NYC Smart Public Bathrooms | వాష్‌రూమ్‌లోకి వెళ్లి ఫోన్ స్క్రోల్ చేస్తున్నారా? ఇక ఆ పప్పులు ఉడకవు. 10 నిమిషాలు దాటితే డోర్ ఆటోమేటిక్‌గా ఓపెన్

• న్యూయార్క్‌లో కొత్త టాయిలెట్లు
• 10 నిమిషాల్లో పని ముగించేయాల్సిందే
• లేదంటే వాష్‌రూమ్ డోర్ దానంతటదే ఓపెన్

NYC Smart Public Bathrooms | త్రినేత్ర.న్యూస్ : టాయిలెట్‌కు వెళ్లి తీరిగ్గా కూర్చుని ఫోన్లలో రీల్స్ చూసే అలవాటు మీకుందా? అయితే న్యూయార్క్ నగరంలో మాత్రం అలాంటి పప్పులు అస్సలు ఉడకవు. నగరవాసుల కోసం ఏర్పాటు చేస్తున్న సరికొత్త హైటెక్ పబ్లిక్ టాయిలెట్లలో కఠినమైన సమయ పరిమితిని అమలు చేస్తున్నారు. వాష్‌రూమ్‌లోకి వెళ్లిన తర్వాత కేవలం 10 నిమిషాలు మాత్రమే సమయం ఉంటుంది. టైమ్ దాటితే అంతే సంగతులు.. డోర్ దానంతటదే తెరుచుకుంటుంది.

న్యూయార్క్ నగరంలోని పలు ప్రాంతాల్లో 4 మిలియన్ డాలర్ల ఖర్చుతో 17 అత్యాధునిక స్మార్ట్ టాయిలెట్లను ఒక సంవత్సరం పైలట్ ప్రాజెక్ట్ కింద ఇన్‌స్టాల్ చేస్తున్నారు. 'త్రోన్ ల్యాబ్స్' (Throne Labs) సంస్థ వీటిని నిర్వహిస్తోంది.

ఇది ఫోన్ స్క్రోల్ చేసే చోటు కాదు

ఈ కొత్త విధానంపై న్యూయార్క్ మేయర్ జోహ్రాన్ మమ్‌దానీ మాట్లాడుతూ ఆసక్తికర వ్యాఖ్యలు చేశారు. "వాష్‌రూమ్‌లోకి వెళ్లి మొబైల్ ఫోన్లు స్క్రోల్ చేస్తూ గంటల తరబడి గడిపే అలవాటు చాలామందికి ఉంటుంది. కానీ ఇది ఫోన్లు చూసుకుంటూ కూర్చునే ప్రదేశం కాదు.. పనైపోగానే బయటకు వచ్చేయాలి" అని స్పష్టం చేశారు.

నగర అధ్యయనాల ప్రకారం సాధారణంగా ఒక వ్యక్తి పబ్లిక్ టాయిలెట్‌ను ఉపయోగించడానికి సగటున 3.5 నిమిషాల సమయం పడుతుంది. అందుకే 10 నిమిషాల సమయం ఎవరికైనా సరిపోతుందని నిర్వాహకులు నిర్ణయించారు. దీనివల్ల క్యూ లైన్లలో ఇతరులు ఎక్కువసేపు వేచి ఉండాల్సిన అవసరం రాదు. అలాగే డ్రగ్స్, ఇతర చట్టవిరుద్ధ కార్యకలాపాలకు ఇవి అడ్డాగా మారకుండా అడ్డుకోవచ్చని అధికారులు భావిస్తున్నారు.

సమయం ముగిసే ముందు ఏమవుతుంది?

10 నిమిషాల సమయం ముగియగానే ఒక్కసారిగా డోర్ తెరుచుకోదు. సమయం దగ్గరపడుతున్న కొద్దీ వినియోగదారులను అప్రమత్తం చేయడానికి లోపల ఫ్లాషింగ్ లైట్లు వెలుగుతాయి, ఆడియో హెచ్చరికలు వినిపిస్తాయి. "మీ సమయం ముగిసింది, డోర్ ఓపెన్ అవుతోంది" అనే చివరి వార్నింగ్ వచ్చిన తర్వాత కాస్త సమయం ఇస్తారు. ఆ లోపు పని ముగించుకుని డోర్ లాక్ తీసుకుని బయటకు వచ్చేయాలి, లేకపోతే డోర్ ఆటోమేటిక్‌గా అన్‌లాక్ అయి తెరుచుకుంటుంది.

కనెక్షన్లు లేని సరికొత్త టెక్నాలజీ

ఈ టాయిలెట్లు అత్యాధునిక సెల్ఫ్-కంటైన్డ్ మాడ్యులర్ డిజైన్‌తో రూపొందాయి. వీటికి మున్సిపల్ వాటర్ పైప్‌లైన్లు, భూగర్భ డ్రైనేజీ లేదా విద్యుత్ వైర్లతో ఎలాంటి ప్రత్యక్ష కనెక్షన్ అవసరం లేదు. అవసరాన్ని బట్టి వీటిని సులువుగా ఒక ప్రాంతం నుంచి మరో ప్రాంతానికి తరలించవచ్చు.

పూర్తిగా టచ్‌లెస్ (స్పర్శ లేకుండా పనిచేసే) విధానం, ఫ్లషింగ్ టాయిలెట్, రన్నింగ్ వాటర్ సింక్, వాతావరణానికి తగినట్లుగా క్లైమేట్ కంట్రోల్, చిన్న పిల్లల కోసం బేబీ చేంజింగ్ స్టేషన్, లోపల ఆహ్లాదకరమైన మ్యూజిక్ వంటి సౌకర్యాలు ఇందులో ఉన్నాయి.

ఎలా ఉపయోగించాలి?

ఈ పబ్లిక్ టాయిలెట్లు ఉదయం 7 గంటల నుంచి రాత్రి 10 గంటల వరకు ప్రజలకు పూర్తిగా ఉచితంగా అందుబాటులో ఉంటాయి. టెక్స్ట్ మెసేజ్, క్యూఆర్ కోడ్, లేదా ప్రత్యేకమైన Throne యాప్ ద్వారా డోర్ అన్‌లాక్ చేసుకుని లోపలికి వెళ్లవచ్చు. యాప్ ద్వారా సమీపంలోని టాయిలెట్ ఎక్కడుంది, ప్రస్తుతం ఖాళీగా ఉందా లేదా, పరిశుభ్రత రేటింగ్ ఎంత అనే వివరాలను రియల్-టైమ్‌లో తెలుసుకోవచ్చు. ప్రతి 15 మంది వాడిన తర్వాత లేదా అంతకంటే ముందే సిబ్బంది వీటిని శుభ్రం చేస్తారు.

దాదాపు 85 లక్షల జనాభా ఉన్న న్యూయార్క్ మహానగరంలో ప్రస్తుతం కేవలం 1,000 పబ్లిక్ టాయిలెట్లు మాత్రమే అందుబాటులో ఉన్నాయి. ప్రజలకు నమ్మకమైన, పరిశుభ్రమైన సౌకర్యాలు కల్పించడంలో భాగంగా యాంకీ స్టేడియం, కొలంబస్ పార్క్ సహా రద్దీగా ఉండే ప్రాంతాల్లో తొలి విడతగా వీటిని అందుబాటులోకి తెస్తున్నారు.