అవకాశం అని వారు ఈ సంబరాల ద్వారా సమాజానికి గట్టి సందేశాన్ని ఇచ్చారు.

"I didn't take any alimony. I just brought my daughter back home"

"She is my daughter. She is my soul"

"If my daughter wasn't happy after her marriage, it's my duty to keep her happy"

"She has faced many difficulties over the past seven-eight years. She was harassed"

"Even… https://t.co/0jpEbDVpaN pic.twitter.com/f8E2F3re1K

— News Algebra (@NewsAlgebraIND) April 5, 2026