Bengaluru to Mumbai Relocation | బెంగళూరు టూ ముంబై: రెంట్, ట్రాఫిక్ కాదు.. ఈ హెచ్‌ఆర్‌కు తగిలిన అసలైన ‘కల్చర్ షాక్’ ఆటో డ్రైవర్లతోనే!

Bengaluru to Mumbai Relocation | త్రినేత్ర.న్యూస్ : బెంగళూరు (Bengaluru) నుంచి ముంబైకి (Mumbai) మకాం మారుస్తున్నారంటే ఎవరైనా ముందుగా ప్రిపేర్ అయ్యేది అక్కడి భారీ అద్దెలు, ట్రాఫిక్, వాతావరణం గురించే. కానీ, టాలెంట్ అక్విజిషన్ మేనేజర్‌గా (Talent Acquisition Manager) పనిచేస్తున్న మయాంక్ కుమార్ అనే వ్యక్తికి మాత్రం ఒక విభిన్నమైన అనుభవం ఎదురైంది. ముంబైలో ఆటో డ్రైవర్ల ప్రవర్తన చూసి ఆయనకు అక్షరాలా కల్చర్ షాక్ (Culture Shock) తగిలింది. ఈ విషయాన్ని వివరిస్తూ ఆయన లింక్డ్‌ఇన్‌లో (LinkedIn) పెట్టిన పోస్ట్ ఇప్పుడు ఇంటర్నెట్‌లో తెగ వైరల్ అవుతోంది.

బెంగళూరులో ఆటో అంటే ఫైనల్ ఇంటర్వ్యూనే

బెంగళూరులో ఆటో కష్టాలు ఎలా ఉంటాయో ఐటీ ఉద్యోగులకు ప్రత్యేకంగా చెప్పక్కర్లేదు. మయాంక్ మాటల్లో చెప్పాలంటే.. "బెంగళూరులో ఆటో దొరకడం అనేది ఒక జాబ్ ఇంటర్వ్యూలో ఫైనల్ రౌండ్ క్లియర్ చేయడం లాంటిది". రైడ్ యాక్సెప్ట్ చేయకపోవడం, మీటర్ వేయడానికి ససేమిరా అనడం, డిజిటల్ పేమెంట్ కాకుండా క్యాష్ అడగడం వంటివి అక్కడ కామన్. ముంబైకి వెళ్తున్నప్పుడు కూడా ఆటో ప్రయాణాలు ఇలాగే ఉంటాయని ఆయన ఫిక్స్ అయ్యారు. కానీ ఆయన అంచనా తప్పింది.

ముంబైలో ఆ ఊహించని షాక్ ఏంటంటే?

ముంబైలో ఒకరోజు ఆయన హోటల్ నుంచి మెయిన్ రోడ్డుకు వెళ్లడానికి చాలా ఎత్తుగా ఉండే రోడ్డు గుండా నడవాల్సి వచ్చింది. అప్పుడే ప్యాసింజర్‌ను డ్రాప్ చేసిన ఓ ఆటో డ్రైవర్‌ను ఆపి లోఖండ్‌వాలా (Lokhandwala) వస్తావా అని అడిగారు. తనకు వేరే పని ఉందని, టైమ్‌కు తిరిగి రాలేనని డ్రైవర్ సున్నితంగా తిరస్కరించాడు. అయితే, అక్కడితో వెళ్లిపోకుండా.. "కూర్చోండి, కనీసం మెయిన్ రోడ్డు వరకైనా డ్రాప్ చేస్తాను. అక్కడ వేరే ఆటో సులభంగా దొరుకుతుంది" అని చెప్పి మయాంక్‌ను ఎక్కించుకున్నాడు.

బెంగళూరు అనుభవాలతో.. ఈ డ్రాపింగ్‌కు కూడా డ్రైవర్ డబ్బులు అడుగుతాడేమో అని మయాంక్ సందేహించారు. కానీ ఆ డ్రైవర్ పైసా తీసుకోకపోగా, మెయిన్ రోడ్డులో మరో ఆటోను ఆపి.. "ఈయన సిటీకి కొత్తగా వచ్చారు, లోఖండ్‌వాలా తీసుకెళ్లు" అని చెప్పి మరీ వెళ్లాడు.

రెండో ఆటో డ్రైవర్ ఎలాంటి బేరసారాలు లేకుండా వెంటనే మీటర్ (Meter) ఆన్ చేశాడు. గొడవలు, బేరాల్లేకుండా ప్రశాంతంగా గమ్యస్థానం చేర్చాడు. యాప్‌లలో చూపించిన ఎస్టిమేట్ ఛార్జీ కంటే తక్కువ బిల్లు అవ్వడం మయాంక్‌ను మరింత ఆశ్చర్యపరిచింది.

ఆటో రైడ్ నేర్పిన ప్రొఫెషనల్ లెసన్

ఈ సంఘటన మయాంక్‌కు ఒక హెచ్‌ఆర్‌గా తన ప్రొఫెషనల్ లైఫ్‌లో (Recruitment) ఒక ముఖ్యమైన పాఠాన్ని గుర్తుచేసింది. కంపెనీలు బ్రాండింగ్ కోసం చేసే పెద్దపెద్ద పనుల కంటే.. చిన్నచిన్న మర్యాదలే అభ్యర్థులకు బాగా గుర్తుంటాయని ఆయన అన్నారు. ఇంటర్వ్యూ షెడ్యూల్స్ గురించి ఎప్పటికప్పుడు అప్‌డేట్స్ ఇచ్చే రిక్రూటర్లను, గౌరవంగా చూసే మేనేజర్లను క్యాండిడేట్స్ ఎప్పటికీ మర్చిపోలేరు అని, ఈ ఆటో డ్రైవర్ల అనుభవం కూడా అలాంటిదేనని ఆయన రాసుకొచ్చారు. బెంగళూరు వెదర్ సూపర్ అని, ముంబై హ్యుమిడిటీ భరించడం కష్టమైనా ఇక్కడి మనుషులు మాత్రం ఎంతో హెల్పింగ్ నేచర్‌తో ఉంటారని ఆయన కితాబిచ్చారు.

నెటిజన్ల రియాక్షన్ ఏంటి?

ఈ పోస్ట్‌పై నెటిజన్లు తమ అనుభవాలను కామెంట్స్ రూపంలో పంచుకుంటున్నారు.

"ముంబై ఆటో డ్రైవర్లు చాలా మర్యాదగా ఉంటారు. అరుదుగా మాత్రమే నో చెప్తారు. ఎప్పుడూ మీటర్‌పైనే వస్తారు. డిజిటల్ పేమెంట్స్ కూడా యాక్సెప్ట్ చేస్తారు" అని ఒకరు కామెంట్ చేశారు.

ఇంకొందరు ముంబై సిటీ సేఫ్టీని, ముఖ్యంగా మహిళల కోసం ఉండే పింక్ ఆటోలను (Pink autos) ప్రశంసించారు.

అయితే ఒక నెటిజన్ మాత్రం దీనితో ఏకీభవించలేదు. "అందరూ అలా ఉండరు, రేట్లు ముందే చెప్తారు. మెట్రో స్టేషన్ నుంచి ఎయిర్‌పోర్టుకు ఆటోలో వెళ్లడం నరకమే" అని తన భిన్నమైన అభిప్రాయాన్ని వ్యక్తం చేశారు.

ఏది ఏమైనా ముంబై సిటీ తనను అక్కున చేర్చుకునే విధానం, అక్కడి ప్రజల ఆత్మీయత ఇంటర్నెట్ వేదికగా ఎంతోమంది హృదయాలను గెలుచుకుంటోంది.