TGSRTC strike 2026 | ఆర్టీసీలో మోగిన సమ్మె సైరన్.. ఏప్రిల్ 22 నుంచి బస్సులు బంద్?

TGSRTC strike 2026 | త్రినేత్ర.న్యూస్ : తెలంగాణ రాష్ట్ర రోడ్డు రవాణా సంస్థ (TGSRTC) లో మళ్లీ సమ్మె మేఘాలు కమ్ముకున్నాయి. తమ దీర్ఘకాలిక డిమాండ్ల పరిష్కారంలో అటు ప్రభుత్వం, ఇటు యాజమాన్యం నిర్లక్ష్యం వహిస్తున్నాయని ఆరోపిస్తూ ఆర్టీసీ కార్మికుల జాయింట్ యాక్షన్ కమిటీ (JAC) సమ్మె సైరన్ మోగించింది. ఎన్నికల మేనిఫెస్టోలో ఇచ్చిన హామీలను తక్షణమే నెరవేర్చాలని వారు డిమాండ్ చేస్తున్నారు.

నెల రోజులు గడుస్తున్నా.. స్పందన కరువు

తమ డిమాండ్ల సాధన కోసం ఆర్టీసీ కార్మిక సంఘాలు ఇప్పటికే మార్చి 13న ప్రభుత్వానికి, యాజమాన్యానికి సమ్మె నోటీసులు అందజేశాయి. అయితే, నోటీసులు ఇచ్చి నెల రోజులు గడుస్తున్నా ప్రభుత్వం నుంచి ఎలాంటి స్పష్టమైన స్పందన రాలేదని జేఏసీ ప్రతినిధులు ఆవేదన వ్యక్తం చేస్తున్నారు. అందుకే గత్యంతరం లేక ఏప్రిల్ 22 నుంచి సమ్మె చేయనున్నట్లు జేఏసీ ప్రకటించింది. అయితే, ఏప్రిల్ 20 నుంచే ఈ సమ్మె ప్రారంభమయ్యే అవకాశాలు ఉన్నాయన్న హెచ్చరికలు కూడా వినిపిస్తున్నాయి.

ప్రభుత్వం ముందు జేఏసీ పెట్టిన ప్రధాన డిమాండ్లు ఇవే..

ప్రభుత్వం, యాజమాన్యం ముందు మొత్తం 32 డిమాండ్లను ఉంచినట్లు జేఏసీ వైస్ చైర్మన్ థామస్ రెడ్డి వెల్లడించారు. అందులో ప్రధానమైనవి ఇవే.

ఆర్టీసీ విలీనం: ఆర్టీసీని పూర్తిస్థాయిలో ప్రభుత్వంలో విలీనం చేసే ప్రక్రియను తక్షణమే చేపట్టాలి.

కార్మిక సంఘాల ఎన్నికలు: ఆర్టీసీ యూనియన్లపై ఉన్న ఆంక్షలను ఎత్తివేసి, వెంటనే గుర్తింపు సంఘం ఎన్నికలు నిర్వహించాలి.

వేతన సవరణ: 2021 వేతన సవరణను 30 శాతం ఫిట్‌మెంట్‌తో వెంటనే అమలు చేయాలి.

పాత బకాయిల విడుదల: గత ప్రభుత్వం నుంచి పెండింగ్‌లో ఉన్న సుమారు రూ. 2,500 కోట్ల పాత బకాయిలను విడుదల చేయాలి.

మహాలక్ష్మి నిధులు: మహాలక్ష్మి పథకం ద్వారా సంస్థకు రావాల్సిన నిధులను ఎటువంటి షరతులు లేకుండా సక్రమంగా, ఎప్పటికప్పుడు విడుదల చేయాలి.

ప్రభుత్వం తక్షణమే స్పందించి సమ్మె నివారణ చర్యలు చేపట్టాలని, కార్మికులతో చర్చలు జరిపి డిమాండ్లను నెరవేర్చాలని ఆర్టీసీ జేఏసీ కోరుతోంది. ఒకవేళ ప్రభుత్వం దిగిరాకపోతే తెలంగాణ వ్యాప్తంగా బస్సులు ఎక్కడికక్కడ నిలిచిపోయి, ప్రయాణికులు తీవ్ర ఇబ్బందులు ఎదుర్కొనే ప్రమాదం ఉంది.